Xrat 10 ǂnû!gau tsî nēsi autokuru!khaib di ǀhonkhoe

0
30

Matheus Hamutenyab

ǂNūǂgoaes-ǂAuna ǂkhamkhoen ge ǁgâudi tawa ǂnûmas ǀguisa ra hîse ra ǂâiǂhansen ai!âb ǁga hâ ûigu ân xa Xrat 10san kara ǂnû!gautoao, xaweb ge ǂkhamkhoeba ǂNuǂgoaes !nâ Xrat 10sab ge a ǂnû!gau o, ǁgoe-oa tamase ǂhansenmadi khao!gâ ǁîb di autokuru!khaiba ge ǀhui-am tsî ǁkhāti nau ǂkhamkhoen tsîna ge sîsenmā. Nē ǂkhamkhoeb Nicolaus Kambinda Ndarab, 30 kurixab ge ǁkhāti ǂgui Namibiab ǂkhamkhoen khami !gâi!gâ tama ge i ǂgaoǀkhādi Xrat 10 !kharus didi ai dīǀoaǀoasa 2002ǁî kurib !nâ tsîb ge oms tawa ǀguib xū-e dī tamase gere hâmas khao!gâ ge mîǁgui, ǁîb ǁnā sîseno ǂkhamkhoen di !gôab ai ǀarosen tide !khaisa tsîb ge Rundusa xu ǂNūǂgoaes ǁga 2006ǁî kurib ai ge sîsenôa tsî nēpas naupas di ǂkhari huisîsenrona gere dī. ǁÎb ge nēsi a ǂnīsa ǀhonkhoe ǂhanusise a xoamâisa ǂharugub hîa ‘Kambinda Car Repair cc’ di tsî ǀgam ǂkhamkhoera !gaeǂgā hâ, xoa-aos tsî mâxōǀkhā-ao kuru-aob tsîna. Ndarab ge New Erab ǂhôare-ao-e gere ǁgamba mâtib ge 2014ǁî kurib !nâ ǁîb di ǂharuguba a tsoatsoasa ǁnāpab ge a mûǂan ǂhâbasa ǂans tsî ǁkhāsigab ge a hōbasens !khaisas khao!gâ. “Tita ge 2014ǁî kuri ge mîǁgui aitsama ta nî sîsenbasensa. ǁNā ǁaeb ai ta ge ǀgui kuru-ūxūn boks ǀkha ge tsoatsoa tsî mariron ra ǂgâxa khami ǂnûiǂui tsî gere ǁama tsî nētsē hoa xūn hîa autokurus !nâ a ǂhâbasan hoana ūhâ,” tib ge ge mî. “Nē ǂharugub ge kaise !gâise ra ai!gû tsî ta ge ǂauna khoena ūhâ ti !oabade ra !gôa!gâna tsî ra ǂgom!gâ ǂharuguba da a khoraǂui ǁkhāsa hā nî ǁaeb !nâ. ǁKhāti da ge noxopa khoena nî !gaeǀaro î ta !hae ǁaeb !nâ ti !oabade ra sîsenū khoena ǂâuǀoa hâ !oabade mā,” tib ge ge mî. Ndarab di ǂgom!gâhesa sîsenni ge ge !aroma ǁîb di auto!nari-aon, !gōsase !gae-auto!nari-aon ǀguis khami ī îganǀge-i ose mâǁae-i ǀgui-i ais ka xawe ǁîb tawa ra hāsa.

LEAVE A REPLY

Please enter your comment!
Please enter your name here