Fish Farm moHardap

0
14

MOMARIENTAL

Kampani ezi vana kutumbura asi ECHO Fish Farm moHardap, kuna hara kugwederera mema gazo gotilapia yipo asi ntani vagwana marandesero moyirongo ngwendi Angola,Botswana,South Afrika, Zimbabwe naZambia,oku vana hara unene nomfi dina dokuninka asi ntani dina kuzauka momema.Apa zatamekere kampani ezi nomfi vana kutumbura asi tilapia unene domoMozambiqueyido delike hambara ngava zangura,ano nomfi edi vana kutumbura asi Carp noCat kuna kudilya unene vantu ntani hena kuna kudizangura.

Konyara nomvhura dakapita awo kuna kuzangura notona.Pwaneina ngesi nomfi odo kuna kudiranda vantu ntani awo kuna kuranda notona dina siki ko8 no 10 ngoso awo kuna kugwanamo yiwizamo yina siki konotona 20.Mugendesikurona pamberewa Fritz Nasilowski,katente asi udigu worutjeno yiso simwe vana kumona morwa nomvhura edi dapita awo kugwana tupu rutjeno runa siki ko1.1kilo watts.Awo vahepa rutjeno yipo vakare nomema aga navaruganesa ntani vene vahepa kulikuhwa.Posiruwo nye esi tuna kara ngesi twahepa tupu kugwederera evango eli nampili ngomu asi udigu worutjeno runa tugumu,nye ose tuna hara hena mema.Ose simpe kampani gona yimo ana kutanata ngoso mugendesi gwawo.Nomfi edi nsene dikara momema gangoso kukura usimbu yivhulise asi momema gahana udumba.Mokuninka asi nomfi detu dikure ado hena diwape twahepa kugwana mema aga gana kupitira morutjeno.

Vantu womosirongo esi nawo kuna hara nomfi yipo asi kuvhura tuka paturure sitora moVenduka nahena ose kuna kugazara asi yirongo nayinye oyo tuna tumbangura yigwane nomfi kukwama omu vana kudipura.Tilapia mosipakote so5kg kukosa N$100,00 kovantu nye ava vakara pepi ngwendi MoMariental mwene ntani moVenduka,ava ava gazara asi nomfi kwakara noukanguki kupitakana nyama.Nofarama donomfi nadinye edi vaturapo woministeli zonomfi norunone sirongo nasinye kugwana nomfi edi vana kutumbura asi fingerlings koEcho valike ava vhuru kurugana oyo.Ose kurugana nawa nsene asi ndama zizonauka hawe ose kuzirugana posiruwo sooso yipo asi nomfi detu dahamona siponga.Evango eli kwakara nokilo 25 kuyuka muzogo gwaMariental,evango eli kwakara nokubike 100,kuna kumoneka asi nene unene.Ose twakara hena nonomfi edi vana kutumbura ngoso kevango limwe koWater Fish Institute moHardap.Amo yimo nye mwakara nondja edi adi li nomfi edi dikure nawa.Ose nkenye apa kukara taturugana morwa twahepa kutara asi mema aga gana kutunda mondam vahepa kugaruganesa nawa yipo gagave pempo zongwa konomfi detu.

Yiyo dina kukura nawa morwa ose kudifira sinka.Ntani hena awo vahepa kudiva asi dipipo donongara yipo vaditulire ntere ndi asi mondama zado.

Mokuzangura nomfi edi hawe wahepa kukara nomukara guna kara asi ono divako yuma.Morwa evango nlyetu nye eli tuna kara nalyo hawe twahepa kukara nomuzangu guna kuliza nevango.Ose kwakara tupu novarugani vana siki ko23,ava vakara asi kwavakuta ano mwenya kampani yige Ivo de Couvea ogu ana kara asi yige hena ana kuturapo kampani vana kutumbura asi Overberg Fishing Kampani.Nondima donomfi nongwa nye ava vadidiva kuna kutanta asi kapi tuna kara noyimaliwa yina gwanene.Nampili ngomu tuna kumona udigu ou hawe ezanguro nomfi kuvhura kureta malisintasinto moekonomi lyosirongo.VaNamibia vana hara kulituramo mongesefa ezi nye hawe morwa kapi vana kugwana yimaliwa yiyo tupu yina kurangapesa.Unadima wonomfi nawo umwe una kara nomulyo,kuna karamo udigu.Nomfi dogoro ngesi kuna kuditanta asi kapi dina kara nomukisi nampili gogu ono kudilya hawe toparuka nawa.Nomfi hena nongwa kudiweka kupitakana yikorama yimwe eyi ayi kara asi kapi ayili nkenye eyi.Nomfi kureta ukanguki momuntu.Efano lyaAmbrosius Paulus ogu ana kugava nondja donomfi ntani ogu ana kumukwama kuna kara Hadwin Dirkse navenye varugani pofarama ezi.

LEAVE A REPLY

Please enter your comment!
Please enter your name here