Natuvenye katuyukire kokavango zoupumezuva

0
48

Ezuva lyokudiworoka apa samagurukire sirongo natuvenye sinzi setu katukere modoropa zaRundu, aso kasikere silika somutaro ntani konyara nompitisili nadinye yipo kadi kakere. Omu kamumonekere Presidente gwetu gokuhova Sam Nujoma ntani mukwawo nye ogu gamukweme Hifikepunye Pohamba nage yipo kakere.

Ano vana hingire mosipundi kapa kere Hage G. Geingob Presidente nye ogu ana karamu ngesi ntani munona gwendi ndokotora Nickey Iyambo, nonompitisili nye dimwe ngoso rambangako novanguuru wonomukunda dokulisiga siga. Unene ava katu mwene kuna kara nguuru gwa Kavango zoutokero ntani nguuru kwaOtjozondjupa nogu gwaZambezi.
Ntani gwaOmaheke nage yipo kakere kavayalipakerere kwamukwawo nye gwaKavango zoupumezuva ogu ana kara asi yige mwenya mukunda.

Hawe kaikere silika somutaro, vantu kavapongere vamwe kuna kuronda pononzugo dakara pepi yipo vamone asi yinke yina kuhoroka ntani vakwayita vetu wosirongo kavalikidire eyi vadiva yokukuzuguma modira oyatembere pevhu.

Kasikere silika sovanona novakondi navenye pamwe tupu, nye mbunga zonene kapi toyipura asi moKavango ndi asi moRundu. Gumwe katupulire katente asi hawe kuna kumoneka asi yilika yangesi vayiture yikare monodoropa ndi monomukunda nadinye domoNamibia, omu vantu vayamone asi yinke ayi horoka ntani nomu ava yirugana.

Presidente ndokotora Hage Geingob, katente asi koveli vantu vamwe vana roroka kutunga mosirongo sompora, ngesi awo kuna kuvazanyauka mpora yiyo vana kuuyunga neyi neyi, age kalimbwilire kwava vatente asi ngano vantu vahawizako kosilika sangesi unene vaKavango. Nombudi dangesi kwakere mosayitunga omu vamwe vatente asi kapisi hepere kutulisapo silika awo vantu ruhepo nonzara. Nye eyi kapi kayilizire noyo kavauyungire vantu kavawizire ngwendi vava asi kwavatjida momambo gawo.

Simpe Presidente kahomokerere ava vana hara evhu lyozanyakurwawo, nokutanta asi hawe vakwetu ose kapi tuna kusilika, nye twadiva asi wolye vahova kutunga mosirongo esi ngombunga zaSWAPO, kwarwanena evhu nalinye kapisi asi lyoolyo vakere vakurona vetu.

Ose kuna hara evhu nalinye, morwa nsene tuninka asi lyozinyakurwetu hawe honde tazitjika morwa evhu yipo nye asi twahepa kuyitura momalikwamo gomawa. Age kayinkondopekere asi ruhepo poruli ntani yiyo panakarere asi nongendeseso dimwe vana hara kuretepo mokugusapo ruhepo.

Ngesi kuna karapo elikwamo lyowilling buyer willing seller, eli vana kugazara kukaligusapo morwa kapi lina kurugana moomu vayigazarere. Nye age kagenderere kuhundira asi ava vana kara nomagano vagatulisepo patjangwa makura ngavakagave kepongo lyenene tuna kundindira ngalikakarako lyevhu. Ano nsene asi awo kuna kuzogerera tupu ose ngatuza komeho nelikwamo lyevhu. Kapi yina kutanta asi nepu ono kara noudigu makura asi ose ano apa nopira kukara noudigu ame, twahepa kutunda momukaro gwangoso.

Ngesi kuna karako elikwamo lyokutara asi vantu vetu woruhepo vahepa kugwanennamo uwa, kapisi vaava vakara nare asi awo vagwanenamo uwa velike natu pa nkenye ezuva. Vantu kavakere vana hafa kuna kudana apo kapa kere ndilimani ntani nombunga dimwe nedi dokongereka ano simwe sokulipakerera marudi nagenye.

Nkenye gumwe ana kutundapo kuna kutanta asi silika somutaro kasikere. Nye usili kapisi nampo kuna kuuyunga tupu. Nomvhura dakapita vanasayitunga kwatjinge asi “ sea of people” vantu kavakere vana lituramo kapi vana kugwaneka monotende ndi asi vavahundire asi vawize mosira mwene kapi vana kuzuvha upyu nampili nakauke. Ogu kahagesere katente asi ngano ngorooro nye nomvhura nadinye ayikarako yininke yangesi, tomuhafa oku domudana owo vana kuyimona asi yidona hawe yivakarere yawo oyo. Ose tatuzi komeho nonompitisili detu.

LEAVE A REPLY

Please enter your comment!
Please enter your name here