Maliyongo Gacod Kaganinkisire Vamwe Vadukemo

0
11

MoVenduka

Sigongi esi kavarongikidire pokatji konombunga mbali nadinye dombunga zimwe tupu zaCoD, kasikahege momudona morwa mbunga ezi zina kara asi zaNora Schimming Chase kavadukire aso sigongi sahana kupwa.

Schimming Chase naMoses Katjiuongwa kavadukiremo aso sigongi simpe kuna kutwima, eyi kuna kumoneka asi awo kava dukiremo morwa kapi vana kuligwa kumwe nombunga zaBen Ulenga kononkango domulyo.

Sigongi sangesi kuna kara sokuhova melima eli, omu Ulenga kagazarere asi vayaliyongeko yokuhamena yitundwamo yompanguro zonene,omu vatokwere asi CoD, zahepa kuzigida kongres momakwedi gatano.

Katjiuongwa katente asi awo kuna pwagamo morwa eyi yina kara pelikwamo kapi yina kara mulyo moomu kava yitokwere kompanguro zonene.

Ulenga kakere ngwendi gogu asi kapi ana kukwama etokoro lyompanguro, age kazigidire vantu ava vana kara asi awo ngano nokukarasi mepongo lyangoso nawo vawize.

Mukarelipo CoD, mombongarero zanavenye Kaveri Kavari nompitisili zovadinkantu vaCoD, Kalimbo Ipumbu, kavavahundililire vapwagemo mepongo lyangesi paapa Chase naKatjiuongua kava rwanesere ekaropo lyawo.

Katjiuongua katente asi Kavari kwatundamo mombunga ezi nomvhura mbali dina kukapita yinke mpamwe ana kuyaruganako kepongo lyangesi, ano ogu Ipumbu age kwamuhagekesa karuwo gona simpe udigu wendi awa sikamena ngapi nayakara mepongo eli. Ntani awo kapi kavaligwire asi yilye nawapayika kongres esi.

Katjiuongua age kuna kuyimona asi munasipundi ntani vantu ava vahorowora wonombunga edi mbali yiwo navarongikida epongo eli. Age katente asi mbunga ezi kuna karamo umbondo kapi tatuvhuru kurongikida kongres.

Ntani hena kapi tatu vhuru kugwana muntu ogu nakara asi age mugwanekedesi.

Nye nampili ngoso twahepa kugwana mugwanekedesi ana kugendesa kongres. Simwe esi kavapilire kuliza kumwe kuna kara asi yilye nakara Chief Whip mombongarero zanavenye.

Mbunga zaChase kuna kugazara asi morwa Chase vanamutengwidiremo gahepa kugusa evango lyendi.

Katjiuongua katente hena asi Rosa Namises ogu vakahorowere mokongres zokoKeetmanshoop,ezi vana kandurapo yige gapere Tsudao Gurirab evango olyo.

Moomu nye asi kongres zina vana zikandurapo nayinye eyi varugana vanayikandurapo.

Ano ava vaUlenga awo asi hawe matokoro ogo mulyo simpe morwa awo kwakwama yitundwamo yokongres zaKeetmanshoop.

Katjiuongua simpe tazikomeho asi vaava vakara mombongarero zanavenye velike wokuvhura kuhorowora Chief Whip, kapisi hamutjanga ntoni gombunga.

Kapi nye yina divikwa asi epongo lyokomitiye zepeguru navatwikira nosigongi sawo esi vagazarere kutura mokwedi kwa Siwogedi 2, ndi ngapi kukwamanye edukomo lyavamwe.

LEAVE A REPLY

Please enter your comment!
Please enter your name here