vanona wovakadona kuna vahundire asi valitakamese kugwana mazimo nounonanona

0
27

Obrein Simasiku

Tsumeb-Vanona gona wovakadona awo hena vanasure kuna vahundire asi valikunge kugwana mazimo nounonanona, yipo asi simpe sinka sawo sikare sokulironga morwa yipo nye ngavakakare neparu lyewa komeho.

Eli kalikere ezwi lyamMinistera gehetakano vharwa nosinka separu, Doreen Sioka, ogu katente asi vanonagona wovakadona kuna kuvatwara vagara mokulihamesera kukara kumwe panyama makura vavape simaliva nokuvatumbwidira asi tavamukwara, ano age yiyo nye kavatanterere asi mugara kapi takwara mukadi gokupira kulironga, yipo asi mwahakara vamwe muna kufa melikwamo eli mupire kulironga ano meho zeni nazo tazi zumbana. Age kakauyungire posilika sokudana munona gwaAfrica moTsumeb moutano, omu kadiworokesere vanona novadinkantu asi yinke yahorokere mo Soweto, moSouth Africa momazuva gaPembagona 1976, omu varongwa varwanesere erongo lyahana udumba eli ngavagwana siruwo sina. Mvhura ezi siparatjangwa kunakara asi tutwarenimo ekeverero, kunkondopeka ntani ehetakano lyomunona moAfrica komeho zonomvhura 2030.

Vanona muna kara apa, sirongo saNamibia kuna kumufumadeka, muhoko gwetu gokomeho. Yipo nye asi, ose twaturapo noveta nomalikwamo gokulisiga siga, noyirugana yipo asi nzodigona zetu ezi zoHarambee zisike mosirugana sokuwapera yimo ngoso ana kuva hundira Sioka. Yipo asi Ministeli zefiro sinka paruvharo nezi zerongo, kuna kuruganena kumwe yipo yikare asi vanona vana vatjangesa monosure. Erongo ngali mutwara momuwa ntani ose kuna kuruganesa nayinye yamautumbukira. Yipo nye ngesi kuna kara asi sure ntateko dogoro posekondere kuna kara zomusininiko ntani zokupira kufuta Yuma nsene asi ove kuna hara kulironga unene mosirongo setu Namibia, eyi kwayi ninkira asi kwato munona ogu nakara konyima nelirongo asi kwato mfuto.

LEAVE A REPLY

Please enter your comment!
Please enter your name here