NamPower Yatjita O Ndehuka Otjineya?

0
11

I Kae Matundu-Tjiparuro ONDEHUKA Ovature va Ndehuka kavena ohange kutja nandarire kutja orutjeno rukapitira motjirongo tjao mumuna ondanda yokehi royutjeno ovo pozonganda zao kavena orutjeno notjirongo tjazema indi nganda tjazemine. Umwe wovature votjirongo ihi mOkarukondua ka Tjombinde mOrukondua rwa Maheke, o Nanguiiwe Henguva, wonganda ape ozometa o 200 komurungu wondanda yorutjeno indji. Poye eye watuako okapanera kemwe korutjeno rweyuva keungurisa komarambe. Otja kuye o NamPower tjiyaningira ehi rokutunga po ondando yorutjeno indji yari kokutja tjazumba ovo motjirongo mavemunu orutjeno. Yarire ozombura ape mbari nai okuza ko 2006 ondanda indji tjiyatungwa posyo o NamPower yekeritua pehi, ovature kavena orutjeno otjirongo tjazema. Henguva matja nandarire moruvze romananeno wa Willy Hoveka otjorata yOkarukondua kOmatoororero, vatjita omaningiriro korutjeno nu ngamba kavetjiwa kutja omaningiriro wao yakazengirapi? Eye waraisa ounahepero worutjeno kokuterekera ko, kondjerera mondjuwo nawina okuramba ondorera monganda. Tjingetjo orutjeno omundu moyenene okuruungurisa okupomba nayo omeva nawina kozomahina zarwe tjimuna omahina yokunyosa ovitenda. “Orutjeno otjina ohepero kovature vokombanda tjimuna tjiruri ohepero kovatite vovihuro,” eye matja. Henguva mamunu kutja vatjitua otjineya okuraerwa kutja ngaveyandje ehi rao tjazumba vepewe orutjeno tjitjiri otjina tjitjihiyatjitua ngamba. “Ete tuatjitua otjineya,” wanunisa konduvasaneno ndjimatja yari oyo kotjinyo. Wakumwa kutja ongwaye ovo mberi motjirongo mumuna ondanda indji veri kuzema ngunda ovirongo vyarwe tjimuna oo Listera na Tjovazandu avina orutjeno. “Onganda imwe irimbena, yarwe iri mbee,” matja okuraisa oupopezu wonganda motjirongo ihi nondanda yorutjeno indji. Orata yOkarukondua, Mati Ndjoze, tjingetjo wakumwa puna ovature kutja ongwaye otjirongo ihi tjitjihina orutjeno nandarire indjo onganda ndjina ondanda yorutjeno indji ozometa o 200 kongotue yayo nyee nduu. Otja kuye o NamPower ipatana kutja pari omazuvasaneno ngasano ingo pokati kayo novature. Matja nandarire pena ovirongo tjiva vyozondarata zotumbo ndakondua kutja ongoze yorutjeno ikapitire po. Ozondarata inda zasewa nao ngamba no NamPower okuhina okuzetuna nandarire okutuapo omivero oyo yaya yekeritua pehi. Munao ozongombe zovatuta otjizehita momahi wovatuta varwe. Ndjoze matja mOkarukondua ke orutjeno ndueya ozoperesende o 0.01 movirongo vitatu uriri moresevate aihe mo Tjombinde, o Listera na Tjovazandu. Eye wina kena ongamburiro kutja orutjeno morukondua rwe okuriri maruya. “Ami orutjeno nongaro yomaunguriro muriri nai hina kumuna ko ombaera,” Ndjoze matja. Matja orutjeno runa otjituesa nu pupena orutjeno pena omekurisiro. Pupehina orutjeno tjingetjo kanaa pekara nomekurisiro. Matja orutjeno orunahepero kovina ovingi nandarire kozongetjefa ozonditi nawina komahakaeneno. John Kaimu wo NamPower matja owo kaveyamuna ouhatoi mbumaitja o NamPower yayanisa kutja maihaondjisa ovature imba korutjeno.