MUSITA KATENTE ASI NOMBUDI DOKUHEHEDA EVHU KOMUCHINA KAPISI USILI.

0
13

Musita Josef Shikuma, ogu kakere sivike sina puko mosayitunga morwa nombudi asi age kwaheheda evhu lyendi eli lyakara asi lyonondima momukunda Omakuku, komuChina ngesi age ana bubuka nye nononkondo morwa nombudi dangesi edi ana kutanta asi kapi dina kara nousili ntani dina zonagura mukaro gwendi paeparu.Shikuma kakadingwire mberewa zosayitunga zaNew Era, konyima tupu apa vatulire esanseko eli mosayitunga, nokutanta asi evhu eli aga kwaligwana mo 1997, omu gatameka kulilima mo 2000.

Mafano ntani nayinye eyi yina kuhoroka mevango lina kavayifanekere kumwe nokuyitura poruzera, nomu kava fatwilire asi ngapi evhu omu vana kuliheheda kovanayirongo. Eyi kayininkisire Shikuma a handuke unene. Shikuma katente asi age kwatameka kulima ndi kuzangura mevango lina mo 2000, omu ngazangura yikwa ehidi, epungu nayimwe ngoso eyi ngarandesa kovantu yipo agwanemo yiwizamo. Ano mo 2004, age yipo nye galipakerere nomuntu ogu MuChina, varugane ngesefa ogu gakara asi kwadiva unene yonondima. Ogu ngesi gwauvali tuna kurugana nendi ngesefa, melipakerero, omu mukwawo nage muchina gatokwere kutunda mongesefa ezi nomvhura dakapita. Nampili ngomu asi age munangesefa ntani kwakara novaholi vendi vanangesefa woponze zosirongo age kapi gaheheda ndi arandese evhu eli moomu vana kuyiuyunga. Evhu eli kapisi lyomuChina nyame naligwana paveta ntani yiyo nadikapo embo lyange. Ame nina kara noumbangi ndi asi nombapira dina kutanta usili wevango eli. Ame kwato eyi nadiva yokurandesa evhu ndi kuliheheda komuChina. Shikuma ogu ana kara asi musita gongereka zaELCIN, Eheke, kakandwirepo nombudi asi varugani vendi kuvafuta nzambi zonsesu, nokugava asi age kufuta yimaliva yokusika ko N$1000 mokwedi ntani age kwakuta vantu wokusika ko 20, vaNamibia vagara novakadi. Yimo ngoso ana kugava mafatururo.

Shikuma simpe katwikilire nokutanta asi age kapi gagusa mema gomokanal pahana asi paveta, age kuruganesa mema googo gatura membo lyendi yigo atekeresa gahana kugwedako. Nkenye gumwe gopo mukunda gadiva embo lyange, ntani ngesefaa zange ezi anirugana kutunda mo2000. Nkara hena novanapolitika womomukda ava ava yadingura ngesefa zange vayatare asi ngapi nina kurugana, pausili nkenye gumwe gadiva asi yinke ayihoroka pevango lina. Nye pausili ngesi ngesefa kapi zina kara hena pevango eli zakere nare, morwa nampo yiyo nye yina kureta magano peke asi walye kwarandesa evhu. Yimo ngoso Shikuma ana kuhomokera hena New Era asi morwa sinke kavapilire kumupurako komeho vature esanseko eli mosayitunga. Mbudi ezi kazikere tava zitura monombudi dokulisigasiga ndi asi marupe mbudi dogoro gumwe go mbunga za AR, Job Amupanda, kabubukire nokutanta asi kapi navakayitarerera Shikuma arandese evhu. Shikuma katente asi nagumwe kagazarere kumugwana yipo nage agaveko uzera komeho vayitura monosayitunga, negano lyokuzonagwisa tupu Edina lyendi. Ngesefa ezi zelipakerero kumwe nogo muChina epangero kuna kuhundira vantu ngwendi vaNamibia valipakerere kumwe novanangesefa vakwawo, yimo ana kutanta Shikuma ogu ana kulimona mwene asi kuna kumuninkiliramo melikwamo eli.

LEAVE A REPLY

Please enter your comment!
Please enter your name here