Ovatuta va Maheke Kavevanga o Agra?

0
11

I Desie Heita

OTJOMUISE

O Agra orutu nduhavangwa tjinene iyovatuta momahi wa kangamwa koutjiro wehi. Okuhina okuvangwa ingwi otjina o Agra oini tjiyayendekera nu mwiina ongondjero yomasa okutjituna kuna ovatuta imba.

Otjina ihi tjauta katjisupi okuza momaunguriro omape wo Agra ngwiitja omondero yovatuta namaodnero yayo oini. Ovatuta munda imbo wawo otjina ihi vetjimuna omwano warwe nganda averaere o Agra kutja ngairipitise muwo navetuapo onganda yarwe yozovandisa. Tjitjituara kepembe kotjii otjina ihi tjapendura orunywaa rovitjitua peke peke, otuwondja totutuu, ozombongarero nozombongarero pokati ko Agra novatuta. O Agra yaryama komurungu naitjanga ozombapira ko nokuhakaena kuna ehika rovatuta indi o Namibia National Farmers Union (NNFU) okuhandjaura kutja oyo kaina indu yavanga okuyandisa ozovandisa posyo yavanga ongaro ombwe. O NNFU yaisana ombongarero yozombuze kombunda ya nao puyaraisa ongendo yayo ohunga nondumbo ombi o Agra mbwiitumba ovatuta mOmaheke mokuyandisa ozovandisa. O Presidenda yo NNFU, Pinthile Davids, waraera ozonganda zozombuze kutja otjikaro tjo Agra ihi katjizerwa nanizikiza kutja ozovandisa zekotoke tjimanga. Ombuze indji yatoka ovyuru vyo Agra okupitisa omambo mozongoramambo okuriyeura komambo wo NNFU.

Otjiveke ihi otutu atuyevari itui tuari amatuso okuhakaena okuvyavangasana kutja nani matuwanene pi. Omunane wOkombanda wo Agra, Pieter Hugo, watja o Agra kaina puyatjere maikuramisa ozovandisa momahi wa kangamwa mOmaheke. Nungwari tjiyatjita okuningira ovatuta okuripurira kozovandisa zovimawinyo vyotjivaro tjimatjingara pendje nainda zovinamwinyo mbihina otjivarero. “Okusembamisa ovandisa yovinamwinyo mbiri kehi yo 200 oruroto rooma, ondiru tjinene nu ovarande ovengi kanaa vezeri okukara povandisa indji tjinga avehina ongamburiro kutja mavenana ovinamwinyo vyondjita povandisa onditi nao,” Hugo watjere. Tjingetjo o Agra wina yaningira ovatuta okuripurira komyano vyarwe vyomasutasaneno pendje nokuryanga notjimariva otjinene tjitjitua ovatuta nawina o Agra moumba wourunga nomapundiro. Posyo Oloff Munjanu Otjiuru Otjipitise tjo NNFU matja tjiva yomapu inga kaina ozongunde kuyakuramene. Wina watemwa nondira ndjahara ovarande okutjinda otjimariva napura kutja ongwaye otjiwana tjovatuta tjitjasere okutomba ehupo ratjo otjini nourunga? O Agra yakurama imbo pokutja ondero yayo yari okuyeta ondanaukiro osemba nokuhina otjineya. “Ete turi pozovandisa, ovinamwinyo otja tjimaturandisa kotjimariva otjingi otjinga matuungura okomisi onyingi. Ongwaye tjatjatuvanga okuranda ovinamwinyo pozoparamita? Ongwaye tjatjatuvanga okuranda ovinamwinyo koprysa yokehi kehi? Ihi katjizuvakwa kaparukaze, Ellis Mbuende, Omuungure wOvinamwinyo momahi wa kangamwa nowombirivate mOmaheke watjere nao.

Eye yuumwe wovaungure vevari uriri morukondua indui. O Agra wina ikumininwa mokuungurisa ovarande vopokati mberanda ovinamwinyo koprysa yokehi kovatuta vomahi wa kangamwa tjazumba avekezerandisa kwarwe koprysa yokombanda.

“Ete katuungurisa ovahitakati. Ovahitakati mbekara pozovandisa zetu wina veranda ongarate okuza kovatuta nuvetjita nao kuwo veni kaverandere o Agra.

Kaveungura po Agra nu tjingetjo kavena orupe no Agra. Ngahino ovatuta tjimavevemunu pozovandisa zetu venangwarasi ovo Agra. Owatjiri okookutja ovo ovarande vetu mbutunanga okuyekuranda pozovandisa zetu,” Hugo watja.

LEAVE A REPLY

Please enter your comment!
Please enter your name here