Uupyakadhi mOmukunda Othika Ota Wu Tsikile

0
7

Ngaashi naana aaleshi yoshifo shoNew Era ye shi leshele miifo ya pita kutya aanamukunda yOthika otaa thiminikwa natango onkalo yatya ngaaka otayi tsikile. Aathika otaa thiminikilwa Abraham Kamutsheetha Iipumbu oye a ninge mwene gwomukunda Othika. Aanamukunda otaa gandja uusama kelenga ekuluntu Herman Silas Iipumbu kutya moshinima shika oku na mo sha oshoka okwa ninga iinima oyindji mbyoka tayi ulike nkene enamo sha. Opo tse aathika tu popye ngeyi,otwa ndhindhilika nkene Elenga enene Iipumbu ha kambadhala aluhe okukutha oonkondo omalandulathano giituthi hayi ningwa pOthika. Nande aadhe omalandulathano ga ningwa nale, oha idhopomo nande iituthi kayi nasha nomithigululwakalo.

Oshiholelwa shimwe ooshi: Peegululo lyoprojeka yedhina Onelago, aaningi yelandulathano oya li ya gandja oshinakugwanithwa kuMartin Nambala Iipinge yAngombe opo a popye pehala lyomukunda gwe ngoka a thigulula kuhe Efraim Iipinge yAngombe ihe Iipumbu ompito ndjika okwe yi ikuthile koonkondo dhemwene molwashoka aniwa inayi pewa he Abraham Kamutsheetha Iipumbu ngoka ta thiminikilwa aantu oye a ninge mwene gwomukunda.

Oshiholelwa oshitiyali oshinasha neegululo lyokaklinika pOthika: Natango ompito ndjika okwe yi ikuthile yemwene koonkondo ina tulwa mo melandulathano. Oshiholelwa oshititatu: Egandjo lyomapapa pOthika: Elenga enene Iipumbu okwe ya poshituthi aadha Martin Nambala ta zalekwa ongala yomweenda a simana ongepapa yonkatu ye yuuwiliki mOthika. Iipumbu okwa ti ongala ndjoka nayi pewe he,Abraham Kamutsheetha. Shika osha tindwa nokwa lombwelwa miipathi yaantu ayehe kutya shika oshituthi shopapangelo shoshikondo shelongo kashi na sha nomithigululwakalo dhoka ye ta kondolola . Uumbangi wu na sha niilonga yelenga enene Iipumbu mokuthiminika Aathika owa yela nawa.

Otwa dhidhilika woo kutya Elenga enene Iipumbu ndjoka olyo hali kondolola ombelewa yelelo lyUukwambi pUukwangula olya zimina kutya edhina lya nakusa Epafras Iipinge Angombe olya kala lya dhimwamo nale momambo goshilongo manga Angombe ena omwenyo po tapu tulwa Abraham Kamutsheetha .Shika osha hala okutya omukunda ogwa kala gwa gandjwapo nale mang nakusa ena omwenyo.

Poshigongi shaatoolinkundana pUukwangula momasiku 6 Juni 2007,Iipumbu okwa zimina kutya shika osha ningwa kaanona yoskola mboka ya li taa kwathele pombelewa mpoka. Tse Aathika otwa hala oku shi yelitha nawa kutya itatu shuna nande monima ota tu yi komeho kutya nee otashi tu pula shike. Meme Lovisa Nashilongo Ipumbu YaTshitaatala (Mbidhi),omulongiskola pOgongo no wu li elenga ekuluntu lyaLupembana moka muna omukunda Othika otwe ku tegelelela kOthika.

Otwa hala wu holoke momukunda gwetu wu kandulepo omukundu nguka nande wa popya nale miipathi kutya kuna esiku to yako kOthika nenge omukunda wu gu pe Martin Nambala.

Tse Aaathika inatu hala okulelwa nongola kaantu ya li moongundu dhaakolonyeki hadhi ithanwa AKTUR, otwa hala okukala twa manguluka ngaashi Namibia lya manguluka. Mboka ya li muAKTUR tatu ya thiminikilwa natango otaa ka pukitha oshigwana ngaashi ye shi ningile nale. Otwa vulwa okuumbwa twa fa okatanga.Sho to yi kuNashilongo ye otati inda kuIipumbu kUukwangula sho to ya kuIipumbu ye otati indeni kuNashilongo nenge tati longeleni kumwe nahe Abraham Kamutsheetha. Etheni Martin Nambala a kale moshipundi shahe ngashi ne mu li miipundi yooho naakwazimo yeni yamwe. Oohapu odha zi momakana gAathika yoyene. Omushangi medhina LyAathika oye Kamugweetha Bravo

LEAVE A REPLY

Please enter your comment!
Please enter your name here