Ovatuta Vapandjara Ozonyanda Omayovi

0
7

I Wezi Tjaronda

OTJOMUISE

Ovatuta tjiva mbapandjarere ozondu nozongombo zao ndatire iyo ombepera nombura ndjarokere korupati rweyuva komamuho otjiveke tjitjazuko maveningire ohoromende okuvesuta kombandjarero yawo.

Orupa rOmbatero yOmoruveze rOuzeu Oritjatatu rwatjere ovatuta tjiva veruningirire okutara kutja maruvevatere mombandjarero yawo. Otjiuru tjOrupa rOuveruke wOvinamwinyo mOrukondua rwa Karas, Onganga Tino Dakwa, wina watjere omberoo ye kaiyasuva tjinga ovatuta peke peke ama vevanga okutjiwa kutja mavevaterwa vi. Watjere eye wazuvire kutja pari omatjivisiro kombepo kutja ovatuta imba mavevaterwa. Ngunda aa yauzire kutja omunane wehika rovatuta korupati rewyuva komamuho, Johannes Jansen, aakundire ovatuta kombepo okutuara omana wao nawina otjivarero tjozonyanda tjivapandjarere, omakundiro inga kanaa puyatamunine otjisuta. Watjere ovatuta aa veuru kohoromende okuvevatera posyo kena kutjiwa kutja ihi otjina tjimapeya atjitjitua poo indee?

Omberoo yOuveruke wOvinamwinyo nganduu kOritjatatu tjandje maiyakura omaraisiro wombandjarero nu Dakwa watjere kena kutjiwa kutja omena rombandjarero yombura nombepera ndjariko katjisupi poo omena rombandjarero yekweze rokupepera arihe. Oritjatatu ondari eyuva eseinina romaraisiro inga, Dakwa ngwarongerisirire Ongooneya ya Karasa nomberoo onene mo Tjomuise ondjivisiro ohunga nombandjarero indji watjere.

Ngunda aperi nao orutu rombatero yomoruveze rouzeu rwatjere ngunda maruundju ondunge kutja ngaruvatere vi ovatuta otjiveke tjitjazuko mbapandjarere ozonyanda omayovi.

Nandarire kutja orupa indui hapo ruungura nouzeu mbwatjitua i Muhona karuna otjina novinamwinyo.

Otjiuru tjOkehi tjorutu indui, Gabriel Kangowa, wa raerere o New Era kutja orutu indui maruso okutara kounene wombandjarero indji nako kuyenena kovatuta tjinene tjivapandjarisire ovinamwinyo vyao avihe.

Ozonyanda nderi kombanda yo 8000 zatire iyombepera ndjeere punombura omayuva tjiyari yetano (5) na hamboumwe (6) komweze imbwi (Tjikukutu) motukondua tua Hardpan a Karasa.

O Karasa ondua raisire otjivaro otjinene nene tjozonyanda ndatire o 7000. Ovatuta va Hardapa vapandjarere ozonyanda o 1 438 omayuva ayeevari inga.

LEAVE A REPLY

Please enter your comment!
Please enter your name here