SWAPO Ota Popilwa Oluhindo pOmuthiya

0
9

WINDHOEK

Ehangano lyOpashigwana lyUuthemba wOmuntu moNamibia (National Society for Human Rights – NSHR) metiyali olya pupula kombunda Opolisi yaNamibia sho ye shi pondola okukaleka po ombili negameno pethimbo lyiigongi iyali yopapolotika pOmuthiya ya ningilwe mOlyomakaya koSWAPO noRally for Democracy and Progress – RDP.

“Opolisi oya longa oshilonga oshiwanawa; onkalo okwa li tayi vulu okweeta omakuyunguto ga faathana naangoka gokoKenya,” osho Omukuluntuwiliki goNSHR, Phil ya Nangolo ta ti. Ehangano ndika olya uvithwa nayi kushoka tali ti omaihumbato goluhindo kiilyo yOngundu yoSwapo kaayambidhidhi yoRDP mboka ya li poshigongi shawo. Ya Nangolo ota ti kape na nando oshilyo shoRDP sha kutha ombinga mokuhinda iilyo yOngundu yoSwapo. Okwe shi tala ko wo kutya Swapo oye kwa li a kwatela komeho omalongekidho giigongi mondoolopa ndjoka opo ya hinde oRDP noku ya mbandaleka. “Shika oshiwinayi noonkondo konkalo yegameno moshilongo,” Ya Nangolo ta ti.

NSHR oya tulile aaniilonga yawo 12 yuuthemba womuntu opo ya tale onkalo pOmuthiya mehuliloshiwike, oshoka ehangano okwa li li ikwata kutya otashi vulika pu ka holoke iikolokosha, konima sho Ongundu yoSwapo ya tseyitha ohaluka kutya nayo ngaashi wo oRDP otayi ka ninga oshigongi shayo mondoolopa ndjika. Aaviyauki mbaka yuuthemba womuntu oya thaneke nuuvideo omathano gomainyengo momapandaanda pOmuthiya oshowo mondjila onene yaNdangwa naShomeya omanga iigongi inayi tameka oshowo konima sho iigongi ya halakana. Ya Nangolo ota ti omuntu gwontumba gwedhina Katoole ngoka aniwa ha longele poombelewa dhIilonga yUundaadhi wEpangelo pOngwediva (Namibian Central Intelligence Service – NCIS), “okwa kutha aniwa lela ombinga niilonga yoluhindo nenge okuunganeka omaihumbato goluhindo lwa ningilwa aayambidhidhi yoRDP kaayambidhidhi yongundu yoSWAPO.”

Aataleli yoNSHR otaya ti omunambelewa nguka gwegameno okwa monika ta hingi ohauto ye ontokele yoToyota WTI. Ya Nangolo ota ti oohauto dhilwe dhepangelo dhoka dha monika ongaashi dhoka dhoonomola dhika: GRN 3863, GRN 80625, GRN 3807 noGRN 3823 dhoka dha ndhindhilikilwa poshigongi shoSWAPO. Omupehaminista gUuyuuki, Uutoni Nujoma oshowo Omupehaminista gwIinima yAaniilonga Peter Ilonga otaku tiwa oya longitha mbali dhomoohauto dhoka. “Oohauto dhEpangelo kadha li ashike dhe ya poshigongi shoSwapo, ihe odha longithwa wo pamakalo dholuhindo okweendagula momapandaanda mOmuthiya,” Ya Nangolo ta ti.

“Shika osha ya unene kokule. Omupresidende (Hifikepunye) Pohamba na katuke oonkatu ngele oku na ko shili nokulwitha uulingilingi,” Ya Nangolo ta ti. NSHR otayi ti oya tala wo omuviyauki gOngundu yoSwapo, a tseyika nedhina Kolele noku li wo oshilyo oshikulu shoPLAN nkene kwa li a ponokele aayambidhidhi yoRDP. Kolele okwa yakula ko okambindja kaayambidhidhi yoRDP noku ka kokolola menono (omeya gonata).

“Pomikunda ngaashi Okapuku, Onankali nOnyaanya, aayambidhidho yoSwapo yokolupadhi okwa li taya tukana nokukeelela omainyengo gaayambidhidhi yoRDP kaa ya ye koshigongi shawo kOmuthiya,” oNSHR tayi ti. Ehangano ndika otali ti iiningwanima yomakuyunguto oya kwatela mo okudhaadhiga omamanya, “omaihumbato goluhindo nokuninga omainda gaa li paveta kaayambidhidhi yoSwapo” mondjila onene pOnathinge, Onethindi nOluno.

Opolisi aniwa oya kutha onkatu okukutha po omainda ngoka gomoondjila. Ya Nangolo ota ti wo kutya opolisi oya kala tayi keelele aayambidhidhi yoSwapo iikando itatu opo kaa ya hedhe popepi unene naampoka pwa li oshigongi shoRDP. NSHR oya lopota wo oshiningwanima shedhengo nemanya montulo lyomunamimvo 60, Priscilla Kambonde sho a heluka moshihauto shoRDP konima yoshigongi lwopotundi ontihetatu uusiku mboka. Amushanga gwEwawa lyAagundjuka yoSwapo, Liberius Kalili a za kOshitopolwa Omaheke okwa nyana “aaniilonga yuuthemba womuntu” yehangano lyoNSHR ta ti otaya taandeleke “oopolopanganda dhopambepo neinekelo kutya Kalunga koshili ota ka hepeka ethimbo Lye Eyapuki okuyamukula omagalikano goRDP, opo esiku limwe yi ka kuthe ko Epangelo molwomahalo nomauwanawa gawo wopaumwene.” Okwiindile ishewe Okomisi yOkulwitha Uulingingi yi ye mo okanyala nokukonakona oomiliyuna N$ 100 million dhoka dha kana moOffshore Developoment Corporation (ODC) “kumboka ya li aawiliki yUuministeli wIipindi nOofambulika pethimbo ndyoka.” “RDP oye na okukoneka kutya tse, Ongundu yoSwapo, itatu ka mbandalekwa nando kuyo.

Kaye na iilyo tayi vulu okuya methigathano nOngundu yoSwapo. Otwa tala nale iigongi yawo oyindji mbyoka ya ninga. Shoka haya ningi okulundulula aantu yawo okuza poshigongi shimwe nokuya fala koshigongi oshikwawo niihauto,” Kalili ta ti. Oshifo shika inashi vula okumona okomenda okuza kuAmushangaNdjayi gOngundu yoSwapo, Pendukeni Iivula-Ithana pethimbo tashi yi komanyanyangidho oshoka okwa li e na okukala miigongi kOshitopolwa shaCaprivi. Omupopiliko goNCIS naye ina vula okumonika opo a tye sha.

LEAVE A REPLY

Please enter your comment!
Please enter your name here