Kaura Wahahiziwa?

0
8

I Kuvee Kangueehi

OTJOMUISE

Oninikizire mainene parereko kutja opresidenda yo Democratic Turnhalle Alliance (DTA), Katuutire Kaura, ahararakana rukwao omatoororero wotjihavero ihi pombongarero ndjimaiya yorutu romondivitivi rotjira ihi.

Oritjatatu muhuko munene omuungure wotjira mOkavango, Vincent Kanyetu, waraisire kombepo momurari wotjiwana kutja ounepo wo DTA mOkavango kauna okuvanga Kaura okukurama momatoororero wotjihavero ihi. Otjikando otjitjavari na moviveke vivari ounepo wo DTA okuningira kutja Kaura maheruke kotjihavero pombongarero yorutu romondivitivi ndjimaiya.

Otjimbumba tjounepo wo DTA watjanga orutuu rorutjemo komurari wotjiwana muwaningira kutja Kaura nounane we ukohorore onganda poo uheruke kovihavero. Kombunda yomapitisiro kombepo inga Omutjangerepo Omunene wo DTA, Alois Gende, tjimanga otjapitisa orutuu kozombuze maraisa omwiihamwatima nomapitisiro wa Kanyetu.

Gende wina ngwazire ko Kavango watja omapitisiro inga kayari nowatjiri kaparukaze mena rokutja kana indi pupari ombongarero mo Kavango ndjatoora ondiero indji natja otjira tjina omikanbo mbimatjitoorere Kanyetu.

“Mevanga okuperaisa ongahukiro kutja kangamwa ngusutua iyotjira posyo anyengurisa ondero yotjira matoorerwa omikambo tjimanga otja komirari vyotjira.” Gende watja o DTA kanaa yiungurisiwa otjondukwahere yopolotika iimba mbenangwarasi ovazepe omundu ovahakongorerwa.

Omutjangerepo Omunene ingwi watja omikambo mbyapwire mavitoorerwa ingwi omuzunde naningire ounepo wo DTA okuriporinda nokuhina okukurungisiwa iyovandu motjitamba tjopolotika vourizemburuka outiti.

Posyo Gende waitaverere kutja Kanyetu kayerike nungwari uri puna otjimbumba motjira tjitjivanga kutja Kaura ahakurama otjomutoororwa rukwao.Watjere otjimbumba ihi tjivanga kaani ingo motjira posyo kavesere okuungurisa ozonganda zozombuze otjorukosi rwao. “Otjira tjina omirari nu ndoovazu otjimbumba ihi matjivanga rive tjasere okupopa imba mberiwo momirari mbirivyo nokuhina okuteya otjira.”

Gende watjere unongamburiro kutja otjimbumba ihi tjiri kongotue ya McHenry Venaani okurira opresidenda. Watjere Venaani wararakanene otjihavero ihi mo 2005 apandjara nayakura kutja wapandjara posyo imba mbari kongotue ye ngamba kaveyazako. Komurungu Gende waraisire kutja o DTA otjira tjomihoko omingi nu katjomuhoko umwe.

“Ongwaye tjeri Kaura uriri poo Venaani, Gende poo Muyongo tjike?” Watuapere kutja kenouzeu na Kaura okukaenda komurungu mena rokutja ovanane ovawa tjimuna Sam Nujoma na Fidel Castro vanana ovira vyao peke peke ozombura ape o 50. “Ongwaye Kaura tjehasere okukaenda komurungu ndoovazu omunane omuwa? Kanaa tutoora omikambo mbimavinyono otjira.”

Gende watjivisire kutja ombongarero younane wokombanda weyuva wotjira maihaama tjiyeri 18 ku Seninarindi okutuapo omayuva ombongarero yomondivitivi tjimaihaama.

LEAVE A REPLY

Please enter your comment!
Please enter your name here