O Swanu Yakurama Kongotue yOvanane

0
12

Omutjange wOngoramambo

OTJOMUISE

O Swanu mairwisa na kangamwa otjina tjiinatjo otjiposa tjitjahungamisiwa ovanane vayo, o Presidenda Usutuaije Maamberua, nOmutjangererpo Omunene, Onongo Tangeni Iijambo.

Maamberua na Iijambo Omandaha otjimaveya komurungu wokomiti omburatene yo Unama motjiposa tjao tjokutja otjovaungure vonganda indji kavesere okukara norupa orutue movitjitua vyovira vyoporotika otja komazeva wovaungure yo Unama. Mokukurama kongotue yovanane vayo o Swanu yazikamisire okomiti ndjimaihaamisiwa iyopresidenda yo Swanu onguru, Kuzeeko Kangueehi, nai nguri omuyandjandunge wina korutu orunanene rovyungura vyo Swanu okuza vyeyuva ngaa keyuva, o Politburo.

Okomiti indji ndjatjiikisirwe i Kangueehi pombongarero yozombuze Oritjatatu pomberoo yo Swanu mo Katutura, inotjiungura tjokuworonganisa ozomburo zokurwisa otjiposa ihi nawina okupaha oruvara. Oyo maitjiukwa otjo Komiti yOusemba wa Maamberua na Iijambo. Mongondjero indji o Swanu yapatururire otjikesa tjombaanga tjapeke porutavi orunene rOmbaanga ya Tjomuise ovazapamwe novatatjari mumaveyenene okuhitisa mo okamariva.

Onomora yotjikesa ihi o: 8001762758 no nomora yorutavi o:481927. Ena rotjikesa ihi o Swanu of Namibia.

O Swanu wina yatoko Opresidenda Ondenga ya Namibia, Sam Nujoma, otjomutize wo Unama, nawina o Ministera yOmahongero, Nangolo Mbumba, okuhita motjina ihi nozongari nokupa onganda indji ondunge yokwiisako otjiposa ihi. Maitja ndoovazu o Unama yataara otjiposa ihi okutja otjiwana atjihe ngatjizembe okuhungirira ku mbyatjama noporotika. Indji marire ombandjarero ko Namibia otjotjiwana otjimutanda. Nungwari ndoovazu Maamberua na Iijambo vataara otjiposa ihi, Ovanamibia avehe kutja veripi mavekara nombwiro mousemba wao otja tjiwakamburwa mongundeveta, mburi ousemba wokurihungirira. “Okuhungira owatjiri ihi katjiposa tja Maamberua poo Iijambo. Wina katjiposa tjo Swanu. Otjiposa tjotjiwana,” Kangueehi watjere.

Ngunda aperi nao ounepo utatu wokomiti yo Unama omburatene yotjiposa ihi kauna okukarapo otjiposa tjimatjiutu Omandaha. O New Era yakwamberwa ko kutja Onongo Louisa Mostert, Onongo Ray Auala nOmutengwa Fritz Nghiishililwa kavena kukarapo. Omuhungirirepo wo Unama, Utaara Hoveka, watjere Auala na Nghiishililwa vapita novyungura mehi ngunda Mostert aerinanununa komapu ngehina okutjiukwa. Ovo maveyarukirwapo iyOnongo Manfred Hinz, Onongo Marriane Zappen-Thomson nOmutengwa Jimmy Kwenani.

Ngunda aperi nao o New Era yazuu kutja umwe ohongora mo mahaameno inga unorupe notjira tjimwe otjipirure tjoporotika eye mari Omuworonganise watjo wOrukondua rwa Maheke ngunda aeungura mohoromende. Nai eye makuzu omuyandjandunge moveta wo presidenda yotjira ihi. Epuriro ndaingana okookutja hapo onawa omundu nguri motjito tjingetjo okupangura omukwao?

Motjito tje otjomuyandjandunge moveta kopresidenda yotjira otjipirure mapehee kutja utjangera nokuhungirira po otjira ihi morupanda, omunangendo umwe watja.

Maamberua na Iijambo wahungamwa nomarondora yane yevari ngetja vapenga omazeva wo Unama ngetjayera ovaungure kutja avehakara norupa orutue moporotika.

Ingo yarwe yevari mayetja ovo kaveyandjere ombakatui komaraa woviryu vivari vyonganda indji kutja ngaverinanununune movihavero vyoporotika muvazikwa.

LEAVE A REPLY

Please enter your comment!
Please enter your name here