Okomisi yUulingilingi Ya Kwata Ko Iihauto 22 yEpangelo

0
14

WINDHOEK

Oshikonga shokashawa kOpolisi, Opolisi yaMuni nOkomisi yUulingilingi (Anti-Corruption Commission – ACC), osha kwata po aafekelwa mboka ye li aaniilonga yEpangelo mboka kwa li taya hingi iihauto yaHolomende mehuliloshiwike lya zi ko. Okashawa oka ningilwe mEtitano sigo Osoondaha.

Aaniilonga yepangelo 22 oya kwatwa po taya fekelelwa elongithonayi lyomaliko gEpangelo. Aahingi mbaka otaya tamanekelwa etaaguluko lyOveta yOkukondjitha Uulingilingi, Oveta onti-8 yomumvo 2003. Yamwe yomoondalayiva oya holoka nale komeho gOmpangu yaMengestrata mOvenduka.

Aahingi oyendji oya kwatwa po sho ya adhika taya hingi iihauto yaa na omikanda dheziminino, omanga iiningwanima iyali yokuhinga iihauto yEpangelo aantu ye li kohi yondungo, ano ya kolwa.

Aafekelwa 12 mboka ya holoka komeho gOmpangu yaMengestrata gwaVenduka mOmaandaha oyo: Bennett Kangumu (34), Maazu Zauana (49), Silas Fillemon (46), Josef Hango (37), Immanuel Waendama (39), George Mabakeng (38), Titus Shigwedha Iyambo (50), Jacobus Uirab (57), Conrad Hamutenya Haikera (46), Cornelius Shilongo (42), Ernst Kessler (35) naHans Ashipala.

Mboka inaya holoka mompangu ongaashi Johannes Schutte (55), Nangombe Shambekela (37), Modestus Senalye (30), Jacob Amupembe (41), Manuel Kaboy (38), Boetie Hambira (31), David Eenhana (26), Fillemon Shivute (40), Asser Kangootui (50), Naftali Ananias (47) naLoius Jermanus (32). Iihauto mbyoka ya yugwa ko nokupaakingwa oyuuministeli ngaashi Elongo oyi li 3, Egameno nEpopilo – Opolisi (4), Uuministeli wIilonga nOndalasipota (2), Etanga lyEgameno -NDF (4), Uuministeli wIipindi nOofambulika (1), Uundjolowele nIilonga yOnkalonawa (1), Omauyelele nUutekenika (2), Okomisi yOmathaneko gOpashigwana -NPC (1), Iikwameni (1), Uuministeli wIimaliwa (2) Egameno nEpopilo -Oondhongolo (1).

Aafekelwa mbaka otaya tamanekelwa okulongitha iihauto mokufelefula aanona yawo, okuhinga iihauto yaa na eziminino oshowo okulongitha iihauto oku ka landa iipumbiwanima yawo koositola.

Yamwe oya adhika ya londeka aafalelwa inaya pitikwa okulondekwa omanga yamwe ya adhika taya hingi ya kolwa. Ominista yEgameno nEpopilo, Nickey Iyambo ngoka naye a li e ya okutala nokuuva kombinga yaatamanekwa yuuministeli we, ota ti iihauto yEpangelo ayihe kumwe yi li 22 oya paakingwa mehuliloshiwike pomahala gayooloka moshilongo. Iihauto yimwe, ta gwedha po, okwa li tayi hingwa kaanambelewa yEpangelo yaa na eziminino nenge taya hingi ya kolwa.

Omimvo odhindji, oshigwana osha kala nokunyenyeta elongithonayi lyomaliko gEpangelo kumboka ye ga inekelelwa okuyakula andola oshigwana. “Omanyenyeto gaakwashigwana ngashingeyi oga yukipalithwa nee nopolisi otayi longo iilonga yayo,” minista ta ti.

Omukuluntuwiliki goACC, Paulus Noa, pethimbo lyoshigongi shiikundaneki mOmaandaha komatango, okwa gandja elondodho lya yaga komuntu kaaniilonga ayehe yepangelo kutya Okomisi yOkukondjitha Uulingilingi itayi ka thiga nando emanya lya londa kekwawo nokutala ashike omaliko gEpangelo taga hepekwa, kutya nee omunambelewa oku na onkatu nenge esimano li thike peni. “ACC okwa kala nokutsakaneka omanyenyeto ogendji ge nasha nomikalo dhaa shi okutaambiwa ko dhelongithonayi lyomaliko gepangelo, unene iihauto yaHolomende,” osho Noa a tseyitha.

“Ethimbo olya pya opo aantu mbaka ye shi tulithwe po – mboka haya longitha nayi omahauto gEpangelo.” ACC natango okwa yugu ko oshihauto shokomisi yawo yene – ano shoka hashi hingwa kondalayiva yaNoa – ndjoka hayi hingi oshihauto shoka sha pewa oACC kOpolisi. Omuhingi nguka okwa adhika e na mo aafaalelwa inashi pitikwa paveta.

Noa ota ti sigo oompaka kape na aanambelewa nenge uuministeli wa ka tala ko iihauto mbyoka ya paakingwa natango pomahala gOpolisi gayooloka mOvenduka. “Okashawa haka otaka tsikile notaki ihanene niitopolwa yilwe moshilongo.” Noa ina vula okupopya kutya oshikonga otashi ka kala ko ishewe uunake, oshoka ina hala okuyakela ko mboka tashi vulika ya ka kaule onyanga shi nasha naashika. Iihauto ayihe kumwe 229 yEpangelo okwa li ya thikamekwa nokupulwa omauyelele, naashika osha ningilwe ashike mOvenduka.

LEAVE A REPLY

Please enter your comment!
Please enter your name here