Ovinamwinyo Mozoresevate za Maheke Kavina Okuranda Nokurandua

0
13

Epukiro, Otjinene na Mongua Muna Ozombongarero Muhuka

I Kae Matundu-Tjiparuro

OTJOMUISE

Kapena okunyinganyinga ovinamwinyo momahi wa kangamwa mOmaheke okuza kOritjaine tjiyari 23 ku Kozonjanga nganduu kondjivisiro yarwe omayuva tjiyeri yevari ku Kambundu.

Ombongarero yomayuva yevari yotutu tuovatuta tuozoresevate za Maheke, ovanane vombazu, ozorata zoutukondua womatoororero wa Maheke novanangendo nondero varwe yatiere nao komaandero wayo Oritjatatu mEpako. Omuhungirirepo wombongarero indji, Nguvitjita Toromba, orata yOkarukondua kOmatoororero ka Tjinene, matja nganduu kondiero yarwe tjiyeri yevari ku Kambundu kapena kukara omarandisiro wovinawiwnyo kangamwa kutja ovinene poo ovititi mozoresevate za Maheke kutja omarandisiro wozopermita poo opozovandisa.

Ondiero indji yaetua iyondiero yotutu oturande tuovinawinyo o Karoo no Agra okuranda ovinamwinyo pozo permita uriri pupeheri pozovandisa okuza ku tjiyeri yetatu ku Kambundu. Otja ku Toromba ondiero yozonganda ozorande inda yatoorwa ombura ndjazuko mu Seninarindi posyo oyo veuzuvire nai oupe pombongarero indji. Ondiero indji maivetasana otjipara nondiero onguru ape ozombura mbari ndakapita iyorutu romarandisiro kutja kapena kuuhara amaperandisiwa ovinamwinyo pozopermita pendje napozovandisa uriri.

Ouzeu wozonganda ozorande zovinamwiyno inda ooma ndjiri mokuvasisa otjimariva pomarandero okuza mEpako, ozondjo zovarande vovinamwinyo ape omangete o 20 nduvenazo kuna ozonganda zovarande. Ovarande va Maheke mozndjo inda vena ozondjo zozondola za Namibia omangete yetatu, engete rimwe nokande noine (1.4) nderi ozondjo zovarandere ovazoozu.

Ouzeu warwe wozonganda inda oungundipare wotutu tuovatuta okusembamisa ozovandisa tjinga azehina omayuva ngakurama mombura wozovandisa. Mena romapu inga nai otja kozonganda ozorande inda otjizehina mazeuhara amazeranda ovinamwinyo mozoresevate nu tjipena ovarandise mbumavevanga okurandisa okutja ngavevasise ovinamwinyo vya kEpako. Otja ku Toromba o Agra maiyenene okurandera mOtjinene, Omongua, o Korindo o 13 na Nderombapa. Toromba wapura kutja hapo kovirongo imbi okukuhina ooma yokuryanga notjimariva? Wina wakumwa kutja hapo zoondjo inda zovarande ovazoozu onderi otjipo?

Ombongarero ndjari mEpako yazikire okomiti yovandu hamboumwe kehi yomuhaamise wovihavero Kamunguisi Kazongominja. Ounepo wayo o Inge Kangootui, Fessy Marenga, Thomas Tjimbundu, Uatanavi Kauta na Mbenovandu Muniaro. Okomiti indji muvyarwe ovingi inotjiungura tjokuhakaena kuna o Ministera yOtutumbo nOvikunwa. okupitira mOngooneya ya Maheke, Laura McLaud. Otjiungura ihi okutjisa o Ministera indji ondiero indji nokutara kutja mapeya nani aingunda amaivatere kutja ozonganga zovinamwinyo azehayandja ozopermita zomarandisiro ngunda apena ozongondjero zokuzengurura ondjakaha yomarandero nomarandisiro wovinamwinyo. Wanunisa kutja ondando yokungunda amavetjaere omarandisiro wovinamwinyo kakuhunga ovahite vopokati kovarande novarandise nungwari okutuna ouhazendu mbukaendisiwa iyovarande wokuritiera otjimariva kumaveranda ovinamwinyo. Watja pozovandisa pekara ovarande peke peke nu nai otjimariva otjitjihapandere pona pemwe.

Tjapurwa kutja hapo ondiero yokuhina kurandisa maitunu vi komarandisiro ohunga ko Meatco ngeripo nai, Toromba watja ihi otjina peke nai tjitjiri mondiero kuna o Meatco. Ombongarero indji kayeere nomwano wokutja hapo harukuru otjina ihi maitjizengururwa vi nu ihi itjimwe tjotjiungura okomiti tjimaiso okunununga. Toromba matja mazeri kutja okomiti maiyeta ondunge yomazengururiro tjimanga ngunda ozoskole azehiyapaturuka tjiyeri 13 ku Kambundu. Ihi itjimwe tjotjina wina okomiti tjimaizeri okuyandja ko eziriro pombongarero ya tjiyeri yevari ku Kambundu.

Ngunda aperi nao otutu tuovatuta tueriyandjere okuvasisa ondiero indji koviwana vyovatuta puvitumbira mozoresevate za Maheke peke peke. Otja ku Toromba otutu tuovatuta tua Tjinene na Pukiro tuatanda ozombongaero zovatuta muhuka Orovyungura omayuva tjiyeri 26 ku Kozonjanga. Tjingetjo orutu rovatuta rwa Mongua rwa tjivisa momurari ombaranga kutja runa ombongarero muhuka.

Mokati kovitjitua imbi ehika rovaravaere pozovandisa, ovahite pokati kovarandise novarande novarande, morutuu rwaro kovahaamise wovihavero vyomahika wovatuta rwaraisa ondanaukiro momasutiro wovinamwinyo pozovandisa mOmaheke otja kondiero yombongarero yayo ndjahaama mu Seninarindi ombura ndjazuko. Otja kondiero yombongarero indjo orutu indui marusutu ovinamwinyo vimwe tjivyazu nokuranda. Otjimariva ihi matjisutua korutu rovatuta. Tjazumba apekongorere vyarwe. Ovinamwinyo avihe otja tjimavimanuka omurandisire norutu rovatuta mavetua omunwe kembo kutja ovimawinyo imbyo vyaranda vyakapita. Okuzambo marire omerizirira worutu rovatuta rwoharive indo okukapitisa otjimariva kovarandise.

Otja kehika rovarande indi mena roundiru wovandu mbeverabdera ovanamwinyo moruyaveze kanaa rire oupupu okukara novandisa yozongombe zotjivaro kehi yomasere yetatu no komisi ndjiri kehi yozoperesende ndano. Tjingetjo kanaa rire oupupu okukara novandisa yozongombe o 300 nokombanda kokomisi yozoperesende nderi kehi yo 4.5. Ihi matjihee kutja nganduu kozongombe o 300 orutu rovatuta roharive indo marumunu okomisi yoperesende imwe uriri nozongombe tjizeri kombanda yomasere yetatu okomisi mairire operesende o 1.5. Ondiero indji maiya momaunguriro tjiriri etenga ku Kambundu.

LEAVE A REPLY

Please enter your comment!
Please enter your name here