Ekanka lyAaniilonga yoNBC Lya Oshigwana Oonkundana

0
10

WINDHOEK

Omukuluntuwiliki goNBC, Bob Kandetu, ota ti nonando oNBC, Napwu naakalelipo yaaniilonga ya zimina egwedhelo lyoondjambi, Olaata tayi wilike ehangano ndika itayi tsu kumwe naashoka, notayi ti ope na ompumbwe yiimaliwa. Ota ti Ehangano ekundaneki lyEpangelo olya vutile po ondungethaneko ompe yiilonga yalyo noku yi gandja kUuministeli wIimaliwa, nokwiindila Napwu a gandje ethimbo lya gwana, ihe shika inashi kwatha sha.

Kandetu ota ti ewiliko lyopombanda lyoNBC olya indile ehangano lyaaniilonga li ya pe natango andola iiwike iyali “ihe oya dhike oonyala mevi noya tokola okutseyitha ekanka.” Metiyali aaniilonga omathele yoNBC ya yedha omapulakata oya nyanya momapandaanda taya igidha nokunyana omukuluntuwiliki gwawo, Kandetu, taya ti omasiku ge oga pwa ko sho yi iteeka miilonga nokuthiga oshigwana momilema kaa shi na we oonkundana.

Aaniilonga oya kala taya igidha taya ti: ” Down, down, down, omasiku gwoye oga pwa ko Bob Kandetu,” nokwa li ya gongala poombelewa oonene dhoNBC taya pula oondjambi dhawo dhi gwedhelwe.

“Aaniilonga yoNBC oya kutha etokolo lyopamuhanga okulwitha uulunde mboka taya ti owo oNBC, pamwe naaleli yalyo mboka oyendji ye li ookayamukulwa, ewilikongundu lyawo oshowo olaata,” osho Gabes Andumba, ngoka e li amushangandjayi gwopevi goNapwu ta ti.

Aaniilonga mboka ye li mekanka, oya geela okundopa koNBC okugwedhela oondjambi dhawo noopelesenda hamano, otaya indile natango omukuluntuwiliki gwawo Kandetu pamwe newiliko lye alihe ya kuthwe mo miilonga moompadhi oontalala.

Napwu ota ti NBC oku na iimaliwa yaaniilonga inayi futwa natango yoopelesenda omugoyi mbyoka yi na okufutwa okuza komumvo 2003, noshikwawo shoka sha nayipaleka onkalo osho shoka kutya aaniilonga inaya mona natango egwedhelo lyawo lyoopelesenda hamano dhoka dha kundathanenwe momimvo 2007/2008.

“Ehangano otali lelwa kewilikongundu kaa li na ontseyo nelelo ewanawa oshowo omikalo dhuukombunda nuulingilingi. Alikana tu kwatheleni okuvudha mo uulingilingi, uunyenge, aawiliki haya laata, aaleli kaye na oshilonga shasha nokaye na ontseyo yasha,” osho omushangwa gopamuhanga gwa nyolwa koNapwu nOlaata yaakalelipo yaaniilonga yoNBC tagu ti.

Kakele Kandetu mokuyamukula komapopyo ngoka ota ti: “Ngame inandi kuta nando miilonga nenge okuyela omuntu miilonga inashi enda palandulathano. Kehe shimwe osha ningwa ashike palandulathano.”

Napwu naaniilonga ye li mekanka otaya pula “kufutwe meendelelo nopwaa na omaongaongo gasha oopelesenda hamano dhoka dha kundathanwa, oshowo okufuta moompadhi oontalala nopwaa na omaongaongo iimaliwa mbyoka yoopelesenda omugoyi; okwiikutha miilonga kOmukuluntuwiliki, ngoka taya ti ke na owino yokuwilika; eikuthomiilonga lyOlaata ayihe yoNBC; ekuthopo lyomeendelelo lyomunambelewa aniwa e nasha niimaliwa ngoka ha longo ashike etata lyesiku ihe oha futwa ondjambi onene.” Iinima yilwe tayi pulwa oyo ewapekululo lyomapuko ge nasha noondjambi dhaaniilonga, moka aniwa aaniilonga yamwe aape haya mono iimaliwa oyindji ye vulithe aaniilonga mboka aakulu ye na ontseyo noya kala mo ethimbo ele mehangano. Natango otaya ti oNBC oyi na omulanduveta gokukuta aaniilonga noku ya tidha.

Aaniilonga otaya ti ekanka lyawo otali tsikile sigo omaindilo gawo ga gwanithwa po: “Ngele inaga gwanithwa po, ewiliko nolaata yoNBC oyi na okupulwa omakanitho kehe taga ningilwa Ehangano.”

Nonando oNBC otayi ti yo oya lulilwa kompumbwe yoshimaliwa, aaniilonga otaya ti monakuziwa oshimaliwa osha longithwa ashike mOmunashipundi gOlaata yoNBC, Ponhele ya Frans, okuya momalweendo oshowo kokambo ke ‘kaaniilonga yiifundja’ omanga ha futu aaniilonga mboka ya kuthwa miilonga pakathimbo oondjambi dhawo dhi ihwapo manga ya tegelela iihokolola.

Aaniilonga oya tamekele ekanka lyawo potundi ontiheyali yongula omanga yamwe ya adhika ya tameka nale iilonga pohamano. Kape na aaniilonga ya pitikwa okuya momatungo goNBC. Ayehe oya kala ya thikama pondje yomuyelo, taya imbi omaimbilo gekondjelomanguluko, ya yedha omapulakata nokwiigidha omatumbulo gwontumba. Amushangandjayi gwopevi goNapwu ota ti aakuthimbinga mekanka otaya tsikile sigo omaindilo gawo agehe ga gwanithwa po.

Mokupopya pekanka mpoka, AmushangaNdjayi gwOndundahangano yAaniilonga moNamibia, NUNW, Evalistus Kaaronda ota ti ehangano otali yambidhidha lela ekanka lyaaniilonga yoNBC. “Tse otatu ka yambidhidha ekanka kutya nee otashi ka pula shike, oshoka ndika ekanka lyakwalukehe, kali shi ekanka lyaa li paveta ngaashi sha tumbulilwe kewilikongundu. Otashi yemateke okukoneka kutya ewiliko lyoNBC oli na omukumo okugandja omauyelele giifundja kaakalelipo yawo yopaveta okuutha kutya ekanka ndika kali li paveta, ihaya si ohoni,” osho Kaaronda ta popi a geya. Ota ti ethimbo olya thikana opo oAnti-Corruption Commission yi ye mo oonyala nokunikanika oNBC. “Oshi na wo okuuvika ko kutya aaniilonga otaye ki iteeka miilonga sigo omaindilo gawo ga gwanithwa po,” Kaaronda te shi koleke.

Komapopyo kutya aantu yamwe ohaya mono omauwanawa gawo gi ihwapo omanga ya kuthwa miilonga pakathimbo, Kandetu ota ti “Shika oshi li pamulandu gwoveta yiinima yaaniilonga. Ito vulu okukala ino futa omuniilonga ngoka a kuthwa miilonga pakathimbo. Ondjambi oya pumbwa okufutwa ngaashi yakwawo. Etompelo ndyoka lye ya kuthitha miilonga pakathimbo olyo ashike kutya omakonakono otaga ningwa natango.”

Theofelus Karipi, ngoka e li Omukuluntu gwOonzo dhOpantu ngoka a yakula omukanda gomaindilo peha lyOmukuluntuwiliki, okwa ti ye ota ka thikitha omanyenyeto gawo kewiliko.

Iilonga ayihe yomalaka moNBC aaniilonga yawo oyi iteeka miilonga okuza sho ekanka lya tamekele, kalele aakuluntu yiikondo yamwe otaya kwatele komeho iitaasi yayooloka yOradio.

LEAVE A REPLY

Please enter your comment!
Please enter your name here