Aanangeshefa moNooli Oya Hala Okugamenwa

0
9

EENHANA

Oshigwana shaanangeshefa miitopolwa yomuumbangalantu woshilongo otayi indile Uuministeli wIipindi nOofambulika wu kwatelwe mo noku ya gamena kushoka taya ti “omathigathano kaa ge shi gopauyuuki naapunguli aakwiilongo” mboka taya dhipaga po oongeshefa dhawo oshowo uuntsa wawo moshimpungu shokungeshefa. Engungo enene lyaanangeshefa olya gongalele mOsoondaha pEenhana poshigongi nOminista yIipindi nIikwafambulika, Dr. Hage Geingob, mpoka ya holola omanyenyeto gawo shi nasha naanangeshefa aakwiilongo.

Omupresidende gwoNCCI, John Akapandi Endjala, okwa tseyithile ominista kutya aanangeshefa yomoshilongo kaye li pomuthika gwokuya methigathano lyopaunangeshefa omolwokaanuuthikepamwe kwopangeshefa. Endjala okwa tseyithile ishewe ominista kutya Oveta yOkupungula kwAakwiilongo oshowo iinima ya guma egandjo lyootendela oya pumbwa okutalululwa moompadhi oontalala. Ota ti aanangeshefa unene Aakiina ohaya taaguluka Oveta yUukalinawa. “Aantu mbaka ohaya lala nokutelekela moongeshefa dhawo, noye na wo uundjugo/uutoileta moongeshefa dhawo, ihe sigo oompaka inapu ningwa sha, ihe ngeno okwa li Omunamibia ha ningi ngawo ongeshefa ye otayi ka patwa kuMuni,” Endjala ta ti. Aanangeshefa oya lulilwa unene keindjipalo lyAakiina unene moshikondo shomatungo, nohaye ya naaniilonga yawo pehala lyokukuta miilonga Aanamibia mboka ye na ontseyo miilonga yokutunga.

Endjala okwiindile oshigwana shaanangeshefa shi hangane nokutula uukuni kumwe nelalakano okuya methigathano naapunguli aanene aakwiilongo. Okupitila mOshitayi shoNCCI moNooli, aanangeshefa oya gandja ombapila kuMinista ndjoka tayi popi kutya aanangeshefa yomoshilongo, unene mboka yoongeshefa oontshona nodhopokati oya taalelwa kethigathano lya kwata miiti naanangeshefa aazayizayi haya landitha miitopolwa moka taya vulu okungeshefa nuupu.

“Onkee otatu indile ominista yi talulule meendelelo okatendo okati-3 (4) mOveta yaNamibia yi nasha nOmapungulo gAakwiilongo opo ku yiwe moshipala oongeshefa dhaazayizayi kaa dhi kuthe ombinga megandjo lyomayakulo nenge elongo lyiipumbiwa yilwe mbyoka tayi vulu okugandjwa kaanangeshefa Aanamibia aashona naamboka yopokati. Epangelo li tule po ongamba yontumba yi nasha nootendela dhiilonga yomatungo negandjo lyomayakulo li gwedhelwe sigo N$30 million, naashika shi pewe ashike Aanangeshefa Aanamibia mboka aashona naamboka yopokati oshowo aagundjuka mboka kaye na iilonga ya tameke oongeshefa dhawo moshimpungu shika pakulongitha oshimaliwa shomumvo nguka.”

Aanangeshefa oya indile wo etalululo moshinima shelanditho alihe lyevi kaakwashigwana aakwiilongo oshowo pu ningwe oonkundathana dhopashigwana ku kundathanwe oshinima shevi nomapendulopo guuhupilo/emona moshilongo. Oshigongi shika andola oshi na okuningwa mewiliko lyOlaata yOpashigwana yoNCCI andola omanga Septemba 2008 ina pita.

Ominista oya taamba ko omaupyakadhi nomashongo ga taalela oshikondo shaanangeshefa aashona naamboka yopokati moNamibia, oku shi talela mokuhangana kwopaigwana pangeshefa nenge ano uunangeshefa wa manguluka, eshunitho pevi lyiifendela yokweeta sha moshilongo, iifendela oshowo embombolokelo lyaakwiilongo momangeshefelo gwomoshilongo. Geingob ota ti embombolokelo lyaanangeshefa Aakiina moshilongo olya lunda unene noli li elimbililo enene, nkene haya mono omauthemba/oopelemeta dhokulonga moshilongo. “Ngame otandi konakona oshinima shika.”

Kombinga yootendela, Geingob ota ti kape na omulandu gwootendela pethimbo ndika, onkee Ombelewa yOmuprimaminista oyi ipyakidhila okuvuta po omutungilo gwopaveta. Okwiindile aanangeshefa yomoshilongo ya tse unene omuthindo moshikondo shiikwafambulika -ano okulonga nelalakano lyokweeta po sha, pehala lyokungeshefa ashike iinima mbyoka ya longwa nale. “Amuhe omu hole ashike okulanditha iinima mbyoka ya longwa nale. Ongeshefa ndjika ihayi eta po oompito odhindji dhiilonga. Ohamu landa ashike nokulanditha, shika kashishi ongeshefa tayi vulu okweeta po oompito dhiilonga okukandula po omukundu gwokwaaniilonga. Kakele amuhe omwa hala ashike omukalo ngoka omupu, omolwashike itamu eta po oopulana dhiikwafambulika yokulonga iipumbiwanima yayooloka?” osho Geingob ta pula.

Geingob okwa tsu omuthindo oshinima shaantu ya tala ko Namibia oshilongo oshiyamba nonando omu na aakwashigwana oyendji aathigona. Kakele moNamibia omu na eyandjaganeko lyeliko/uuyamba lyaa li pauyuuki, shoka hashi tula oshilongo shika pondondo ya kitakana okuyeleka lela ponkatu mpoka shi li.

Okwa shilipaleke oshigwana shaanangeshefa kutya ombelewa ye oya egulukila oonkundathana sigo omukundu gwa kandulwa po, kakele ita ka thiminikwa i iyuthe komasiku ashike gwontumba molwaashoka ethimbo olya pumbiwa uuna taku kundathanwa oshinima.

SHARE
Previous articleCivics Shoots to the Top
Next articleNo End in Sight

LEAVE A REPLY

Please enter your comment!
Please enter your name here