Ovaungure va Mongua Mapeya Averondorwa

0
4

I Kuvee Kangueehi

OTJOMUISE

Otjirata tjOrukondua rwa Maheke tjazengisa otjimariva mOkarukondua Komatoororero ka Mongua novaungure vomberoo indji tjiva maveundjirwa okurondorwa.

Orata yOkarukondua kOmatoororero ka Mongua, Ervin Uanguta, wazeuparisa ko New Era kutja watjivisiwa iyomutare womambo wotjimariva tjohoromende, Sam Marenga, kutja pena otjimariva tjitjazenga momberoo yokarukondua komatoororero no mikambo vyoveta maviyenene okutoorerwa ovaungure tjiva vomberoo indji. Uanguta watjere kena ondjiviro okuura ohunga notjina ihi mena rokutja ihi otjina tjomananeno womberoo. Watjere Marenga wemukwamberere ko uriri. Wawezire ko kutja otjimariva tjimakuzu tjazenga tjaza kotjimariva tjitjiwongwa movature komaungurisiro worutjeno mOmongua. Kapena ongahukiro kutja otjotjiri otjimariva ihi tjazenga poo ngahino tjiri mozondjo ndehiyasutua.

Omuungure pomberoo indji wazeuparisire kutja Marenga wakariangera omberoo indji otjorupa rotjiungura tjomoukoto tjokutara omambo wotjimariva neye kaari nohange nondunino yotjimariva momberoo indji. Omuungure ingwi ngwatjere kenakuvanga okuritjiukisa, watjere Marenga aatja pena otjimariva tjitjazenga tjinene okuza kotjimariva tjorutjeno. Omuungure ingwi watjere Marenga kaatjiukisire kutja otjimariva tjitjitapi nu waningira omberoo ondji okuhinda omatjangwa ohunga notjimariva ihi komberoo yOtjirata tjOrukondua kEpako. Omuungure ingwi wawezire ko kutja otjimariva tjimakuzu tjazenga mapeya arire otjozondjo ndehiyasutua kakutja otjimariva tjitjaungurisiwa navi. Marenga watjere wakariangera ozomberoo azehe zoutukondua womatoororero nu muindji oya Mongua omakamuna ovina mbiheri nawa. Posyo eye kayenenene okuhandjaura otjina ihi natja omapuriro kangamwa ohunga natjo mayeyenene okuzirwa iyomutize wotjihavero tjotjiuru tjomberoo yOtjirata tjOrukondua rwa Maheke, Pedereus Tjihoreko. Posyo eye kaamunikire okuhungirira kotjina ihi.

LEAVE A REPLY

Please enter your comment!
Please enter your name here