Edhingoloko Etiyali lyEtuntilo lyOpolio Oshiwike Tashi Ya

0
7

WINDHOEK Edhingoloko etiyali lyiikonga yetuntilo lyomukithi gopolio otali ka tameka oshiwike tashi ya mEtitatu. Aanona ayehe yomimvo okuza mboka inawu gwanitha omwedhi sigo oomwedhi 59 oshowo mboka woomvula 9 sigo oomwedhi 59 otawu ka mona omata gomokana gokukeelela omukithi gopolio okuza eti 30 Juli sigo esiku lyotango lyaAguste 2008. Aanona mboka wo ya hututha ompito yetuntilo lyotango ndyoka lya ningilwe okuza 24-26 Juni 2008 nayo aavali otaya kumikwa ya fale aanona ketuntilo lyedhingoloko ndika etiyali. Uuministeli wUundjolowele nIilonga yOnkalonawa yOshigwana otawu hokolola oshizemo shedhingoloko lyotango lyomatuntilo kutya olye shi pondola okugandja omata gopolio oshowo okugandja Ovitamine A pandondo lyoopelesenda 100. Amushanga Omukuluntu muuministeli mbuka, Kahijoro Kahuure ota ti omuyalu aguhe gwaanona ye li 285 265 okwa li ya tuntilwa nomata gopolito, omanga aanona ye li 239 692 kwa li ya mona ovitamine A. “Omatuntilo ga zi ko ge nasha nopolio nenge ovitamine A kago taga tsuwa omuthindo molwaashoka ompito ndjika oya kwatela mo mboka inaya monenena olweedhe okuthikwa kuyo, mwa kwatelwa oohanona dhoka opo dha pulumuthwa,” uuministeli tawu ti. Uuministeli otawu ti evudhomo lyomukithi gopolio nashi kale oshinakugwanihwa shomuntu kehe unene sho Namibia opo ashike a zi niiningwanima yomukithi gopolio oomvula mbali dha zi ko, nopethimbo ndika oku li ponkatu ya nika oshiponga okukwatwa natango komukithi nguka. Poshituthi shetseyitho pambelewa lyiikonga yetuntilo nuumvo, Ominista yUundjolowele, Dr. Richard Kamwi okwa tsu omuthindo opo aanona ayehe ye li kohi yoomvula ntano ya falwe komahala gomatuntilo opo ya ka tuntilwe opolio ndjika yi li omuthiki gwa nika oshiponga noonkondo, ngoka iititatu itatu yiihakanwa yomukithi nguka ye li aanona. Minista ta tsu omuthindo ta ti: “Aanona ayehe oya pumbwa ovitamine A omolwekoko nokumona ko nawa kwawo. Onkee osha simana noonkondo adhihe opo ya longitha ompito ndjika sho aanona oyendji taya ka adhika ye na omimvo dhetuntilo muule wethimbo efupi.” Minista okwa dhimbulukitha aavali kutya omukithi gopolio ohagu etitha uulema tawu kalelele oshowo omaludhi galwe guulema wokomalutu maantu oyendji mboka haya kwatwa komukithi nguka.