Ozondekurona Kazerikarerere

0
16

I Kae Matundu-Tjiparuro

OLEPHALALE, SOUTH AFRICA

Oruhoze ro zondekurona zOvaherero nOvambanderu mo South Africa rwa tjitukire enyando tjinga avehina veri karere nu imba mbazirire kumwe mOtjauana na Namibia ava kakarere punawo moruhoze indui.

Ovaherero nOvambanderu mbu mavevaza otjivaro tjo 500 va woronganene motjihuro ihi rukuru tjaa tjiukwa otjo Ellisras mOrukondua rukuru nduaa rutjiukuua otjomuvanda wOzomburu, o Transvaal. Ndinondi orukondua indui rutjiukwa otjo Limpopo. Ozondekurona norutanga ape orutjatatu rwaimba mbahupa kondjembo ya Katjivitjouanga yo 1904 nganduu ko 1908 va woronganene muno okuzemburunga ozombura esere zomavazero mo South Africa wOmbara Otjitambi yOvaherero oruveze indo, Samuel Maharero.

Ondjoroka indji kaa imunikire ko tjinga ozondekurona inda azari notjiungura otjituezu tjo kuyakura, okusekirisa no kurisa no kunuisa ovimbumba imbi.

Posyo koruseinina omuhonge nondekurona yOvaherero nOvambanderu mo South Africa, Tuamanovandu Papo tjimatja amena okupata ovitjitua ondjoroka indji nandarire kutja kanaa ya pamukire oyo aa iyerere ko.

Ombara Otjitambi Kuaima Riruako otjikando otjitenga wari potjitjitua vyo zondekurona za South Africa nu mu vyarwe ovingi wari omburo yondjoroka indi. Yari ongahukiro kutja ozondekurona za hurukwa mo minyo kutja ombara yao yee kukara punawo. Tjingetjo Ombara yOvaherero mo Tjauana na South Africa, Kaumo Maharero otja tjetjita okuza kombura indji o 2002 ozondekurona zamuno tjizauta neyuva rombazu rOvaherero nOvambanderu, wari povitjitua imbi. Wari norukongo romasa ro tjiuana okuza kominda peke peke vyehi ra Tjauana.

Jerusalema tjimotara tja hitirwe nozohiva nozongoma. Ozohiva nozongoma inda kaari otjina tjarwe nungwari yari ozombimbi nozondoro nda ya ndimwine otjirongo ihi Orovyungua omuhuka omunene ngunda arihiya tuako ohanya konya. “Ounatje natje!”ombimbi ya handuzire otjirongo ihi na ipendura otjimbi tjovita vyo 1904-8 nawina oruhoze. . “Ovita! Ovita iyayee!”

ondoro ya hondjezere kombimbi neyuva arihara otjivara tjapeke. Imba mbapandjarisiwa ombazu yao ndinondi vamunine kutja nangwari vena kona kuvaziriire.

Notjimbi ihi ovimbumba otji vya womborokere na vihungama ozongungu zapeke zOvaherero nOvambanderu povarama indji o Werkendama okuke rihepura no kukaningira otjiwa. Mu imba mberihepurire kovati yari Omuhona Tjipene Keja, Ombara Maharero, Ombara Otjitambi Riruako, na Venaete Tjivasera. Eyee umwe vaimba ku kupurwa ombazu no makuruhungi mo South Africa na Tjauana. Onongo yombazu Jarimbovandu Kaputu wari mene yao. Mu imba mbasuvisiwa muzo ovo matundu yoo Kandorozu, Kakunekuao, Heii, Hepundjua, Makono, Tjamuaha, Kauraisa na Tjivasera.

Okuza kozongungu pakarere omahungi nozombinika iyozonduna peke peke mu muari ozombara azeembari, Riruako na Maharero, Okanepo kOhoromende yOrukondua rwa Limppopo kukena omerizirira novitjitua vyo Manyando nOmbazu, Joyce Mashamba nOmuhona wa Lephalela, Pedro Seleka.

Onongo yOmambo nOnongo yOmakuruhungi, Zed Ngavirue wa kamburire ousupi omakuruhungi yovita vyo 1904-08. Omberoo yOmukuranepo wa Namibia ko Pretoria mo South Africa ya kuramenenwepo i Mbaukua Kandanga nu Omuhaamise wOvihavero wo Pan Afrikan Centre of Namibia (Pacon), Johannes Tjitjo wayandere ombinika yo Pacon. Omundu konoo isapehi ovakamburie vombimbi nawina ovatone vondoro mbakaendere notjiungura ihi pokati kovahungire nganduu komayandero womahungi. Wina omunduu konoo zembi ko okowa ya Mahalapye kehi yo mwimburise wayo Kavezeri. Oyo yari onunye peke peke nu nomaimburiro wayo tjiri yari omaimburiro wovandu mberi momahi wozonganda.

Okupata Utjiua Kakunekwao waresere omwiimbo mbwatjangwa iyo Muhaamise wOkehi wOvihavero vyo Komiti yOtjitiro Otjindjandja, Uazuvara Honga. Omwiimbo imbwi wena: Kamaaturire Ovahuurwa Rukwao, otjikando otjitenga wa kareseerwa po makaendero wo momivanda okuzemburuka mbatira motumbo tuo huurire nondatumisire mOtjozondjii ngari mu Seninarindi ombura indji. Kakunekuao tjazumba waraisire kutja omwiimbure wa katjoruhonga ngu imbura mOtjiherero nandarire kutja eye eraka ndeherii nandarire kutja eraka raihe naina. Eye umwe wozondekurona zOvaherero nOvambanderu ongwatera ya South Africa. Omuhonge Papo wapatere nongumbiro nombinika ndji maitja imba mba woronganene vena otjirumatua tji veturumatisa ndinondi tji tja woronganisa ovimbumba imba. Tjingetjo okuzamba Omuherero nOmumbanderu auhe wasere okuripura kutja hapo ozondekurona zomuhoko imbwi ozombura tjima pezemburukwa ozombura o 200 kombunda yozombura zarwe esere maze rumatisa otjikee rumatua? Yari ongahukiro kutja ondando yo mayuva wo masuviro ngazuko yeurisirwe nu omazemburkiro wozombura esere zomeero wOvaherero nOvambanderu muno yari ondoneno.

Otjivara tjarwe tjondoneno indji yari indi epango romasa ndakutirwe pokati kozendekurona za Namibia, o Tjauana na South Africa. Nepango indi etemba rotjitiro otjindjandja rakawondja ombaze komurungu. Ovitjitua imbi katjavipua otja tji vyapwire nandaku koruuri vyavyo kakuari ozoserekaze Esther Kainaimba na Vaja Ntingana-Adjah.

LEAVE A REPLY

Please enter your comment!
Please enter your name here