Omola Yapendura Orunywaa Mombongarero Yotjihuro

0
6

OTJOMUISE

Ombepo yokurandisa oruveze ndutjiukwa otjo Mola yOvaherero ndjeere kotjiriro mombongarero yOtjirata tja Tjomuise Oritjavari yatokere otjihungiriro otjitue.

Epu indi rahindirwe kokomiti onane yotjihuro mena rokutja ozorata ndatu Werner Claasen, Benestus Kandundu na Boas Ekandjo vapirurire ondiero yotjihuro okurandisa orupa rumwe roruveze indui kOuhonapare wOvaherero ngunda orupa indo rwarwe amaru tunwa kokurira oruveze romarandisiro wozongetjeva ozonditi.

Kandundu motjihungiriro ihi wakumininine okomiti onane yotjihuro mokutja ina ozondando zapeke ozohatjiukwa zokutunga oruveze romarandisiro rozongetjeva ozonditi indui.

Wapatanisire nomasa kutja ehi ronomora 6300 no R/6296 rirandisiwe arihe otjatjiriri ku ingwi ngwaningira okuriranda. “Pena ozondando zomohamunika mena rokutja ete otjozorata katuya kwamberwako ohunga nondando yotjihuro okutunga oruveze romarandisiro rozongetjeva ozonditi pehi indi.

Metjiwa kutja ovature wina kaveya kwamberwako.Tjazumba hapo oune ngumatjiwa kutja oruveze romarandisiro indui marutungwa?”, Kandundu wapurire mongondjero ye okuraisa onyengo ye motjina ihi kombunda yozongondjero peke peke zomutize wotjihuro Matthew Shikongo okumumwinisa.

Tjazumba Claasen opasekamenene okuyandja oruvara ku Kandundu nanunisa ondando yomohamunika. Wakuminine okomiti onane mongaro ndjiheri ongohoke natja katjiundikwa kutja ovitjitua vyomarandisiro nai mbikaendisiwa poruveze indui omouzororunga posyo ounane wapata otjinyo tjawo.

“Nandaku omundu warwe guungurisa omeva inga norutjeno nokuhina ousemba tjazumba wina akara mehi indi nokuhina ousemba, ami metjiwa kutja matuarewa kotjombanguriro,” Claasen wawirire mepu nandarire mongondjero ya Shikongo okumumwinisa. Wakaendere komurungu natja okanepo rive kokomiti yomananeno kari kombepo ama ketjiti omapopa womarandisiro woruveze indui.

Omuhaamise wOvihavero vyo komiti onane, Onganga Bjorn von Finkenstein, wahandjaurire kutja otjina ihi tjahingi orure nu rutenga ehi indi rarandisirwe ko Hosea Kutako Foundation mo 2002 posyo ombura ndjazuko avetie okurikambura mena rokutja o Foundation yasewa kombunda nomasutiro waro no N$31,522.06.

Karjisupi kombunda yomakamburiro waro onganda yoharive ndjimaitjiukwa otjOvaherero Traditional Authority yatjita omaningiriro wokuranda ehi indi. Omaningiriro inga yayakurwa kotjimariva tjo N$32,66 mo square metre mumuna otjimariva tjokuvatera. Otjimariva otjiputuputu tjehi indi ape o N$231,232 notjitjamurongo tjozoperesende o 15 kehi rounene wo zo square meter o 7080.

“Ete tuasuvasana okuhakaenene mondjira kutja ohunga yehi rirandisiwe komutjite womaningiriro nohinga otjihuro tjikurise. Wina patiewa kutja onganda indji kaisere okuungurisa ehi indi komaturiro poo kozongetjeva nungwari okozomberoo uriri,” Finkestein watjere okukohorora ombepo ndjaa ihingi.

Kombunda ape yoiri ohinga yokupitasana otjirata tjotjihuro katjina ondiero tjatoorere natjiyarura epu indi kokomiti okuka hungirira ko komurungu. “Tjinene mevanga orata Claasen metupe ouhatoi nondjivisiro komurungu mokukuminina okanepo kokomiti kukari nomapopa kombepo motjina ihi. Mevanga omayuva, oiri nomurari,” omutize wotjihuro watjere.

Orata Claasen wayandjere ongwizikiro ko mutize wotjihuro kutja omambo we owatjiri naweza ko kutja uri kozombaze okuye yauza nouhatoi. (Nampa)

LEAVE A REPLY

Please enter your comment!
Please enter your name here