Presidente Mwanawasa Simpe Muzuni

0
12

MoSouth Africa

Nombudi doruguwo nare kadilihanenene mwaza sirongo edi kava geve vanyengi asi presidente gwaZambia Levy Mwanawasa ana dogoroka.Vantu ava kava pongere pevango limwe tupu vakanderere ava vana kumona kanyando mosirongo sina,kamu kere napresidente gwawo Thabo Mbeki kava tamekere epongo lina nelimweneneno asi tava fumadeke nakufa Mwanawasa.

Mbeki katanterere vantu ava kavakerepo vanambudi novaministera navamwe vakarelipo yirongo yawo asi age kuna gwana mbudi kwamukwawo zendi ogu arugana momberewa zaSADC,asi Mwanawasa ana dogoroka.Ano mukarelipo sirongo sina ndi asi saZambia kayipatanesere ndi asi kapatanene asi presidente gwetu kapi ana fu.Ano nombudi edi donofa kadilihene mwaza uzuni.Presidente Mwanawasa muzuni.Oyo yonomfa kapisi usili.Age kuna kugwana uhaku mosipangero somoFrance koruha rwina rorudona nsene asi muveli yiko ono kara.Departmente zawo zeyiyoponze zosirongo kazitente asi Mbeki kuna mupe nombudi dahana asi uhunga.Mukarelipo goDemocratic Alliance Sandra Botha nage kageve mbudi zoruguwo nye yiyo kagenderere hena kuhukamo asi mbudi ezi kapisi zouhunga.Ano kutunda nye opo yipo kava yimwene asi hawe mbudi zangesi twahazikwamasi.Ose kuna kuharera Mwanawasa averuke sinkwa ntani tupu.

Yimo ana kutanta Botha.Sayitunga zedina Star nazo kazigeve nomdudi dangesi asi Mwanawasa ana fu.Nombudi dawo unene dositenguko pepenuno lyokuhova kavatente asi Mwanawasa ana fu paapa mutjima gwendi guna hageke kurugana.Muuyungilipo epangero lyaZambia katente asi vanambudi womoSouth Afrika vahepa kulipora konombudi dahana usili.Age katente asi Mwanawasa muwaawa age hena kuna kumoneka nawa.Mbudi ezi kuna kutunda moSouth Africa nye ngesi nare uzuni naunye unagwaneke.Vahepa kuhageka kutanta yimpempa morwa kunakureta ruhodi kovatungimo moZambia.Ame ngomuuyungilipo epangero nyame nina kara nonombudi douhunga,kwato gopeke gokuvhura kuuyungirapo epangero lyetu.Apa nye kakumbwilire konombudi asi vakurona wovakwayita novaministera kavalizedililire mosigongi age katente asi oyo ngorooro ayi horoka kapisi nomfa.

Oyo kuhoroka mepangero lyetu yimo ana kutanta Mulongoti.Mwanawasa kava mudukisilire koFrance atunde koEgypt,mosiruwo oso kava kere nepongo lyonompitisili daAU.Nombudi kadizire nye mwaza uzuni asi Mwanawasa ana dogoroka ndi asi kadogorokere mouvali wapiti.KoWebsite nako yiko kayikere unene zo”WHO IS WHO”naWikipedia awo kava kere nombudi asi Mwanawasa ana fu nokugwedako mazuva gendi gehampuruko dogoro papa ana yadogoroka ngesi.Uzuni twahepa kuyidiva asi Mwanawasa presidente gwaZambia muzuni.

LEAVE A REPLY

Please enter your comment!
Please enter your name here