Wolye venya evhu lyokokakuru- yimo ana kupura geingob

0
80
WINDHOEK, 14 February 2017 - President Hage Geingob. (Photo by: Joseph Nekaya) NAMPA

Presidente Hage Geingob, kuna kupura asi wolye venya evhu eli tuna kuhundira asi evhu lyetu lyovazinyakurwetu liwize. Moomu tupu vana kulipura vamwe vatungimo mosirongo, nsene tukasika nye pontambo asi tuguseni evhu ntani tutare asi wolye navavhura kuligusa. Morwa kukwama omu yina kumoneka nkenye gumwe kuna kuyipura oyo. Age hena kakandwirepo mukaro ndi mauuyungo gokutanta asi epangero kapi lyasikisamo egano lyokuliyonga kuhamena evhu lyokupinga lyozinakurwetu, kutunda tupu apa twagwana emanguruko, unene pepongo nye lyakereko lyokuhamena maliyongo gevhu mo 1991.

Geingob ogu kauyungisire vahameni wombunga zaSWAPO, momukunda Khomas, katente asi epangero kuna kara ngesi kapi lina kumona rupofu morwa kuna kutarurura asi yene eyi tuna kutumbura asi evhu lyoupingwa yinke naturuganako.

Evhu eli lyozinyakurwetu kapi lyakere asi zimwe sosiuyungwa ndi sagwene ehagero mepongo eli lyakereko mo1991, ndi asi kwalituliremo nawa nye epangero kapi lyakere asi liture matokoro ogo mosirugana, yimo ana kutanta mukurona gosirongo.

Ministeragona gwanare Bernadus Swartbooi yipo gatameke kuturapo mapongo gokulikwama, melikwamo asi evhu lyoupingwa  ndi asi lyokokakuru, ano age ngesi kuna kara nye gumwe ogu ana lituramo melikwamo eli lyokurwanesa elikwamo lyevhu vana kutumbura asi mbunga zava vapira evhu, unene lyokugwana kokakuru. Mbunga ezi kuna hara evhu valitengwideko kovaHerero, vaNama ntani vaduni. Sinkwa ntani gumwe gombunga ozo kavamupulire wosayitunga zaNew era,Henny Seibeb, asi evhu musinke vana tamba nawa nawa eli navahova kugwana, age katente asi vahepa kutameka momvhura 1884, omu yatamekere yita moAfrika ntani eguso evhu.

Age kakandwirepo matumburo gana kara asi vaduni yiwo vahova kugwana evhu eli,. Aw okapi vakere asi evhu nalinye lyawo, mosirongo nasinye. Geingob katente age asi kapi muna kara usili mokuuyunga kuhamena evhu lyokokakuru. Ose kuna hara owo vana handuka vatutantere asi morwa sinke vana handukire. Waha uyunga asi kapi twaliyonga yokuhamena evhu lyokokakuru,.  Ose kuna kupura asi yilye ogu nakara asi yige po mwenyalyo. Kuna kara sininke sosidigu esi, age katanterer vantu ava kavapongero monzugo zokupongera vantu kazuliremo.

Age yipo kavatanterere asi twarundurura maliyongo gokuhamena evhu mombongarero zanavenye, yipo asi tanko tugwane magano govantu asi awo ngapi vana kugazara.

Twahepa kuhingira makura simpe tutare asi yinke yokuvhura kurugana. Mosirongo soudemokoli vantu kapi ava zi moyita morwa udemokoli, kapi tatu run ye yita morwa udemokoli, yimo ana kutanta ngoso. Yilye nye navhura kupinga Venduka? Zene Venduka zalye po nye nawa-nawa? Azo zovaNamibia natuvenye. Vandovesi kwagusire evhu eli mo 1904, Epangero kapisi nyose twagusire evhu. Ano ngesi nyose nye ono kutangwisa ngwendi asi nyose twagusire evhu. Morwa sinke nye vana kutumbwira asi udemokoli epangero lyaNamibia nalyo kwagusa evhu eli, mwanayinye nye oyo mbunga zaSWAPO, azo kwarwanena umanguruki.Age kahundilire vaNamibia natuvenye turuganeni kumwe nokutara asi owo vana pili evhu kuvarugana ngapi. Epangero kunakugazara kukakara nepongo lyenene lyokuhamena evhu mokwedi kwaSitarara.

LEAVE A REPLY

Please enter your comment!
Please enter your name here