Sipatela sa Katima sifelelwa kimilyani

0
72

Aron Mushaukwa
Katima Mulilo

Sipatela sa Muuso sa Katima Mulilo hasisana hande milyani mi hañatañata bakuli babapotela sipatela babulelelwa kuli bayoitekela milyani nizetokwahala kaufela kamwabulelezi ñaka wasipatela kwalintolo zelekisa milyani. Mukuli yomuñwi yanabulezi niba New Era nasakoni kupata bunyemi bwahae kasamulaho akuyotalusezwa kuli ayoitekela lisila lakutama fokuholofezi kakuli sipatela hasina.

“Nebanibulelezi kuli hakuna sebana nisona nikuli niswanezi kuyoitekela. Kanako yeo nenisina masheleñi, senikuta feela kwandu nibunyemi bwaka ninze niutwa butuku. Kono hanibona kuli butuku buzwelapili seniya kwasintolo sesilekisa milyani, mi mulekisi sayonieleza kuli nileke feela lisila leliswala hande ngongo, kakuli ngogo yaka neluluhile, mi neniutwa butuku,” nekubulezi mubilaeli wamusupali. “Muhupulisise taba yakuli habana lisila lakutama fasitombo, cwale mutu yalobehile liutu bakamueza cwañi?’’ nabuzize.

Ba New Era nebazibisizwe kuli sipatela hasisana milyani mi hañatañata bakuli bafiwa feela mulyani wa Panado, hakubilaezi kuli bakula butuku mañi. “Kanako yacwale hakuna milyani yamutu yakula swikili, taba yeo itoloka kuli mutu yakula swikili uswanezi kuyoitekela milyani kwasintolo sesilekisa milyani. Niziba mulikani yaikabela milyani nimusala’ hae, kakuli nako kaufela haya kwasipatela bayo mubulelela kuli hakuna milyani ifelile,” mutu yomuñwi nabulelezi ba New Era.

Hanakupilwe kualabela falitaba zeo, Muzamaisi wa Zamakete mwasikiliti sa Zambezi Agnes Mwilima, nakupile kuli alumelwe lipuzo, mi uka lialaba viki yetaha. “Hanikoni kualaba onafo feela. Kakuli nisaswanezi kubuza batu babazamaisa sipatela pili nisika alaba kale,” nabulezi. Lipatela zeñwi lisebeza nibaoki babakatezi, nombolo yabaoki haibapanywa niyabakuli ibonahala kuli ikutezi fafasi, mi kanako yacwale muuso haucafanzi mapampili amusebezi abaoki babazwelela mwanaha Zimbabwe, bao bucaziba bwabona nebulemuhiwe kuba bwabutokwa mwalipatela zamuuso. Kufukuzeha ko kubonahala kuli kutiswa kikutepela kwamasheleñi kokuli mwamuuso, ili taba yeo babañwi balipolitiki bailatulanga mwamikopano nisicaba.

LEAVE A REPLY

Please enter your comment!
Please enter your name here