Bakwaezi balimbayambaya baipile musula

0
26

Aron Mushaukwa

Katima Mulilo-Bakwaezi balimbayambaya zalibyana banaha Namibia banebalengilwe mwasitokisi ki mubuso wa Zambia kalikweli zesilezi kamabulatwi akuli, nebalongile kota ya mukula-yesilelelizwe, baipile musula wa kulonga kota yamukula nikamuta fakuzwa kwakutambiswa kimubuso wa Zambia.

Mubuso wa Zambia neukalile kulukulula limbayambaya zanaha Namibia nizemwi zezwa mafasi asili kalikwata zelikana miandanda zenetamilwe mwanaha yani mwahali a Sope ni Lyowa. Nebatapisizwe kakusaba ni mulatu mwataba ya kulonga mukula kuzwa Democratic Republic of Congo. Limbayambaya nelilukuluzwi kuzwa mueteleli wa naha Hage Geingob  hamanoikambota nimuhabo yena Edgar Lungu kuzwa fasililo zakuswalwa kwalimbayambaya zelikana mianda yemine.  Yomumwi kwabakwaezi ya natamilwe mwa Zambia likweli zene kakubeiwa mwasitokisi masihu amabeli kusina kubo yakuikapesa, mezi ni lico, na taluselize ba New Era kuli, witambile asitongwani kukuta kwa Zambia haiba kiza kulonga mukula feela. “Haiba kizakukuta kwa Zambia kwakulonga mukula feela batili muniswalele. Babamwi babeleki bali, eni nisakona kukuta kono hanina kulonga mukula nikamuta,”atalusa.

Mukwaezi ya nasatabeli kuzibahazwa upatuluzi kuli, asalikusiya mabasi ahae likweli zesilezi nibukachenu le. Kufitela mabani mubuso wa Zambia kikale ulukulula limbayambaya zemwanda kazelishumi kazepeli kanzila ya museto wa Winela.  Limbayambaya kikale likena mwa Namibia kono lipiho litalusa kuli, buńata litabe lilukuluzwi kachenu mi kanako yakuhatisa mutende nekutwahala kuli neseli nanuhile. Nihalikeni mwa Namibia cwalo, zemwi kuzona liyemi mwalibaka zeshutanashutana mwa Katima Mulilo. Buńata bwazona lifelezwi kimafula, kacwalo baluwi balimbayambaya bapatehile kuzuma mapene amafula kuli lisimulule kuliba kwalikamba laliwate la Walvis Bay.

“Kanako yacwale, hanina ni mali akufa bakwaezi kuleka lico sina hautwile inze nibulela fafoni kuli nisweli kubata pene,”kwatalusa Ronald Shangoya habuziwa kufa maikuto ahae. “Nisweli kubata tuso kumuhabo na mwana anaha China kunitusa kwapene yamafula akunwisa limbayambaya.

LEAVE A REPLY

Please enter your comment!
Please enter your name here