Iihakanwa yEfundja Oya Tinda Okutembudhwa Mo Momikunda

0
8

KATIMA MULILO

Epangelo oli na omathaneko okutembudha mo thilu aanamikunda momikunda dhawo dhoka hadhi dhengwa omvula kehe komeya gefundja moshitopolwa shaCaprivi. Kakele aanamikunda moshitopolwa shika oya dhika oonyala mevi inaya hala okutembudhwa mo momikunda dhawo unene dhoka dhi li moshikandjohogololo shaKabbe. Shika oshe ya puuyelele pethimbo lyetalelopo ndyoka lya ningilwe omathimbo ga zi ko miitopolwa mbyoka yi li kohi yomeya muuzilo woshitopolwa shoka kuNgoloneya gwaCaprivi, Leonard Mwilima. Elalakano lyosheendo okutala onkalo moka tamu lumbu iihakanwa yomeya gefundja oshowo etopolo lyiikulya miitopolwa mbyoka. Ngoloneya okwa li e ende pamwe nakansela goshikandjohogololo shaKabbe, Peter Mwala, Elenga enene lyaMasubia, Kisco Liswani III, noya li ya tuka nedhagadhaga okutalela po omahala ngaashi Schuckmannsburg, Namiyundu, Ikaba, Mbalasine noKasika moka ya ningi iigongi pamwe niihakanwa yefundja oshowo aaleli yopamuthigulwakalo.

Mwilima okwa longitha wo iigongi mbika okukolekulula etokolo lyepangelo okutembudha mo aakwashigwana momikunda dhoka hadhi yuulilwa komeya noku ya tembudhila momikunda hoka ihaku adhika nuupu kefundja. Shika otashi ningwa nelalakano okuyanda iimaliwa noonzo hadhi longithwa kEpangelo omvula kehe okutembudha aantu mbaka noku ya pa iikulya.

Ngoloneya okwa tsu omuthindo omukalo ngoka gwokushuna komikunda dhoka hadhi dhengwa kefundja omvula kehe, kutya ohashi pula Epangelo oshimaliwa oshindji, nohashi piyaganeke wo elongo lyaanona miitopolwa mbyoka ya gumwa. Mwilima okwa shilipaleke kutya Epangelo oli na edhiladhilo okutula po iiyakulitho tayi kalelele ngaashi omihandjo dhosikola noosikola pomikunda dhoka dhi li pomitunda ihadhi adhika nuupu komeya opo elongo lyaanona kaa li piyaganekwe we.

Pokati mpoka, nonande ya shilipalekwa kuMwilima kutya aantu otaya ka kala haya vulu okushuna komapya gawo nenge oku ka yula oohi komikunda dhawo dhoka taya ka tembudhwa, onkundana ndjika oya tsakanekwa noshikanyauko kaanamikunda. Otaya ti kutya omikunda dhawo dhoka odhi li onzo onene yuuhupilo wawo. Oya kala mo omimvo nomimvo nooyinakulu/oohekulu oya kala miitopolwa mbyoka nokuyula oohi moka.

Mwene gwomukunda Schuckmannsburg noNamiyundu, Munihango Benson Mayumbelo okuuvite kutya etembudho tali kalelele otali ke ya yuga evi lyawo nomeya. Oku na uumbanda kutya omahala ngoka omape taya ka tembudhilwa otashi vulika itaga ka gwanena aantu ayehe nenge kamu na evi lya gwana okulonga uunamapya oshowo omeya gokunwa.

Pokati mpoka, Elenga enene Liswani III ngoka elelo lye lya kamba ko iitopolwa mbyoka, naye ota yambidhidha shoka tashi popiwa kuyakwawo kutya etembudho olya pumbiwa ashike molwoosikola nomihandjo ndele inali simana kaakwashigwana. Ota ti elelo lye otali ka taamba ko ashike etungo lyomihandjo miitopolwa ngaashi Schumannsburg oshowo omahala galwe, ngoka ihaga yuulilwa shito komeya gefundja. Ota ti omikunda dhoka odha kala omahala gawo gopamuthigululwakalo kaakwashigwana ye omimvo nomimvo. Oshitopolwa shoka hashi dhengwa komeya gefundja ohashi gandja wo omeya ga gwana kaakwashigwana niikulya ngaashi isoto oshikulya shoka sha simana noonkondo kaanamikunda oyendji yomuhoko gwaMasubiya mboka haya lumbu miitopolwa mbyoka.

Liswani III oti indile Epangelo li yambidhidhe nokweendeleka etotepo lyoprojeka yi nasha niimeno yokuza iikwamahooli – oprojeka yolumono lwedhina jatropha ndjoka tayi ka eta po oompito dhiilonga kaantu 20 000.

Okwa tsu omuthindo epangelo li gandje ombautu ndjoka tayi ka kala hayi fala omeya kaantu mboka taya lumbu miitopolwa yomuuzilo waCaprivi. Ota ti uumbauto mboka uushona kawu na egameno nope na aluhe ompumbwe okutala kiilalakanenwa yotango yi nasha negameno lyoomwenyo dhaakwashigwana.

LEAVE A REPLY

Please enter your comment!
Please enter your name here