Aantu Taya Tembudhwa Momapya Gawo Naya Futwe Pauyuuki

0
10

ONAMUTAYI

Omupehaminista gOmavi nOmatulululo, Isaack Katali okwiindile ofutu yopauyuuki kaantu mboka taya tembudhwa momapya gawo opo ya yepukile omahumokomeho ngoka tagi inyenge miitopolwa yokomikunda. Pethimbo ta popi poshituthi shOkudhimbulukwa Esiku lyOmalukalwa mUuyuni omathimbo ga zi ko pOnamutayi moshitopolwahogololo shaNgwediva, Katali okwa ti ethimbo olya thikana opo oveta ndjoka yi li po mu ningwe elunduluko li nasha naantu mboka taya tembudhwa momahala nomapya gawo opo ya yepukile omapendulopo ngoka tage ya momikunda dhawo.

Poshituthi shoka sha li kohi yoshipalanyolo: “Gamena Olukalwa Lwoye,”, Katali okwa tsu omuthindo ompumbwe yaantu ya shilipaleke kutya omidhingoloko dhawo odha gamenwa kekako kehe, iikulumuna nokutembudhwa shaa li pauyuuki ano pwaa na ofuto yopauyuuki.

Pauyelele wOmupehaminista Katali, ohashi uvitha nayi unene noonkondo okutala aantu taya tembudhwa pokuma pwaa na okutala kiilanduli iiwinayi mbyoka ya guma aakalimo mbaka.

“Ngame itandi mu tsikimike/hongaitha kaa mu longele kumwe naayetipo yomapendulopo, ihe onda hala ndi mu lombwele noku mu nkondopaleka mu tseye omauthemba geni oshowo iinakugwanithwa yeni opo mu vule okuya moonkundathana naantu mboka ya hala okulanda po omahala geni,” Katali ta ti. Omu na wo okutseya kutya omahumokomeho oge ya okukalelela. Iilando noondoolopa, iipangelo, uuklinika, oosikola, oondjila nomalutenda otaga ka kala po.

Pompito oyo tuu ndjika, onda hala okutsa omuthindo kutya oveta ndjoka yi li po oshowo omalandulathano ge nasha noofuto nomatembudho ogo ashike natango ge li miilonga sigo ga lundululwa kOparliamende. “Ngame paumwene ondi uvite kutya ope na lela ompumbwe okutalulula oveta ndjika nelalakano kushilipalekwe kutya aantu oya futwa pauyuuki. Otwa pumbwa okuungaunga nomaunkundi agehe ngoka ge li moveta ngoka ga guma nayi aantu yetu.”

Okwa yelitha kutya poompito dhimwe evi/epya otali landwa po koshimaliwa oshishona noonkondo, ano omayovi omilongo ne (N$40 000) kelelo lyaMuni.

Aantu yamwe otaya dhiladhila kutya oshimaliwa shika N$40 000 iimaliwa oyindji, hasho. Ngele elelo lyondoolopa olya topola epya ndyoka moopolota oontshona dhi li 20 kehe yimwe otayi ka kotha N$40 000, opolota kehe otayi ka landithwa po kaakwashigwana nodhi ka etela Muni oshimaliwa shithike N$800 000. Uuna aantu taya tembudhwa koonkondo ya thige po omapya nomahala gawo moka haya mono uuhupilo, omahala ngoka ya kala mo okuza pepupi lyuuhanona, ya ka tameke onkalamwenyo ompe palwe, nena oshimaliwa N$40 000 inashi gwana.

Pauyelele waKatali, epangelo olya tameka noshikonga shokushangitha omagumbo miitopolwa yokomikunda opo aantu ya mone omauthemba guumwene wevi/omapya moka ye li, naashika oshi li onkambadhala okuninga omalukalwa ge na egameno kooyene yagwo shi vulithe pethimbo ndika.

Pamukalo nguka, aantu otaya ka kala ponkatu ombwanawa okukundathana ondando yokulanda po omavi gawo naamboka ya hala okweeta omapendulopo pomikunda dhawo.

LEAVE A REPLY

Please enter your comment!
Please enter your name here