Okakararas goma ǁamaxus ge ǁgoeǂam ra !gôaba ge sī!nâ

0
29

Sîsenao-i xa xoahe hâ

ǀAeǁgams-Meatcos ǁganǁamaxus tsndi hîa ge !nona tsēde !khōǂgā hâse !Khaitsâb !nâ ūhe hâ i di tawan ge 835 gomana ge ǁamaxuhe. Nēs ge ge ǂguro !nā-i  Meatcos di 25 kurigu di sîsenǁaeb !nân ǁnātikō kai !gôab gomana ǀgui ǁaxasib tawa ge ǁamaxuhesa. Nē ǁaxasib khao!gân ge gomana 14 audogu ai !naohe tsî meatcos !kharaga !âgu ǁga ge !naobēhe.

ǂGari-aon ge !kharagagu !âga xu tsî Okakararas ǂnamipeba xu ûitsamaxūna gere ǂgâxa-ū, ǁnāpan ge Meatcos Ûitsamaxūn ǁAmas !Âb sîsenaona ǁaupexa hoa goman hîa ge ǁgomǁamaxus !aroma a hā-ūhena a ǁamase. Hoa!nâ-aixases ge taniǁkhāsib goman diba ǀgapi tsî ǂgaoǀkhāsa !harib ai ge hâ i, ǂgaokhādi tsî ǀnōb ân Direktorats ǀGoa !Oabas dis ai gere dīǀoaǀoase. Undamuje Hambiras Meatcos mîgowa-aos ge ra mî, nēti ī ǂgari-aon ǁamaxus tsēde ǂnûiǂgās ǀgaisa tsî gapi !harode ge sī!nâsa. Nēti ī tsēdi ain ge ǂgari-aona goman âna mîǁguisa !khaib ai ra ǀkhī-ū tsî !khais ai ǁkhāsib ai !gao!gaosa marisa ra !khō!oa. Meatcos ge nēti ī ǁîmāsens ǂgari-aon disa ra !gôa!gâ, nēs ra ǁgau sîsenǁareb meatcos tsî ǂgari-aon ǁaegu hâb ǀgapi !harode ra sī!nâ tsî ǀomkhâisa ra ǁgau amaga. Nēb ge a ǀgau ǂgari-aon ûitsamaxūn ǁamaǁamadi !aroma ra ǁgauǂuiheba, ǂgari-aon mātareo!nâse ra !khō!oasa. “ǁAmaxus tsēsa ǂoaǂamsa tsî !gâigâxa ǀgaub ai īǁkhā kais ge hoa !âǀhuru-aon ǁguiǂgāsensa ǂhâba hâ. Hoan ge !amkuse ge !gûǁnâ, ǁnāpan ge ǀgam ǁgoaǂuin ǀguina hâ ise, ǂgurose goma-i hîa ge ǂgaesaos ose hâ-i i tsî ǀgui ǂgari-ao-i hîa ǁamas ǂganǀgauba ge ǂhara-i tsîna,” tis ge Hambirasa ge mî. Hambiras ge Direktorats ǀGoa !Oabas dis, ǂgari-aon !nandi, ǁîs sîsenaon tsî ǁaerob ǀgaib ǀguiba sîsenni kara hâ ǁaeb air a !gaehe sîsenaon tsîn hoana koasa gere mā nēti ī buruburuxa tsēsa aiǂhomis !aroma. Meatcos proxrammi nēb ge hoaraga kurib ǁaeba noxopa nî ai!gû goma ǁamaxus ǀkha !kharagu !khaigu, tsēdi tsî ǁaegu ai. ǂGari-aon ge ra ǂganhe in !kharaga ǂhôaǂgaredi ai !gâ mâǁae tsî mâpa di sao ra ǁamaxude nî dīhesa.

LEAVE A REPLY

Please enter your comment!
Please enter your name here