Ntudi Karunga Gelike Yige Gokugusangemo – Mugabe

0
18

Harare

Presidente Robert Mugabe katente moutano asi ntudi Karunga yige gelike gokumugusamo momberewa. Mbunga mpatanesi kuna kumoneka asi kuvhura zitunde mokulihamesera zene momahoroworo asi morwa udigu ou una kuhoroka ngesi, mo sirongo sina, MDC kapi ngatu zipulisira zipangere sirongo esi. Yimo ana kutanta Robert Mugabe. Eyi kayiuyungire modoropa zauvali kutunda ko sitata za Zimbabwe, ava tumbura asi Bulawayo. Karunga gelike ogu gapange evango eli yige gokuvhura kugusangemo kapisi MDC ndi Britaniye. Mugabe kwapangera sirongo esi kutunda tupu apa samanguruka mo 1980, ano ngesi Morgan Tsvangari kuna mutamba nonkango domakuye asi age kuna kumuruganesa vakoloni vawo vatare asi ngano apangere.

Moutano, MoBulawayo Mugabe katente asi ose kapi ngatupulisira mahoroworo asi gatutengwide konyima ndi asi emanguruko lyetu lize momema, ezazu lyetu neyitwarwanena kapi tayihepa. MDC kuna kugazara kuzigida sigongi vayatare asi tava twikire kurumbasana ndi hawe. MDC kuna kutanta asi konyara vahameni vawo wokusika ko 70 kwavadipaga kutunda tupu mwa Nsinano. Yipo asi ose kapi tuna kumona asi vantu vafe tupu, nye ose asi mahoroworo. Muuyungilipo mbunga za MDC, Nelson Chamisa katente asi eyi kuna kulirwanesa, morwa MDC kuna kara pavali vamwe vanahara kuhamena momahoroworo ano vamwe kapi vana hara.

Kuhageka tayi moneka asi tuna gava efundo kwa Mugabe. Ogu ana kara noudigu noyirongo peke. Yirongo youtokero nonombunga dountu womuntu kuna kutanta asi mahoroworo aga kapi taga wapa morwa kuna karamo matjiliso ano Tsvangari age asi vakwayita kuna kutjilisa.

Vantu kuna kumona udigu ntani hena kuna kutumona asi ose kwato uuyungiro mosihorokwa esi somahoroworo. Yimo ana kutanta hamutjanga gono veta gombunga MDC, nokugwedako asi nampili ngoso vantu kuna kutanta asi twahahageke. Ano ogu goyimaliwa Roy Bennet katente age mo Johannesburg asi kwato mukaro gwagoso. Mugabe age asi MDC kapi tapangere siruwo esi nakara ame nimuzuni, mpitisili go MDC vamukwate, morwa yige ana kureta mapiyagana nagenye aga. Mukurona govaporosi mo Zimbabwe Augustine Chihuri katente asi MDC yiwo yina tamba nayinye eyi youmbonde noudigu mosirongo esi.

Morwa mahoroworo aga vana kara nago gana kuwiza mo 27 June 2008 vakwayita novaporosi navenye vahepa kurugana moomu vavhulira. Moutano, mpanguro kazinyokere kupwagesa hamutjanga ntoni gwa MDC Tendai Biti ogu zina tamba hayikota nsene asi yimo navayitokora.

Biti kwamukwata mo 12 June paapa tupu gakasikire moZimbabwe atunde mo South Africa. Kutunda opo aga kwa kara modorongo dogoro ngesi. Age kuna mutamba unzoni asi epangero yilyo lyazonagwire mahoroworo ntani asi Presidente Mugabe mugara ogu ana kuvera. – SAPA-AFP.

LEAVE A REPLY

Please enter your comment!
Please enter your name here