We Culture Yakotoka Otjo Rainbow Suns

0
29

I Kae Matundu-Tjiparuro

OTJOMUISE

Hapo o We Culture yazengera pi nomizumbi vyayo vyatjitavi? Ndoovazu indi ondikara epuriro roye ndindondi ngurova kamunine ponganda yomerinaneno muno ndjitjiukwa otjo Warehouse.

Makuzu tjiyetuombaze nombaze ina eputuku. Oritjatatu rotjiveke tjitjazuko ami mbekerimwine ambiri po Warehouse. Hinakutjiwa kutja mbatuarerwe itjike tjinga eehatjiwa kutja kuna otjimbumba tjoharive tjimatjiyorikisa overinane ponganda indji. Posyo owami ingo ekurumuna mbirimbo nu rukuru kukuheri ozoiri ovitjitua ponganda indji muvyuta. Embo rarwe rOtjiherero ritja “tjitjikutuara kepembe kotjii”. Nambano hina kutjiwa kutja Oritjatatu indi epembe kumbatwarerwe oorine?

Ami ngunda ambiri ponganda indji omatui yandje yananwe ombosiro ndjimaizu momatuwo yokongotue ponganda indji. Ombosiro indji ina tjiyendjizemburukisre posyo ami tjeehatjiwa kutja otjikwaye.

Ami mbakongorere ombosiro indji kumaizu nekerihaka momirungu omitjiukwa motjitamba tjomizimbu mo Namibia. Momirungi imbi mwari omirungu mbimbazengisa orure. Omirungi imbi ovyovanyande vomizumbi vo tjimbumba ihi o We Culture. Tjimbatamuna o We Culture tjiwahekana katiti, otumbu motjihaamwa tjoye noriyaruka katiti mourizemburuka, mapeya tjandje waeta popezu mouruvi okamuzumbi inga “Ozombiritjena”.

Tjiwazemburuka okamuzumbi konoo kara nokuhina okuyeta motjiperendero Ripanda “Amigo” Karirao. Tjikweya komizumbi tjinene imbi ovyo reggae nu mo We Culture Karirao aara nokupenduka puna Ndorozu Hoveka na Ralph.

Ovo aveetatu vari puna ovatone vovihumba varwe vakatjoruhonga okurirongerisa. Ndinondi ngurova veri po Warehouse puna omutone womizumbu warwe Ras Kashera otjorupa rovitjitua vyomizumbi imbi o reggae mbyautire Oritjatatu ndazuko.

Ku imba mbumavepiti motjihuro mena romayuva womasuviro omare, tjiyeri 10 ku Kambundu ponganda tjingeyo, o Warehouse, oo Karirai nambano mbumavetjiukwa otjotjimbumba ihi Rainbow Suns (Omayuva wOmbwaneno yOvivara), maveyandja ondjozikiro puna ovakwao motjitamba tjomizumbi imbi imbi o reggae, kOmbara yomizumbi imbi omuyaruke Bob Marley.

Tjimomunu kutja ovo vee kuyatakana motjitamba ihi nokuzenga rukwao otjizenga tjao nokukwesa nouza womizumbi vya, katjiperi kaparukaze. Mavetja ovo veya nambano motjitamba ihi mavehandura. Nomena romapuriro otjiwana ngutjipura kutja hapo vazengirapi. Mavetja kavekotokere okunyanukisa porwe nungwari okukwamba eraka rao kovakwao varwe mehi okutuurungira momizumbi vyao okuhungirira kovingi mbyapirama mehi.

Mwiimbi muna ozoprysa zovihepwa ndaronda nderamba otjikamba meyuru. Munao okamuzumbi kao kemwe otjikena ena: “Trouble” (Oumba) okukeverera ovina mbiheri nawa tjimuna ovatumbe okutumbirako novasyona okusyonaparerako. Tjingetjo okamuzumbi karwe kena “System” (Ongaro) makepura kutja hapo ndoovazu kuza ongaro ndjiri mehi ombwa ongwaye ovandu tjiveri kehi yohangauti?

Kovasuvere vomizumbi vyo We Culture, o Rainbow Suns yatanda okuveyetera omizumbi omikuru vyo We Culture nawiwa omipe mumwe mo CD. Okutja kareye katumba orondu ovarare vemuna ovipo tjapo o CD indji tjiyapiti mamwiikaere.

LEAVE A REPLY

Please enter your comment!
Please enter your name here