Namibia Ota Ka Mona Aalongisikola Aanigeria

0
6

WINDHOEK

Namibia ota ka mona aalongisikola aayiyambi ye li 60 okuza koNigeria ye nasha nokunongeka iilongwa ngaashi Uunongononi (Science), Omwaalu oshowo Uutekenika wOmauyelele (Information Technology), naalongi mbaka otaya ka tumwa unene koosikola dhokiitopolwa yokomikunda okuthika pehulilo lyomwedhi nguka.

Omupehaminista gwElongo, Dr. Becky Ndjoze-Ojo, ota ti aalongisikola 60 otaya ka longela koosikola dhokomikunda dhoka pethimbo ndika dha liwa oshipungo kaalongisikola Aanamibia, ano mboka kaye hole oku ka longela koosikola dhokomikunda.

Mokuyamukula komapulo okuza kiilyo yongundu dhompilameno mOmutumba gwOpashigwana mEtine lya zi ko, Ndjoze-Ojo ota ti omapopyo kutya Namibia ota ka mona aalongisikola 300 okuza koshilongo shoka shomuuninginino waAfrika, hasho ihe Namibia ota ka mona ashike aalongisikola aayiyambi ye li 60 mboka taya ka longa pakondalaka yoomvula mbali.

Omalongekidho ngaka oga ningwa pauvathano pokati kiilongo mbika iyali. Ndjoze-Ojo ota ti aalongisikola mbaka otaya ka futwa kepangelo lyaNigeria, ta gwedha po kutya Namibia okwa tegelelwa e ke ya sile oshimpwiyu shi nasha nomalukalwa oshowo iimaliwa yi nasha nuunamiti wawo shi ikwatelela kiinima yontumba mbyoka ya uthwa patsokumweuvathano.

‘Uuministeli wElongo owa tuma nale eindilo kOmukalelipo gwaNigeria shi nasha naayiyambi 60 opo ye ye okukwathela miimpungu yUunongononi, Omwaalu nUutekenika wOmauyelele nOmakwatathano paendondo dhoosekundosikola dhoka dhi li miitopolwa yokomikunda hoka Aanamibia mboka ye na omaunongo miilongwa yUunongononi nOmwaalu kaye hole oku ka longela,’ Ndjoze-Ojo ta ti.

Okwa gwedha po kutya aalongi Aanigeria mboka kwa tegelelwa ya thike pehulilo lyomwedhi nguka, ‘itaya ka kutha po nando omahala gaalongi Aanamibia, ihe otaya ka longela kumwe nAanamibia oku ya kwatha ya nkondopaleke elongo lyawo shi nasha niilongwa mbyoka.’ Namibia ota kondjo nompumbwe onene yaalongisikola mboka ya pyokoka miilongwa yUunongononi nOmwaalu.

Oshilongo osha kala shi ikwatelela kaalongi okuza kiilongo yopuushiinda ngaashi South Africa naZimbabwe. Namibia pethimbo ndika oku na etsokumweuthano naZimbabwe okutuma aanona mboka opo ya piti ondondo ontimulongo nambali haya dheulwa koZimbabawe uule woomvula ndatu.

Ndjoze-Ojo ota ti ope na natango omuyalu ogundji gwaalongisikola Aanamibia mboka kaye na iilonga oshoka kaye na ehalo okuninga omaindilo oku ka longela koosikola dhoka dhi li komahala gokokule oshowo oosikola dhokomikunda. ‘Uuministeli onkee owa thiminikwa okukuta miilonga aantu mboka ashike ye na oGrade 12 opo ya longe aanasikola,’ Ndjoze-Ojo ta ti.

Okwiindile aalongisikola mboka kaye na iilonga opo ya ye koombelewa dhelongo miitopolwa yawo, opo ya vule okumonenwa omahala poosikola kehe ngele pwa monika oompito.

LEAVE A REPLY

Please enter your comment!
Please enter your name here