Kampungub ǁkhawa go ǁgaumâihe ǂHanub Sîsen!oabas ǀAwemā!nans aiǂnû-aose

0
17

Albertina Nakales

ǀAeǁgams-Markus Kampungub ge ǁkhawa go ǁgaumâihe ǁanib ase tsî ǁkhāti aiǂnû-aose ǂHanub Sîsen!oabas ǀAwemā!nans dib ases tsîna.

Nē sîsenxasib tsî !haros !nâb ge 1 Hôasoreb 2017 disa xu 30 ǀHōǂgaeb 2022ǁî kurib dis kōse nî !oaba. ǂGuro Minister Saara Kuugoongelwa-Amadhilas, hîa ǂoago wekheb ai Kampungub di ǁkhawa ǁgaumâihesa !Haosi ǂNûs !nâ gere ǂkhâ!nâs, ge ge mî President Hage Geingob ge Kampungub nî ǁkhawa ǁkhā !haros ǂHanub Sîsen!oabas ǀAwemā!nans aiǂnû-aosis dis !nâ ǁgaumâihesa a mā-amsa sao ra koro kurigu di ǁaeb !aroma.

ǂGuro Ministers ge ǂHanumas 112 (3) !Hūǂhanub disa xu ǁgaeǁgae tsî ge mî nē ǂHanumas di 2 (2) !âb tsî ǂHanub Sîsen!oabas ǀAwemā!nans ǂHanumas 1990ǁî kurib dis !nâ i !gāsase ra mîhesa, nēti ī ǀAwemā!nans nî aiǂnû-ao-i tsî !nanis xa !nāsa tama tsî ǁkhāti !nonas xa ǀoro tide ǀkhara ǁanin hîa presidenti xa ǁgaumâihe tsî !Haosi ǂNûs xa nî !gaehena xu nî !amǁaresa !khaisa.

Nēsis ge nē ǂHanub Sîsen!oabas !Nansa !nanina ǁanina xu hâ ǂgaiǀons ai Kampungub, Steve Motingab, Magdalena Wilhelmina Deetlefs, Dr Nashilongo Shivute, Berseba Katjionguas tsî Florence Munyunganos hâna.
Kampungub di !nubu ǁaeb ǀguiba ge !khōǂgā hâ i ai!âkam !haros aiǂnû-aosis dis ge nē kurib di 1 Hôasoreb dis ai ra !gûǀam. “!Gôahesa Kampungub ge ǂgurose !nubu ǁaerob ǀguiba ǁnā !haros aiǂnû-aosis dis !nâ ge !gaehe, 14 !Khanǀgôab 2016 disa xu 30 ǀHōǂgaeb 2017 dis kōse tsîs ge nēsa ǁîb di sîsen !haros hîab ǂhanub !oabas mûǂamaose hâ!nâs ǀkha ǀguipa nî !gûǁarese.

ǁÎb ge nē mûǂamaosis di !haros !nâ 1 Hôasoreb 2002 kurib ai ǂguro !nās ase ge ǁgaumâihe tsîb ge nē !haros !nâ koro kurina ge sîsen,” tis ge Kuugongelwa-Amadhilsas ge mî.

!Aruǀîs ge ǂGuro Ministers age mî, Kampungub di ǂhaba ǂans ǂHanub Sîsen!oabas ǀAwemā!nans !nâb ūhâs ǁkhāti ǁîb di ǁkhawa !kharu!kharu kaihes ǀkha supuse sîsenna !kharu kaisa nî īǁkhā kaisa tsî ǂkhanusib ǀkha ǁkhāti nî ai!gûsa President Geingob tsî ǂhanub tsîna ǀawemās ǀkha ǂHanumas 1990ǁî kurib dis ǂhanuma ǁgaragu !naka.

LEAVE A REPLY

Please enter your comment!
Please enter your name here