Omiyalu Dhomaikuthomwenyo moNamibia Otadhi Limbilike

0
10

WINDHOEK

Aantu oyendji kaye hole okusa paiyambo, ihe natango aantu oyendji yendji unene aagundjuka otayi idhipaga moNamibia. Namibia oku na omuyalu gweidhipago gwa londa pombanda noonkondo noku li pondondo ontimulongo meikuthomwenyo muuyuni pamayalulo gwomumvo 2003, pauyelele womapekapeko ga ningwa paumwene kuNdohotola Shaun Whittaker. Lithuania oku na omuyalu gweidhipago gwa shiga ko, taku landula Russia. Dr. Whittaker ngoka e li omunawino moshimpungu shehungomwenyo, oku na eitaalo kutya eidhipago otali londo konyala esiku kehe pakutala komishangwahokololo hadhi gandjwa kOpolisi shi nasha neikuthomwenyo lyaantu. ‘Moompito odhindji, eindjipalo lyeidhipago otali etithwa koonkalo dhopankalathano nopaliko moNamibia. Kakele Namibia okwa talika ko oshigwana oshihahu noonkondo sha za mondjokonona yomaihumbato gopakwaita pethimbo lyuukoloni moshilongo,’ Dr. Whittaker ta ti.

Omatompelo ogendji haga etitha omaidhipago ogendji otaku tiwa onkalo yokwaaniilonga nelongithonayi lyiikolitha. Oshikwawo hashi popiwa shi li osheetithi sheikuthomwenyo osho okukala omuntu inaa hokana/nwa, ano e li oye awike. Namibia oku li shimwe shomiilongo mbyoka yi na omuyalu ogundji noonkondo gwaantu kaye na iilonga muuyuni, ano oopelesenda dhaakwashigwana ya konda 36 kaye na etemo, nokombanda yaashika, oshititatu shimwe shaaniilonga moNamibia oshi li ashike miilonga yopambelewa. ‘Ondi wete kutya otu li lela monkalo ya nika oshiponga, nope na okuningwa sha. Ope na lela ekwatathano pokati konkalo yokwaaniilonga neidhipago.’

Dr. Whittaker ota ti okukala omuntu oye awike inaa hokana/nwa, omuselekadhi/omusilwalume nenge okuhengathana oku na mo okanyala moshinima sheidhipago, molwaashoka aantu oya kanitha omukalo gwuulipamwe wefamili, eyambidhidhathano nosho tuu.

Okwa holola wo kutya eindjipalo lyeidhipago ohali ningwa olundji ngele omuntu okwa longitha iikolitha, ano ethimbo ndyoka aantu haya kala ye na lela omukumo okuninga iinima mbyoka itashi vulika ye yi ninge ngele inaya kolwa. Aagundjuka aalumentu yomimvo dhopokati 20 sigo 29, oyo unene hayi idhipaga. Omugundjuka ngoka omushona lela noonkondo ngoka idhipaga moshilongo okwa li noomvula 11, omanga omukulupe gwomutoko ngoka idhipaga okwa li noomvula 93. Oopelesenda 27 dhaamboka yi idhipaga okwa li ye na omikithi dhaa na epango ngaashi okankela noHIV/AIDS, oopelesendda 24 oya li oonkwatwa dhopapolotika, oopelesenda 19 okwa li ye na omikidhi dhopamadhiladhilo, omanga oopelesenda 18 dhaantu mboka yi idhipaga ya li aakwiita yaNamibia. Whittaker oku na eitaalo kutya iiponga yomaidhipago ge nasha noHIV/AIDS oya shuna pevi omolwepango lyokulelepeka oonkalamwenyo dhaamboka ye na omukithi nguka.

Shi nasha neidhipago mokati kaakwiita oshowo mboka ya li nale oonkwatwa dhopapolotika, Whittaker ota ti inapu ningwa oshindji okuungaunga nealudho lyopamadhiladhilo nenge ekwatelomo lyoonakulwa aakulu ya vule okulumba onkalamwenyo yopashigwana konima yiita. Aakuthimbinga yamwe poshigongi otaya ti okugandja ashike iimaliwa koonakulwa aakulu yoPlan hasho eyamukulo komaupyakadhi ngoka ya taalela, oshoka oyendji natango otaya hepekwa pamadhiladhilo kiiningwanima ya tsakaneka pethimbo lyiita.

Otaku hokololwa kutya, aakiintu oyo unene haya ningi oonkambadhala dhokwiidhipaga pakuyeleka naalumentu, kakele oyendji yomuyo ihaye shi pondola okwiidhipaga. ‘Aalumentu ohaya longitha omikalo dhoka omidhigu – ano dhoka ihadhi hututha omwenyo, ngaashi okwiimangeleka nokwiiyaha.

Aakiintu ohaya longitha unene okunwa oopela odhindji nenge okwiitulila omiti dhuuzigo miikulya nenge okwiiteta miishiya. Aalumentu ohaya si unene koonkambadhala dhomaikuthomwenyo,’ Whittaker ta ti pethimbo ta popitha oshigongi shomasiku gatatu mOvenduka. Whittaker ota ti osha simana okundungika oshigwana shi vule okukoneka omandhindhiliko gwopetameko opo ku gamenwe oomwenyo dhaakwashigwana. Omandhindhiliko gwopetameko oga talika ko ga nika oshiponga komaidhipago, ngaashi onkambadhala yotango yokwiidhipaga, ekanitho lyomuholike/omukwanezimo a sa, ya hengathana nenge ya ethathana.

Iiyetithi yilwe tayi popiwa oyo omakuyunguto hage ya momagumbo/omafamili ngaashi okwaaniilonga, omikithi dhaa na epango, etembuko, ehengathano, uupyakadhi mokukotha, omikalo dhokulya dha lunduluka oshowo uuyogoki womuntu paumwene.

LEAVE A REPLY

Please enter your comment!
Please enter your name here