Vamwe Vana Gwana Mavango Gawo, Vamwe Hawe

0
13

MoVenduka

Mukurona godoropa za Tsumeb, Grootfontein nogu gwa Nkurenkuru kava gwene mavango gawo.

Ano doropa za Rundu azo kazihorowere mukurona godoropa za Rundu, age yige Joseph Mukoya. Ano gwa Tsumeb Engel Nawatiseb, gwa Grootfontein Rapama Kamehozu ntani gwa Nkurenkuru Heikki Hausiku kava vatengwidiliremo ntani vanasipundi wonondango dawo nawo kava vatengwidiliremo, mo Tsumeb ava vana kara mokomitiye zegendeso kuna karamo Linekela Shetekela, Mathias Sipunga na Daniel Nashidengo ano siruwo oso Reiner van Zyl na Rodney Francois kuna kara tupu yilyo. Awo kava tambwire yirugana eyi moMandaha gana puko.

Kamehozu simpe kava mupere hena ukurona modoropa za Grootfontein nomunona gwendi nage kava mutengwidiliremo. Ano vagendesi nawo kavavatengwidiliremo. Mo Rundu Hilka Leevi yige, kavapere munona gwa meya, Kudumo Christophorus munasipundi gokomitiye zengendeso na Sabina Mufenda munona gwendi, ano Victoria Kauma na Gosbert Sikerete vana karanye ngesi yilyo.

Mowo ntambali va vakansela va Rundu ntazimwe va SWAPO ano gumwe tupu gwa CoD Celestinus Shikerete. MoNkurenkuru mwato malisinto nampili gongandi. Mowo ntambali gumwe gwa RP ano ava navenye va SWAPO.

Va Nkurenkuru kava hundilire ministeli zo nodoropa asi vagenderere kumana kutunga mberewa zawo. Morwa awo ngesi kava kara tupu mevango lyongereka lina pilira kuwapera. Mberewa zawo kuna kara zomukosa gonomiliyuna N$ 2.7 omu vagazarera asi mberewa ezi tazipu mwa Murongagona mvhura zeezi. Udigu ou vana kumona ngesi epiro yirugana movadinkantu ntani epiro yimaliwa yekuliko.

Nawatiseb age katente asi ekondjero emanguruko kapi tava liuuyunga lyelike vahana kutumburamo varugani. Age yiyo kahundilire vatungimo modoropa za Tsumeb guvadame yipo vaze komeho nekuliko. Ose ngesi kuna kuuyunga ekuliko. Mokuninka asi nayinye yize mouta wakora twahepa kuhameseramo navenye.

LEAVE A REPLY

Please enter your comment!
Please enter your name here