Pohamba Waraisa Oruhoze nOndiro yOmbara Munjuku II

0
7

I Kae Matundu-Tjiparuro

OTJOMUISE

Opresidenda ya Namibia Hifikepunye Pohamba Oritjatatu mapeta wakariangerere etundu ra Nguvauva pomaturiro womuzandona wombara Oministera yOkehi yOmahundju nOvize vyo Mokuvare, Killus Nguvauva, pakaraisire oruhoze rwe netundu nomuhoko auhe wOmbanderu mbwatonenwe orupuy oruzeu iyondjiro yombara wayo Munjuku II Nguvauva.

Ouhonapare wOmbazu wOmbanderu wazeuparisire ondiro yombara wina Omuhaamise wOkehi wOtjirata tjOvanane vOmbazu yazeuparisirwe iyOuhonapare wOmbazu wOvambanderu Oritjatatu.

Mbatengere pomaturiro inga okuserura ozondjira ozondjira zopresidenda yari o Ministera yOtutumbo nOvikunwa, Nickey Iyambo, o Ministera yOmananeno wOtukondua Nozongomainde, Omaha nOmekursiro wOkozombanda, John Pandeni nOtjiuru Tjorutu rOzondiero Zomekurisiro Wehi, Helmut Angula.
Koruseinina ape opresidenda iyende peere o Ministera yOkehi yOndjeverero, Gabes Tjihepo.

Ozoministera inda muvarwe zavazere po Ombara Otjitambi yOvaherero, Kuaima Riruako ngwari puna omuhona wa Vitoto, Vipuira Kapuuo.

Ombara Munjuku II wetuesire Oritjatatu muhokomunene mOnasareta ya Tjomuise yOmondivitivi nozombura 85. Wayakurirwe monasareta tjazire nokuutukisiwa okuza komaturiro we kEzorongondo ouvere we tjiwatanaukirire kouvi. Ombara okuza ko 2004 tjiyawa orumbembera kaiyerumuna ouveruke morutu na munao otjii kara amaihita hita mozonasareta no ku pita pita.

Ombara Munjuku II, omwatje womwatje wOmbara nOndangere yOvambanderu Kahimemua Nguvauva, wakwaterwa mo Mau mOtjauana tjiyari etenga ku Rozondu mo 1923 narire ombara yOvambanderu mOtjauana mo 1952 nombara yao mo Namibia mo 1960. Ihe omunene Kahimemua Nguvauva wari umwe wozohongora zotjirwa tja Namibia tjombiririro yohuurire yOvandoitji nu menaranao atu iyovimbumba vyo vita vyouhonapare wohuurire yOvandoitji puna Nikodemus Kavikunua mo 1896.

Omuyaruke ombara Munjuku II utjiukirwa korupa rwe orupyuke motjirwa tja Namibia tjongutukiro okuza kOtjauana eye na Daniel Munanamava puvavatera ovataure va Namibia mbaavetaura mehi okukawondjisa otjirwa tjongutukiro okuza pendje.

Movataure mbuvavatera mwari ihe yotjiwana Onongo Sam Nujoma. Wakaondjisa ohambwarakana ye kotjirwa tjongutukiro tjeya mo Namibia ozombura tjimazeutire mombura indji o 1960.

Ouhonapare wOmbazu wOmbanderu tjiwazemburukwa kotjiveta iyohoromende ya Namibia ekutuke puna omauhonapare woviwana vyarwe napezikamisiwa Otjirata tjOvanane vOmbazu, Ombara Munjuku II warira omuhaamise wokehi wotjirata ihi kehi yombara yOvandonga, Elifasa Kauluma, mo 1997. Eye watire aeri motjito ihi.

LEAVE A REPLY

Please enter your comment!
Please enter your name here