Oumune Waturikwa

0
14

I Kuvee Kangueehi

OTJOMUISE

Otjombanguriro tjOkombandambanda Oritjaine ndazuko tjatuirikire oumune watjo momaningiriro wOuhonapre wOtjirata Tjombazu tjOmbanderu okuyarurakisa otjiposa tjokutana oumune wOtjombanguriro tjOkombanda wOmupangure Collins Parker mbwayandja ombura ndjazuko.

Ovapangure votjombanguriro tjOkombandambanda ihi Peter Shivute, omupangure omutize woruveze Johan Strydom na Simpson Mtambanengwe vaturikire omayandjero woumune tjivazire nokupuratena kouhatoi wohahende yOuhonapare Wombanderu, Dave Smuts nOyovanamutjemo, Andrew Corbett.

Smuts mokununisa otjiposa tje waraisire kutja omayakuriro woveta yOvambanderu yari otjina tjokupatasana mutjo mumamukara ovandu tjiva mbenohange natjiva mbehinayo. Watjere otja koveta yombazu Ombara inousemba wokukonda ongwa. Munao Omuyaruke Ombara Munjuku II Nguvauva tjakonda ongwa kapena kuheya kutja yari pendje nombazu youkutuke nouyara nungwari waungurisa omasa we otjaihe wOtjirata tjOmbazu tjOvambanderu. Watjere Ovanamutjemo kanaindi vapatua okukara norupa momamemeno woveta. Tjiva vOvanamutjemo vari pombongarero ndjayakura oveta indji novo kanaindi vakara nouzeu nomayakuriro wayo.

Corbett waraisire kutja Ombara yakonda ongwa yotjina tjitjari nomirari mutjasere okuwondja nu munao otjiyeritjinda nokuhina ourizemburuka ouhaera nuwina nokuhina okusora. Ombura ndjazuko Parker wanakaura omayakuriro woveta ya tjiyari 1 ku Seninani mo 2005 naraa kutja ovazirire vo kotjiposa ihi vesute otjimariva tjatjo.

LEAVE A REPLY

Please enter your comment!
Please enter your name here