Ondhila Yoludhi lwoCessnaa Ya Mona Ishewe Oshiponga mOvenduka

0
12

WINDHOEK

Ondhila ontshona yoludhi lwoCessna 210 yoindjina yimwe oya gu mo mombanda muumbugantu woshitopolwa shiikwafambulika mOvenduka metitano ongula, nomwa ehamekelwa aantu yatano.

Omukuluntuwiliki e nasha nomakonakono giiponga yoondhila mUuministeli wIilonga nOndalasipota, Erickson Nengola, okwa kundaneke oNampa pehala lyoshiponga popepi nOkapale kuudhano koTransNamib kutya okadhila hoka oka gu mo mombanda potundi 08H55 konima ashike sho ka tuka okuza pokapale koondhila poEros noka li mondjila ka thinda koMokuti Lodge popepi nEtosha National Park. “Opwa li ongodhi yonkundana ombwinayi okuza komuhingi gwondhila pamakwatathano gOshungo yOkapale koondhila kaEros. Omuhingindhila okwa li ta ti okwa kanitha okondolola lyokandhila nokwa tokola okukonga ehala mpoka ta vulu okukankeka okandhila,” Nengola ta ti.

Okwa ti aantu mboka ya li mokandhila oya kwatela mo omuhingi oshowo aafaalelwa yane, kakele ina tseya uukwashilongo wawo oshowo elalakano lyolweendo lwawo okuya koMokuti Lodge. Kape na omuntu a sila moshiponga shika naantu ayehe mboka ya li mokandhila kokufelefula aapashiyoni kehangano lyedhina Scenic Tours otaku tiwa oya mono ashike iikwalumuna wokapulukelume.

Shika oshikando oshitiyali okandhila koludhi lwoCessna 210 taka mono oshiponga mOvenduka nuumvo. Momasiku 11 Januali, aanangeshefa yatano Aaisraeli pamwe nomuhingindhila Omunamibia oya si konima sho okandhila kehangano lyoAtlantic Aviation ka gu mo mombanda nokwiidhenga megumbo limwe molukanda Olympia mOvenduka. Okandhila hoka nako oka li molweendo ka thinda koMokuti Lodge. Omadhina gaantu mboka ya li moshiponga shika oshitalala inaga tseyithwa natango, noshikondo shomatuko goondhila otashi ti otashi ka tameka mbala nomakonakono ge nasha noshiponga shoka.

LEAVE A REPLY

Please enter your comment!
Please enter your name here