Mutungi kwasigapo sirugana sokutunga nzira soyimaliva yokusika ko N$62 nomiliyuna

0
27

Aron Muhaukwa
Mpacha

Kampani vanakutumbura asi Candino Mining ntani zetungo ezi vapere sirugana asi ziwapayike kapare konodira kaMpaca momukunda gwaZambezi, kuna kumoneka ngesi asi kwasiga sirugana esi konyima tupu apa vamupa yimaliva yokusika konomiliyuna N$62 awo hena kapi vanama sirugana oso. Momvhura 2013, kampani ezi kwazipere sirugana oso, sokuwapukurura kapare kokutembera nodira, kakara asi sinano sokusika ko 17km kutunda modoropa, sirugana kwakere ngano somakwedi ntazimwe yiyo vasigwederera sikapwe ure womvhura. Nye kuna kara ngesi asi nomvhura ne dina kukapita sirugana simpe kapi sina pu.

Twahepa kuyizeresa asi esi kapisi yiso siruwo sokuhova, kapi kusiga yirugana yepangero yahana kupwa konyima nsene asi awo vana vafutu, nomiliyuna doyimaliva. Yina kumoneka asi nonzira dononzi ntani nosure kwapita melikwamo lyangoso, monokampani dokupira kuhuguvara. Kampani yiyo nye zatameka zigwanenemo mauwa, koyimaliva oyo vagwana yokusika ko N$62 zonomiliyuna. Ano apa nye ogu gokutara asi yirugana tayizi mouta wakora gakadingwireko, takamona asi sirugana vana rugana hawe kapisi somutaro, makura age yipo gatamekere kutulisapo mawapukururo, nye mawapukururo ogo kapi gagwene esikisomo kwaza pere. Age kwatunga tupu nye evango vana kutumbura asi pokuligwanekerera nodira, ntani pokuyimburwira yelike yiyo gatunga. Age kwaruganesa yininke yahana asi kunawapere, garawe ndi wayi yiyo yimwe garuganesa. Apa nye kakadigwire kapare kene, Ministeragona gougendero noyirugana James Sankwasa, age kahomokerere varugani womoministeli zendi, nokupura asi ngapi ngapi kampani ezi vazifuta yimaliva yokusika opo nye kwarugana yirugana yahana udumba. Nokuvapura asi epangero taligwanenemo uwa koyimaliva eyi lina kuruganesa? Eli kuna kara elimbururo nani hova kulimburura nsene vapurange muhoko gomosirongo esi. Ame kuna kugazara asi ntudi yinzi unene kapisi yoyoyo yimaliva oyo, yina kutanta asi epangero ngesi lyahepa kukapapara hena yimaliva yokusika ko nomiliyuna N$100 vayarugane sirugana sokulifana. Pausili kapi tatu vhuru kuza komeho ngesi, vamwe vetu vahepa kukara asi yina vatamba varete yimaliva eyi vafuta kokampani ezi. Ose natukayitara unene eyi tukatare asi yingapi nawa nawa varuganesa, kutunda yimbapira noyimbapira ntani tukagwane asi yinke vafutira ayo yirugana kapi yawapa. Apa nye kavamutanterere asi kampani ezi zasiga yirugana eyi Sankwasa kahandukire nye unene.

Nsene asi moomu muna kutanta asi kampani ezi zasigapo yirugana kapi nahara hena ngazikatengwireko, ozo yizo mbudi nina kumupa one muna kara apa. Twahepa kukunga uhwi wepangero, epangero kwaruganesa yimaliva eyi epuko, yimo ana kuhagesa ngoso age ana handuka.

LEAVE A REPLY

Please enter your comment!
Please enter your name here