Rukoro kuna mwena kuhamena ehagekeso lyendi siruwo gona

0
52

KUZEEKO TJITEMISA

Venduka-Advocate Vekuui Rukoro kuna mwena tupu kuhamena kweyi vamuhagekesa moyirugana siruwogona, nkera apa kavamupulire kuhamena ehagekeso omu gakara asi mukurona pamberewa koMeatco, nye age teete. Mokulimburura mapuro aga kagatundire kosayitunga zaNew Era, kuhamena sigongi esi kavakere naso konzugo zonene zepangero nkera omu kavakaliyongere yokuhamena edipago lyovaHerero noVanama, Rukoro age kakumbwilire tupu asi tara pevango eli, makura age kumwe nokutundapo. Munasipundi gwaMeatco Martha Namundjembo-Tilahun, sivike kasipwire katanterere sayitunga zaNew Era asi komitiye kwagusa etokoro omu vapa mukurona ogu gomberea zaMeatco aze mepwizumuko siruwo oso vana kukonakona. Rukoro ngesi kuna kara mepwizumuko lyomusininiko, yipo vandindire yitundwamo yomakonakono, morwa kukwama etokoro eli vatulirepo siruwo sakara asi sendi. Namundjembo Tilahun nage kapi kaziremo momunene atante asi yinke yene eyi, kumwe nokulimburura asi eyi kuna kara yawo simpe kapi yina wapere kuza momatwi govantu. Usili komitiye kazitokwere kutuma Rukoro aze mepwizumuko lyopamberewa yipo vatare asi ekona kono ngapi naligende, eyi yina kara asi apa ngesi kapi tanivhuru kukutantera Yuma morwa nayizonagwisa ekona kono yimo ngoso katente sivike sina puko, nokunkondopeka asi ehagekeso eli kapi lina kara asi napo lyange ame munasipundi. Ano mono mbudi edi nye ana kutuma Rukoro kupitira monofunguna kuna kutanta asi eyi kuna kara tupu yokumukwamakwama ngwendi yeeyi yahorokere mvhura zina puko.Awo kuna tokora kutumange mepwizumuko lyopamberewa asi vatulisepo ekonakono koyininke eyi yina kara asi ame kapi vanatanterenge asi ekonakono kupi lina hamene. Age katente asi eyi zna gusa komitiye kuna kara ponze zoveta, ntani age kapi nayisiga eyi gahana kuyirwanesa. Yimwe eyi nazuvhuko asi ame kwankondopeka asi Munekuto Katjomuise vahepa kumupa akare gumwe gompitakatji mokurandesa nongombe kwaMeatco, ano moyirugana yendi age kwaretesapo ezumbaneso lyoyimaliva kohi zoN$300, 000 yimo ngoso ana kutjanga Rukoro. Ame kapi nahamenenemo apa vapuragerere mugara ogo. Ame kapi namutura moyirugana, kapi gapitira mwange asi mugendesi kurona, ntani kapi gakere asi pepi nomberewa zange. Yimo ana kutjanga ngoso. Ekonokono panomahina varugana wo Ernest naYoung kapi yina kulikida asi ame ngomukurona nahamenamo mezumbaneso lyaKatjomuise ntani ame kapi nakere asi negave nonkondo kwankenye gumwe ntani nitantere muntu asi yinke navamurugana.

LEAVE A REPLY

Please enter your comment!
Please enter your name here