Iiponga yOmukithi gOkolera Otayi Indjipala

0
6

WINDHOEK

Omuyalu gwiiponga yomukithi ngoka gwa kolekwa mOshitopolwa shaHangwena ogwa londa okuza paantu yahetatu sigo omulongo nayatatu mOmaandaha. Omukuluntuwiliki gOshikondo shUundjolowele mOshitopolwa Oshana, Dr. Naftali Hamata, okwe shi koleke noshifo shika mOmaandaha kutya iiponga tayi fekelwa kutya omukithi gOkolera oya tsikila okwiindjipala.

Momaandaha opwa li iiponga yi li 533 mbyoka taku fekelwa kutya oyomukithi nguka, omanga iiponga 14 ya pangwa miipangelo oshowo omahala guukalinawa ngoka gamwe ge li ootenda, omanga mboka ya sa ye li natango yatatu. Iiponga oyindji natango otayi lopotwa miitopolwa unene moka mu na omeya gefundja moNooli, moka aanambelewa yopaunamiti taga gandja ombedhi kutya omukithi otagu etithwa komeya ngoka ga nyata. Miiwike iyali ya piti moshitopolwa omwa li ompumbwe yoopela dhokuyeleka omeya pomahala ogendji guukalinawa.

Kakele, Hamata mOmaandaha ota ti omahala, oosenda oshowo iipangelo oya pewa omiti dhokuyeleka omeya, kakele uupyakadhi owu li ashike pokutopolela oshigwana omiti dhika. Nena, aanambelewa yuuhaku okwa tegelelwa ya ka topole oopela nuushako womiti kaanasikola poosikola dhayooloka moshitopolwa. “Otwa dhiladhila okutopola oopela odhindji ngaashi tashi vulika unene momagumbo moka aantu ihaya longitha omeya gokopomba,” Hamata ta ti. Oosipana dhokweendagula, otadhi longitha omadhagadhaga gEtanga lyEgameno lyaNamibia -NDF, mokufala nokutopola omiti unene kumboka ya kondekwa komeya na ihaya vulu okuthika pomahala guukalinawa. Omukuluntuwiliki guundjolowele ota ti mboka taya vulu okuthika pomahala guukalinawa naya ye yoyene ya ka tale omiti dhokuyeleka omeya opo ya yande okukwatwa komikithi hadhi zi momeya. Pokati mpoka, onkalo yomukithi goshimela namalaria miitopolwa Oshana nOmusati oyi li metonatelo ewanawa, Hamata ta ti. Okwa gwedha po kutya efundja otali tsikile miitopolwa oyindji sho omvula natango tayi tsikile nokudhenga omata pevi miitopolwa mbyoka. Omunambelewa gwetengeneko lyonkalo yombepo, Guido van Langenhove, mOmaandaha momushangwahokololo gwe ota ti iishana momulonga gwaCuvelai omathano gonkalo yombepo otaga ulike kutya omvula ondhigu oya loka lela moNamibia naAngola mehuliloshiwike lya zi ko. Omukanda nguka otagu ti nonando omvula oyindji oya loka muule wethimbo efupi lela shi vulithe nale, oondondo dhomeya pomahala mpoka haga yelekwa pokati kOmafu nOkalongo otaga ulike ishewe eyopombanda kashona. Hamata ota ti oosikola moshitopolwa shaKalongo okwa li dha patwa molwaashoka oondondo dhomeya okwa li dha ya pombanda konima yomvula yomehuliloshiwike. Van Langenhove okwa shilipaleka kutya okuhula kwethimbo lyomvula – ano ethimbo lyomuloka oli li popepi nuupyakadhi otashi vulika wu mone ehulilo.

LEAVE A REPLY

Please enter your comment!
Please enter your name here