Ohanona Ya Sila mOmukweyo mOshipangelo shaKatutura

0
12

WINDHOEK

Uuhasha waapangi mOshipangelo shEpangelo shaKatutura otashi vulika owo wa etitha eso lyohanona ndjoka ya lika keyoka lyomoondundu. Pauyelele woonkundana moNBC TV, yina yohanona ota ti, peha aapangi ya tale ko oshiponga shoka ongoshinima shomeendelelo, oye mu lombwele ashike pamukalo gwengwanyagulo nokwaanesimaneko kutya na kale ashike “momukweyo.”

Meme nguka omugundjuka ngoka kee na nkee a ninge okwa kala momukweyo nokutala nkene okanona ke taka mono iihuna kuuzigo weyoka, nomaihumbato gaapangi ngaka oga halutha noonkondo ongundu yaavu mboka wo ya tala nkene okanona taka sile miikaha yayina, omanga aapangi taya ti oshiponga shoka kashishi shopaulumompumbwe. Ohanona ndjika oya si konima sho ya tameke okuza ombinzi kokana nokomayulu, noka li ka lika keyoka lyuuzigo molukanda Havana moKatutura potundi 17H30 mOlyomakaya.

Dr. Richard Kamwi ota ti oshiningwanima shika otashi vulika shi ka tidhithe aapangi mboka ye na mo okanyala moshipotha shika.

Ohanona yomasiku gatatu okwa li ka lika komutse keyoka lyuuzigo, kakele sho ka falwa koshipangelo neendelelo, aapangi mboka ya adhika miilonga oya ndopa okuyakula ohanona ndjika nokulongitha omaengweno gawo kutya oshiponga shika oshomeendelelo.

“Okanona kandje sho ka tameke taka zi ombinzi kokana nokomayulu opo ashike aapangi ya tameke okuyakula ndje, ihe inashi kwatha we sha, oshoka inaye shi endelela po. Onda kala ashike momukweyo nokanona kandje nde ka ukata oowili dhi vulithe mbali,” osho Pascalia Endjala goomvula 24 ta hokolola iihuna yoshiponga shoka sha ningwa konima ashike yomasiku gaali geso lyokanona ke hoka a monene moshipangelo osho tuu shoka.

Shoka sha ningwa kaapangi oshi li ompinge neuvaneko lyiilonga yuupangi ndyoka tali ti: “Ngame otandi uvaneke nesimaneko enene kutya oshinakugwanithwa shandje shotango tango ongomupangi okukaleka po nokugamena onkalonawa yaayakulwa yandje, … oshilongwa shandje otashi ka kankamekelwa kesimaneko, notandi ka kambadhala okuuva ko nokuungaunga naayakulwa yandje nolukeno, ohenda neidhidhimiko, onde shi taamba ko (oshilonga shuupangi) ongoshinakugwanithwa shandje okugamena nokukaleka po omauwanawa gaayakulwa yandje, otandi ki iyutha komaihumbatonawa, oveta nomithika dhoshimpungulonga shika.”

Oshiningwanima shoka osha ningwa petata lyomahano mOlyomakaya moHavana, sho meme nguka kwa li a langeke aanona ye mbaka kwa li aakwanambuyu – ye na ashike omasiku gatatu. Konima ashike yominute omishona sho ya langekwa petalashe, okwa uvu ashike okanona ke kokakadhona Maria Kafute Netumba sho taka lili noonkondo.

“Sho nde mu shumbula po, onda mono eyoka lya yedha omutse pombanda. Eyoka olya hile ndje omate meho lyokolumoho, kakele onda kutha mo aanona mbala mondunda,” Endjala ta hokolola. Onde mu fala mbala kOshipangelo shEpangelo shaKatutura, ndele sho nda thiki hoka, oshiponga shika osha talika ko “ngaashi ashike iiponga mbyoka yaa shi yopaulumompumbwe” kaanambelewa yopaunamiti mboka ya adhika miilonga.

“Potundi 18H10 otwa thiki poshipangelo naashi nda lombwele aapangi kutya okanona kandje oka lika keyoka, oya yamukula kutya onda halukithwa ashike kokulila kokanona naashoka tandi ya lombwele iifundja iitokele,” Endjala ta ti.Aashiinda oya ningi onkambadhala nokuli okufala eyoka ndyoka koshipangelo opo andola aanambelewa yopaunamiti mboka ya dheulilwa andola iilonga mbika ya vule okutala nokutseya oludhi lweyoka ndyoka li na uuzigo.

Shika nasho inashi kwatha sha okwiinyengidha andola omitima dhaapangi mboka ya kala ashike taya longo iilonga yilwe sigo nokuli kwatoka lela. “Omu na okutameka okulumba/okukakala momagumbo gokolela, osho mu wete sho omayoka tage ya meni lyiimbashu yeni mboka.” Endjala ota ti sho aapangi ya mono okanona taka zi ombinzi komayulu nokokana, opo ashike aapangi ya dhimbulula kutya oshiponga shika osha dhiginina. Kakele okwa toka nale – nokanona oka si. “Oya kutha po okanona pamwe natse (ngame nahe yokanona) nokufalwa kundohotola ngoka e tu lombwele kutya okanona oka hulitha,” osho meme gwako ta hokolola. Omunawino miikwauzigo yomayoka ngoka ina hala edhina lye li tumbulwe ota ti, kashishi nando omukalo gu shi okutaambiwa ko omuvu a lika keyoka ndele otaku tiwa na tegelele, omanga ina pewa ekwatho lyotango. Omunawino nguka ota ti kutya oshiningwanima shika ka kwali shi na okuhulila meso ngeno okwa li pwa gandjwa ekwatho lyotango. “Opwa li tapu vulu okukala eyooloko ngele okanona oka li ka yakulwa pethimbo. Oshizemo okwa li lela tashi vulu okukala sha yooloka kushoka omuntu ina yakulwa pethimbo,” osho omunawino ngoka ta ti.

Uuministeli wUundjolowele nIilonga yOnkalonawa owa kundaneke oshifo shika kutya opwa ulikwa aanambelewa yontumba ya konakone muule oshiningwanima shika.

“Kape na ngoka a tidhwa manga miilonga oshoka mboka ye na mo okanyala otaya konakonwa kutalike ngele oya longa nuuhasha. Ngele oya monika ondjo, kape na etompelo opo ya kale miilonga. Shika uuhasha wi igalala,” osho Minista ta ti.

Kamwi okwa gwedha ko kutya:”Nuumvo ngame itandi ka gamena nando mboka ya hala ashike okuninga iinima ngaashi ya hala. Amushangandjayi gwopevi gwehangano lyaaniilonga ndyoka hali kalele po aapangi (NAPWU), Gabes Andumba, ota ti nonando oshipotha shika oshi li natango momakonakono guuministeli, ngele omapopyo ngoka oga kolekwa, omaihumbato ngoka kape na ngoka te ga popile.

Ashike ina vula we okutya sha, “Oshiwanawa okutegelela oshizemo shomakonakono. Pethimbo ndika itandi vulu manga okukomenda koshinima shoka.”

LEAVE A REPLY

Please enter your comment!
Please enter your name here