Aakolonyeki Itaya Vulu Okuyelekanitha Esindano lyoSWAPO – Ekandjo

0
14

OLUPAKA

Omapangelo guukoloni nokakombo noludhi gaNdowishi naSouth Afrika ngoka ga kolonyeka Namibia omimvo adhihe kumwe 106 oga ndopa okuyambula oshilongo shika pakuyeleka nEpangelo lyoSwapo ndyoka lya eta po oshindji muule ashike womimvo 18 okuza pemanguluko. Eyelekanitho ndika olya ningwa kOminista ompe yOmalelo gOpaitopolwa, Ondoolopa, Omagumbo nOmapendulopo gOkomikunda, Jerry Ekandjo mOlyomakaya pomukunda Olupaka moshitopolwa Omusati. Ekandjo okwa tseyithile engathithi enene poshigongi shoka kutya Namibia oku na ondjokonona ya paka ya etwa po kuupendafule wOokapteina Hendrik Witbooi, Jacob Marenga, Omukwaniilwa Kahimemwa Nguvauva, Omukwaniilwa Samuel Maharero, Omukwaniilwa Nehale lyaMpingana, Omukwaniilwa Mandume yaNdemufayo, Omukwaniilwa Iipumbu yaTshirongo oshowo yalwe mboka ya kondja nomazigudhe okukondjitha uukoloni waNdowishi nepangelo lyokatongotongo lyaSouth Afrika moNamibia. Omapendafule ngoka okwa li ga dhika oonyala mevi nokugamena evi lyooyina kaahindadhi Aaeuropa. “Onkee otwa pumbwa okukutha ko oshiholelwa shuupendafule kuyo sho tatu tameke nekondjelomanguluko etiyali lyeithikamenopo paliko. Swapo okwa eta emanguluko naantu ngashingeyi oye na okukondja yi imonene emanguluko lyopaliko,” Ekandjo ta ti.

Ota ti omukalo gumwe awike okulwitha onkalo yoluhepo okundungika Aanamibia. Omolwaasho Epangelo otali longitha iimaliwa oyindji melongo.

Aakomeho yepangelo lyuukoloni waNdowishi, pauyelele waEkandjo, oya dhipaga po ashike aantu, nokonyala nokuli ya dhipage po thilu omuhoko gwAaherero, ano mboka ya sa oopelesenda 80 oshowo omuyalu ogundji gwAanama oopelesenda 60, omanga epangelo lyokatongotongo lyaSouth Afrika lya kala nomilanduveta “dhetopagulo nelelo lyokakombo noludhi” oshowo omusindalongo gwoBantu ngoka gwanathangwa. Ekandjo ota ti ekondjelomanguluko inali za pokapala kayela ano olya za metiko lyombinzi ndjoka tayi monika mepandela lyoshigwana oshowo Ongundu yoSwapo, nomapendafule aamati naakadhona oyi igandjele oomwenyo dhawo emanguluko. Okwa londodha oshigwana shaa pukithwe koRally for Democracy and Progress (RDP) ndjoka tayi uvaneke okugandja oompito dhiilonga koshigwana. “Yoyene kaye na iilonga nosho etompelo ya hala mu ya hogolole opo ya mone iilonga.” Ekandjo ta ti ope na iiyetwapothaneko kutya aawiliki yopamuthigululwakalo nongeleki kaa ya ndjoine opolotika. Ota ti Ekotampango lyaNamibia inali indika nando omuntu okundjoina opolotika.

“Opolotika oshinima shomuntu kehe onkee oye na uuthemba okundjoina.

Omolwaasho wu wete tu na aanapolitika ngaashi Elenga enene Justus //Garoeb, Omudiakoni Willem Konjore nElenga enene lyAaherero, Kuaima Riruako oshowo oyendji mboka ye li mopolitika.” Ekandjo okwa tseyitha wo kutya oshituthidhimbuluko shetotepo lyoSwapo momasiku 19 Apilili otashi ka ningilwa kOtjiwarongo momasiku 26 Apilili. Omupresidende Hifikepunye Pohamba ota ka kala mOtjiwarongo okutseyitha iilyo yOngundumutima yOngundu yoSwapo mbyoka ya hogololelwe pokongresssa yongundu muNovomba omvula ya za ko mOvenduka.

Mokupopitha engathithi ndyoka mpoka esiku ndyoka, Kansela gwOshikandjohogololo Outapi, Taati Shileka okwa totha mo ooprojeka dhimwe dhomapendulopo dhoka dhe ya moshikandjohogololo she konima yemanguluko. Epangelo olya tunga oosikola nokutula dhimwe oondondo dhomuthika gwopombanda. Pandondo yokuthikitha omayakulo popepi noshigwana kepangelo, uuministeli wayooloka owa dhika oombelewa mOutapi, kakele ashike kuuministeli wumwe kaa wu shi womuyalu ogundji. Epangelo lyoSwapo pauyelele waShileka olya tungitha ondjila pokati kOutapi noTsandi oshowo ongalama pokati kOnesi nOlupaka. Shileka ota ti Outapi inau kala ondoolopa omanga oshilongo inashi manguluka, kakele owa ka ninga ondoolopa konima yemanguluko. Kansela ota ti oosikola odhindji oshowo omikunda odhi na omeya gokopomba okupitila megandjo lyomeya gokomikunda, nonando pe na iiputudhilo nomikunda omishona lela dhoka dhi na natango okupewa omayakulo ngaka.

LEAVE A REPLY

Please enter your comment!
Please enter your name here