Geingob kahundilire nunw varugane mokutwikira mukumo ogu vakere nago

Geingob kahundilire nunw varugane mokutwikira mukumo ogu vakere nago

Presidente Hage G. Geingob, kahundilire mbunga zovarugani zonenepo mosirongo National Workers Union of Namibia varugane momunene yipo simpe vatwikire kugwana vantu wovanzi kukwama moomu zakere nare monomvhura pita, eyi nayivatera mbunga zaSWAPO ntani Epangero likare nononkondo.

Mbunga ezi zaNUNW, kwakara zina lipakerere kombunga zaSWAPO, ntani nazo kulihameseramo mwazene mokuhorowora nompitisili dombunga zaSWAPO, pepongo lyahurako. Geingob katumbwire nonkango edi paapa kakauyungisire mbunga zovarugani kazi kamudingwire konzugo zepangero.

Geingob katente asi age kazigidire nompitisili edi kepongo eli kalikakereko konyara novili ntatu. Mbunga ezi zovarugani kumoneka asi kwakara novahameni wokusika ko 290 000 vakara asi kufuta uhameni wawo. “ Pausili kapi muna kara nawa moomu twakere monomvhura dina dekondjero emanguruko; kuna kuna kukara noudwa ano nsene tomukara noudwa, mbunga zaSWAPO nazo udwa owo tauyazigumu, yimo ana kutantera ngoso Geingob mbunga ndi asi nompitisili dombunga ezi zovarugani. Nokuvahundira asi vahepa kuruganena kumwe nokutwara egano lyombunga ezi komeho moomu tupu valitamekere.



Geingob, ogu kakere asi kavakamundindilireko Presidentegona Nickey Iyambo, Ministera govarugani Erkki Nghimtina, Ministera gono mina Obeth Kandjoze, ntani navamwe ngoso vagavi magano, ntani age kageve nye asi yinke nawa-nawa yina kutanta elikwamo eli ana kutumbura asi “Harambee” neyi navarugana ngonompitisili asi kuna karerepo varugani. Harambee kuna kara asi egano lyokutjindja mparukiso zaNamibia paekonomi yipo asi apa ngatukasika mo 2020, kuna kumoneka namopeke. Koruha rwendi nye Ismael Kasuto, ogu ana kara asi presidente gwaNUNW, katente asi nombudi edi kadipwege monosayitunga kadigeve nombudi donondono unene kombunga zovarugani ntani kepangero nye eli lina kupitisira epangero lyombunga zaSWAPO, omu vatungimo mosirongo setu Namibia. Yimo ana kutanta Kasuto. Mbunga ezi zovarugani dogoro paapa ngesi nayina kuna lituramo melikwamo lyepangero mokupitira metumburo asi Haramberee, omu natuhorako ruhepo mosirongo nook vantu vetu.

Ose kuna kuhuguvara asi epango lyetu lyanayina nalikara asi limwe eli lina kutulisapo komitiye ezi nazikara nositambo omu natugwanekera nonominitera dokulisiga-siga, omu natuvhura kutara asi ngapi natugusapo udigu ou, una gumu unene varugani, yimo ana kutanta. Ksuto simpe kakere nepuro yipo agwane uzera kweyi vana kutumbura asi mutero gwahana asi pesininiko ntani eyi ana kuzuvha asi nomvhura dokukara muntu moyirugana kuna kudigurumwisa ditunde apa dakere po 55, ano ngesi varete nye po 50. Presidente katente asi nayinye oyo onotumbura kuna kara melikwamo mokupurako vantu.

“ Simpe kwato ogu ana tokora asi nomvhura dokukara moyirugana vadirete po 50, dogoro ngesi kwato eyi yina kara asi yina zi moyirugana. Ose simpe kuna kuyikona kona nayinye oyo” yimo ana kutanta Geingob.

Leave a Reply

Your email address will not be published.