NHE ngesi kuna kara noyimaliwa yokuvhura kugava kwava vanahara mambo modoropa Bukalo

0
47

John Muyamba
Rundu

Kampani ezi vana kutumbura asi National Housing Enterprise (NHE) ngesi nawo vanatameke kugava yimaliva kovatungimo vana hara mambo yipo varande mambo aga vana hepa, kupitira melikwamo vana kutumbura asi Mass Housing modoropa zaBukalo, konyima tupu apa mbanga zanyoka kuvapa yimaliwa varande mambo. Kabinete kwatokora mokupura NHE, asi nokuvhurasi vagave yimaliva omukuli ndi makongo yipo vantu varande mambo, aga gana kara asi dogoro ngesi mambo gene kwato venyago,yipo nsene vayirugana oyo awo varande nye mambo ogo. Mbudi zangesi kwaretanye NHE, akare noyimaliwa omu nayigava kwava vana hara mambo makura owo vafute kumwe nokukara asi mambo aga gawo. Pwanare NHE, age ngagava tupu mambo gene ngavagava kovantu melikwamo lyawo lyokuvatera vantu. Kuna kara ngesi moBukalo mondango zodoropa, momukunda horowero gwaZambezi, omu mwakere asi mbanga kwanyokere kugava yimava kovantu ndi mambo gokusika ko 57, yipo asi ngano varande mambo ogo. Ano ngesi ngendeseso zokurandesa mambo aga kuna kugendapo nawa, kapisi moBukalo mwelike nye komavango nankenye aga gana kara asi nombanga kwanyoka kugava simaliva, yimo ngoso ana kutanta mukurona gomagwanekero nomarandeso gwaNHE, Mutonga Matali moutano kaupwire. “ Kehuliso nye eli, ame ninahafa mokumutantera asi mambo gokusika ko29, twadika ngesi tuna garandesa ntani nare twagagava kwavenyago, mogo 43 gna kutunda mo57, vantu owo twavapa nare mambo gawo nomakongo nare ngesi melikwamo gana kara mokugatura moyirugana ose kuna kundindira elikwamo lyangesi lisike kehagero sinkwa ntani. “ yimo ana kutanta Matali. PoBukalo, mambo gokusika ko 29 kwagatunga govantu omu muna kara asi ago gomazimo gavali gokurara, ano 47 age nye gomukuli gomazimo nago gavali ntani age nye murongo gomazimo gatatu. Kapi kwakere yitangalimba nkenye momambo aga gakere asi kwagatungire nositambo sokugarandesa. Yimo ana kutanta. “ Nye twakere nomalirango morwa nombanga kapi dakere asi divatere vantu vana hara mambo vagwane nomukuli payimaliwa, ano ngesi yina wapa kutunda tupu apa NHE, kutunda tupu apa vamupa nonkondo asi agave mwene yimaliwa pomakongo ,” yimo ngoso ana kutanta Matali. Projeka ezi zina kara moBukalo, kuna kara elikwamo lyomambo gana venye ngesi kuna kukaza nye konodoropa nadinye edi vatunga mambo gangesi sirongo nasinye.

LEAVE A REPLY

Please enter your comment!
Please enter your name here