Geingob Ahuru Kandindate Pevango Lyoupresidentegona

0
13

MoVenduka-SWAPO Party chief Whip ntani hena nkuru ministera gokuhova moNamibia, Hage Geingob, kava mutumbwire asi yige gelike kandindate pevango lyoupresidente gona wombunga zaSWAPO Pepongo lyawo eli kalikereko lyoPolit Biro.Awo kava kere vavali nye mukwawo zendi Libertina Amathila kavamutumbwire age pwato nye apa kayizuvhire yiyo kanyokere.

Amathila kamutumbwire Netumbo Nandi Ndaitwah posiruwo sosigongi ose,nye age yiyo kapatanene asi kapi ana hara.Amathila ogu kakere asi ponze zodoropa katanterere New Era asi kapi kavamupulireko, yipo asi kapi yawapa otumbure mukweni wahana kumupurako.

Age katente asi nare gatanterako vamwe wombunga zawo asi age kapi nakarumbasanena nkenye evango kuna kuteturange asi Netumbo yige hena ana kutumburange. Age katente asi ame kuna kukwatesako Geingob, twahapiyaganekeni vantu, ame natura nare asi ngapi nina kugazara. Mbunga zaSWAPO moutano kazigeve paveta kovantu asi ngano ngapi vana hara omu navakara vakandindate vawo kukwama etokoro lyopolitbiro.

Ogu kageve eyi kovanambudi kere hamutjangantoni gombunga ezi Ngarikutuke Tjiriange, nokutanta asi ogu ana kara ngesi presidentegona gombunga ezi vanamutumbura asi akare presidente Hifikepunye Pohamba, kwato hena gumwe ana kurumbasana nendi.

Geingob kamutumbwire PendukeniIivula Ithana asi kandindate pevango lyoupresidendegona ano Tjiriange yiyo kakwatesereko. Netumbo yipo katumbwire Amathila nokuruganesa nonkango asi morwa mukadi, nokumukwatesako Nahas Angula. Eyi kayimonekere uwaawa kuna kara Jerry Ekandjo ogu gakere asi kuna hara evango lyoupresidendentegona karuganesere hena mpito ozo mokunkondopeka edina lyaGeingob.

Eyi kavayayitarwirwire asi kapisi usili Ekandjo kapi kauyungire yokuhamena Geingob.Ithana, Pandeni, Tjiriange kavavatumbwire pevango lyouhamutjanga ntoni. Ano siruwo oso Nangolo naNetumbo awo kavavatumbwire pevango lyouhamutjangagona. Tjiriange katente asi medina aga ngavagagava simpe kokomitiye zontjima-ntjima zombunga ezi omu vanakukahingira mo25-26gaMangundu,nokukagatarurura. Kongress ngazitameka mo27 -30Mangundu.

Hamutjanga ntoni katente asi koyili vana kuuyunga vantu asi marongikido gazo kapi gawapa, age katente asi oyo yimpempe yakahurako. Mbunga zaSWAPO kwadiva udemokoli, nayinye kuna kara positafura nkenye gumwe oyilimonene.Ose kuna kumona asi ezi mpito zongwa yiyo tuna kupira kusilika asi ngano vangapi vakandindate navakara pwankenye evango. Komiti zontjima-ntjima nokongress simpe vana kara hena nompito zokutumbura madina govakandindate ava vana hara. Epongo lyopolitbiro kavalitulilirepo vakatare asi ngapi lina kara erongikido lyokongress. Politbiro simpe kavakatulirepo vantu ava navakafira sinka yokutjanga eyi vana kuuyunga ntani vavangavakagendesa mahoroworo.

Simpe vahepa kuturako muntu ogu ngakara asi tagendesa mahoroworo, morwa ganare kwagagendesere muntu ogu ana kara ngesi asi Judge President Petrus Damaseb,morwa evango lyendi olyo moyirugana kapi tavamupulisire asi ngano aya gendese hena mahoroworo gombunga zoSWAPO.

LEAVE A REPLY

Please enter your comment!
Please enter your name here