Etoto lyIiyagaya pOthingo Olya Nika Oshiponga kUundjolowele

0
16

OSHAKATI

Iiyagaya hayi zi mOshakati nokuumbilwa petoto pomukunda Othingo muuninginino wondoolopa ndjika oya nika oshiponga kuukalinawa waakalimo yomolukanda oshowo omukunda ngoka. Aakalimo yomolukanda mboka ye li popepi netoto ndika olundji ohaya yi ketoto hoka nelalakano okutoola iikulya nomakende, oondooha oshowo iipumbiwanima yilwe mbyoka haya ka landitha. Aantu 30 lwaampoka unene aakiintu yamwe ye na uuhanona wu li moondhikwa ohaya meneka ongula onene okuya ketoto hoka oku ka konga iilongitho mbyoka ya longa nale nohaya adha miiyagaya yaa na iikutu nenge omizalo dhokwiigamena. Omathimbo ga zi ko omutoolinkundana goshifo shika okwe ya adha taya hadha metoto ye li oompadhi dhowala, yamwe oya londa keloli lyiiyagaya ta li ende opo ya vule okutoola iinima mbyoka tayi vulu ishewe okulongithwa. Aakiintu ohaya toola nokugongela omakende ngoka haya ka landitha kehangano lyokututa iiyagaya Move-A-Mess mOshakati.

Otaya ti okuza momumvo 1995, ehangano ndyoka olye ya uvanekela iikutu yiilonga/omakalaganya ihe sigo okeluwa ndika inali ninga po sha. ‘Ohatu gongele omakende, tatu ga tatula nokulanditha koMove-A-Mess.

Oshiwike kehe eloli ohali ya noku tu futa N$50 motona yimwe omwedhi kehe.

Ngele owa longa nuudhiginini, oto vulu okuudha ooshako ndatu,’ osho omukulupe omukulukadhi ngoka ha toola nokugongela omakende uule womimvo heyali petoto mpoka ta ti. Kakele kokulanditha omakende ga tatulwa, aantu mboka haya hupu metoto mpoka ohaya landitha wo oondooha kehangano limwe lyomoshitopolwa ndyoka hali ya futu N$5 mokilograma yoondooha. ‘Iimaliwa mbyoka hatu mono ohayi tu kwatha okupalutha omagumbo getu nokufuta osikola yaanona yetu,’ omukulupe ta yelitha.

Omukuluntuwiliki gwehangano lyedhina Move-A-Mess moNooli, Willem Coetzee okwiipatana kutya ehangano lyawo olya uvanekela iikutu yegameno aantu mboka haya longo nokugongela iikwaiyagaya petoto mpoka. ‘Tse ohatu landa ko ashike omakende ga nyanyulwa kaakulukadhi mboka noye na okwiimonena yoyene iikutu yegameno,’ Coetzee ta ti. Coetzee okwe shi koleka wo kutya ehangano lyawo ohali futu N$50 motona yimwe.

Omunambelewa guundjolowele muMuni gwaShakati, Theopoline Kakololo, ota ti ombelewa yawo oya tseya onkalo yaantu mboka ya hadhahadha miiyagaya.

Okwe ya pa omayele opo andola ya kale haya zala omizalo dhokwiigamena, ihe omayele ge kaantu mbaka oga hulile momakutsi ga thita shi nasha nuupyakadhi tawu vulu okuza mokukala kwawo aluhe mokati kiiyagaya petoto mpoka.

Aakalimo yamwe yomomukunda Othingo oya kundaneke oshifo shika kutya otaya mono iihuna kolwithi oluluudhe halu zi metoto ndika lyaMuni.

‘Molwaashoka ashike tse aathigona, otatu thiminikwa okulumba monkalo yezimba edhigu tali zi miiyagaya yometoto ndika. Elelo lyondoolopa kali na ko nasha naakalimo yomomukunda nguka,’ osho omusamane gumwe ta popi a geya noonkondo, ngoka egumbo lye li li popepi netoto.

Aanamukunda ohaya nyenyeta wo kombinga yoongombe dhawo hadhi si molwaashoka hadhi li ooplastika dhoka hadhi pepwa kombepo nokuhalakana moshitopolwa mpoka hapu napa iimuna yawo. Omanyenyeto oga kala nokuhololwa kaanamukunda okuza konyala momumvo 2002 ihe inapu ningwa sha sigo okonena. Uupyakadhi uunene owo mboka kutya iimbondi ayihe mbyoka hayi zi mondoolopa ohayi umbilwa petoto mpoka, nangele tayi fikwa olwithi oluluudhe ohalu pwipwike nokugwilila po omukunda aguhe, shoka hashi etitha mpoka aanamukunda oyendji ya tameke okukolola omolwolwithi olundji.

Aanamukunda oya hala Elelo lyOndoolopa yaShakati li lundulule po etoto mpoka oshoka olya nika oshiponga noonkondo kuundjolowele wawo.

Kakololo ota ti elelo olya ningile oshigongi naakalimo momumvo 2005, tali yelitha kutya omukunda Othingo ogwa ningwa ehala lyiimbondi moongamba dhondoolopa yaShakati, onkee aakalimo yomomukunda ngoka oye na okuthiga po ashike omukunda. ‘Elelo lyondoolopa olya yelithila aanamukunda kutya lyo oli ilongekidha okufutila mboka ye na ehalo okutembudhilwa komahala galwe, kakele aantu ashike aashona yowala oyo ya tembuka.

Aanamukunda yakwawo oya dhika oonyala mevi inaya hala okuza mo momapya gawo,’ Kakololo ta yelitha. Etoto mpoka hapu umbilwa iiyagaya yaakalimo 42 000 oli na ashike ondhalate kombinga yimwe. Pauyelele womunambelewa guundjolowele, etoto okwa li na omuyelo, kakele ogwa tetwa ko kaagongeli yiiyagaya opo ya vule nawa okuya meni. ‘Oshikando shimwe otwa kuthile opolisi opo andola yi tu kwathe okukeelela aantu mboka kaya ye mo metoto, ihe shika inashi kwatha sha – oshoka yamwe oya kala nokwiiyakela mo uusiku,’ omunambelewa guukalinawa ta ti. Aantu okwa li wo ya endithwa po nokundungikwa koshikondo shuundjolowele melelo lyondoolopa kombinga yomaupyakadhi haga vulu okuza mokuhadha miiyagaya, Kakololo ta ti.

LEAVE A REPLY

Please enter your comment!
Please enter your name here