Babeleki ba NBC basabisa kusabeleka kabaka la tuwelo

0
36

Aron Mushaukwa

Katima Mulilo – Babeleki ba Wayalesi Yabupatalazi ya Namibia (NBC) nebabile nikucaula mwa naha kaufela Labune, babata kekezo ya 6 pesenti. Mwa sikiliti sa Zambezi babeleki ba wayalesi niba wayalesi ya maswaniso mwaketelelo ya katengo kakayemela babeleki mwanaha (NAPWU), nebacauzi kukalela kwa muyaho walibuka kuliba kwa siteshini sa NBC mwa sikiliti, iliko nebailo tambeka liñolo labona lalinonge kumuzamaisi swalelele wasiteshini Simataa Buchane.

Mwa liñolo la linonge leliliba kumuzamaisi yomuhulu wa NBC Stanely Similo, nebaize habatabiswi kikamaiso, limembala zakatengo kakamaiso hamoho cwalo ni muuso, kakuli “kusa ekeza lituwelo zababeleki kuzwelapili kucuñutisa NBC nibabeleki bayona hala masheleñi.” Babulela kuli sililo sabona sisweli kuwela famazebe atibani. “Lilimo zepeli zefelile kamaiso isweli kuopela pina yeswana yesatabisi yakuli kufukuzwa kwamusulo kuzwelela kwa muuso kufofalize hahulu likalulo za NBC, mi kona taba yetisize kuli lituwelo zababeleki lisike za ekezwa,” nekubaleha liñolo la linonge.

Babeleki babulela hape kuli kamabaka amatata amasheleñi abatalimani niona basebeza nilipilaelo, ili taba yetisa kusasebeza hande. Ba akaleza hape kuli “babeleki babañwi ba NBC bane bakolotile masheleñi ane aswanela kupumwa kiba NBC kayuya katumelelano, sebatalimani nimulao kakuli NBC nesalifi likoloti zeo.” Balaela hape kuli kekezo ya 6 pesenti iswanezwi kutalelezwa kukuta kwamulaho la 1 Lungu 2017. Babata hape kuli NBC ilife likoloti nikekezo yateñi kwatutengo twamasheleñi pili Mbuwana isikafela kale.”

“Lulaela hape kuli kanako yalituwelo ya Sikulu masheleñi alikoloti kaufela abeiwe mwalibulukelo zababeleki baluna, ili kuli bayo itifela kone kukolotilwe mali bona beñi.” Sikwata si akaleza hape kuli NBC ibeile babeleki mwalitulo zesabaswaneli. “Lulaela kuli babeleki bababalwa ba NBC babasikafeza lituto zabona kwalikolo zepahami babeiwe mwalitulo zezamaelela nimapampili abona, mi balifiwe kaswanelo, ili kuli kusike kwaba niketululo mwakufa litulo.” Babeleki bafile kamaiso mazazi asupile kuli ba alabele kwa linonge zabona, “kusicwalo lukanga muhato osiyo hande sihulu hala muuso, mi lukatuhela kubeleka.”

LEAVE A REPLY

Please enter your comment!
Please enter your name here