Aalongwa yOndondo 10 Itaya Endulula mIipundi

0
7

WINDHOEK

Ombelewa yaAmushanga gwOpevi mUuministeli wElongo oya gandja omukanda gwetseyitho mEtitano lya zi ko kaakuluntuwiliki ayehe yelongo yopaitopolwa, ngoka tagu ya indile ya kaleke po onkalo yokwaahendulula ondondo ontimulongo kumboka ya ndopa. “Okutala komahala ngoka ga pumba oshowo oonzo inadhi ihwapo,” osho omukanda tagu lesha, “osikola ashike mpoka pe na ehala omulongwa gwOndondo onti-10 ta ka pitikwa e endulule ongundu shi ikwatelela komalandulathano ngoka ge li po okupitika mboka ye na omimvo omishona ya endulule ongundu.

Onkee omilanduveta dhoka dha kala po nale nokulongithwa omimvo dha pita moshinima shika otadhi kala natango nokwiiyuthwa kudho, ano kape na elunduluko lyasha mushika.” Omukanda otagu ti: ” Aalongwa ayehe yOndondo ontimulongo mboka taya endulula moosikola, ano miipundi shi ikwatelela ketseyitho/etokolo lya ningilwe, otaya indilwa ya ki inyolithe noNAMCOL, ngaashi osho sha kala nale.”

Omukanda otagu yelitha wo kutya uuministeli mekwatathano noNAMCOL otaya ka kambadhala okwiindjipaleka ootundi dhomulongwa nomulongi, mwa kwatelwa ootundi pethimbo lyomafudho dhoka dhi na okuningilwa aalongwa mboka taya endulula ondondo ontimulongo, naashika otashi ka ningwa iikando itatu komumvo.

Pokati mpoka, omukanda otagu ti, aalongwa pamwe naavali oye na okuyelithilwa kutya okweendulula miipundi, otaku monika okuwanawa, ihe oku na wo iilanduli iiwinayi yontumba komwiilongi, oshoka omulongwa oku na ompito okukanitha iitsa ye ayihe mbyoka a monene momakonakono gwomumvo 2007, oshoka kape na eshilipaleko kutya mokweendulula ongundu ndjoka otaya ka pita iilongwa yawo ayihe niitsa yi li hwepo yi vulithe mbyoka ya mona.”

“Nompito yaNAMCOL, aalongwa otaya tungile kiitsa yawo mbyoka ya mona nale nokutsa ashike omuthindo iilongwa mbyoka inaye shi enditha nawa.”
Kuyele uuministeli owa tile kutya aalongwa ayehe mboka taya endulula Ondondo 10 – ano ye li 16 000 mboka inaya mona iitsa ya gwana oku ya fala mOndondo 11 otaya ka pitikwa ye endulule osikola miipundi. Uuministeli natango owa tile kutya oshinima shika osha nuninwa ashike aalongwa yomumvo 2007 mboka yoomvula 17.

Etseyitho ndika olya landula ketokolo lya ningilwe pokongressa yOngundu yoSwapo omvula ya zi ko kutya Epangelo nali “tule po oondungethaneko dha pumbiwa okukwatela mo aandopi momutungilo gwelongo, omadheulo neyambulopo lyomaunongo gawo opo aagundjuka ya vule okuzulwa ya ka ninge aakwashigwana ye na ongushu moshigwana.”

Amushangwa gwOpevi mUuministeli wElongo, Alfred Ilukena ota ti elombwelo ndyoka inali guma onkatu/etokolo lyuuministeli mbuka shi nasha naalongwa mboka ya ndopa Ondondo 10, ihe nali talike ko ongelongekidho lyopakathimbo omanga uuministeli tau kongo po ekandulopo lyomukundu moshinima shika. Ota ti oongulu dhosikola odha udha okuza omvula ya za ko, netaambo lya gwedhwa po otali ka eta omaupyakadhi. “Inatu hala aanona ya kale taya elaela ashike poosikola. Ngele otaya vulu okwiinyolitha noNAMCOL otatu ka tseya kutya otatu ya adha peni (uuna uuministeli wa mona po ekandulopo lyomukundu,” Ilukena ta ti.

Omukuluntuwiliki goNAMCOL, Heroldt Murangi, ota ti kutya NAMCOL ngoka e li omudhani omunene moshikondo shelongo, ina tseyithilwa natango shi nasha noshinima shika.

Nonando ongawo, Murangi ota ti NAMCOL okwiilongekidha okuungaunga nokutaamba aalongwa mboka taya endulula ondondo ontimulongo.

Ota ti oya gandjele wo omutengenekwathaneko gwelongitho lyoshimaliwa kuuministeli welongo okwiindjipaleka ootundi dhomulongi nomulongwa, kakele ehangano ndika olya tegelela natango okuuva kutya otaya vulu okugwedhela ootundi dhika ngiini ngele ya mono eyamukulo li nasha nomaindilo ge nasha niimaliwa.

LEAVE A REPLY

Please enter your comment!
Please enter your name here