Mitili mompanguro morwa kuna kumugazarera asi kwakwatera munona kononkondo

0
11

Mitili goposure vana kutumbura asi Peoples Primary School, moKatutura ogu ana kara ngesi asi kuna mutamba ekwatero kononkondo munonakadona gonomvhura 13, pokatji komakwedi May –naOctober mvhura zeezi, ngesi age kakamonekere mompanguro zaKatutura sivike seesi morwa egazarero asi kwakatera munona ogo kononkondo.

Apa nye mugazarerwa ogu Patrick Geingob, gonomvhura 34, kakamonekere monkondwa A, omu nkarapamwe kazikere asi kapi kavahere yokuzuvhira nye vahepa kuyayizuvha vene yipo nawo vadive asi yinke yina kuhoroka nomulina kara elikwamo lyompanguro ezi. Geingob kavamuhamatere sivike sina puko. Sayitunga zaNew Era kaziyigwene asi age kavamuzigidire kosasiyona zovaporosi oku kamuzigidire mukurona gwazo Inspector Ishmael Basson, ogu kakapuragerere mugazarerwa ogu kuhamena egazarero lyokukwatera kononkondo, ano konyima age yiyo nye kavamukwete. Mupanguli kapatanene asi Mugazarerwa ogu kapi ana wapere kumusiga akare ponze morwa kukwama oyo ana uyunga. Garth Joseph, mudivi gumwe gonoveta ana karerepo Geingob, kapisi simpe kuna kara umbangi wokuyukilira nye muntu gwendi yiyo vana mutokwere asi kwato kukara ponze. Paulus katente asi untu womuntu vahepa kuutara, yipo asi mugazarerwa ogu nage untu wendi vahepa kuutara. Age kahundilire asi sihorokwa esi vahepa kusipurakena mwa December 11. Geingob kavamutanterere asi gahepa kuturamo ehundiro moomu lina wapere. Mupanguli Hambeleleni Heita yige kakere tagendesa yipangura eyi. Geingob kakamonekere mompanguro konyara yivike yivali tupu yina pitipo omu mitili goposure zaAugustineum, kayimutembe asi kwadipanga vantu namubwedi moVenduka. Mitili gedina Ananias Kamati, gonomvhura 32, kwadogoroka mosipangero saKatututra, sivike sakapita. Kamati kwakere tavamuhakura morwa kunwa mema gobatili morwa yige yatembe yokudipaga vakadona ava, nage yipo gagazarere asi gahepa kulidipaga. Age pomuhowo kwamutulire moICU, vamuhakure konyima tavamutwara monkondwa peke. Murongi ogu arongo eraka lyoRuherero, kwamutembe edipago vakadona ava Jacqueline Panna Kuaseua murongwa gwendi namukurwendi Cesilia Kuaseua.

Jacqueline naKamati kuna kuyitanta asi kwakerepo eharo ano Kamati kwatameka nye kutekura Jaqueline apa gatokwere asi eharo lyawo lyahepa kuhaga. Marutu gava vavali ava kwavagwene moyihwa konyima zosure zaElim zakara morukanda moKhomasdal, poyiha yono vili 15h30, mwaOctober 9. Age kwamundindilire awize kompanguro mwaNovember 2, nye kwazirundwilire morwa simpe mosipangero ana kara. Jaqueline kwamutwire yikando yoyinzi monturo nomomutwe, namukurwendi nage kwakere noyirondo. Kamati kwasigapo eyi gatjenge nye nage kwakambadarere kulidipaga. Ano oyo gatjenge simpe kapi vayitanta asi yinke. Cesilia kwakwemeko mumbyendi kosure ezuva olyo lyehundi. Kamati kwahokwene funguna zaJaqueline konyima tupu apa gamene kutjanga makonakono.

LEAVE A REPLY

Please enter your comment!
Please enter your name here