Okomitiye Yokukondjitha Iimbuluma mOshana Ya Yumudhwa Po

0
10

OSHAKATI

Opolisi mOshitopolwa Oshana oya tseyika iita okukondjitha iimbuluma, omiyonena nuubotsotso. Okwa tseyithwa wo omathimbo ga zi ko kutya iikonga ya kwatwa miiti yokukandeka omiyonena otayi ka ningwa moshitopolwa ashihe. Mewiliko lyaKomufala Gwopevi omupe, Ndahangwapo Kashihakumwa, oonkambadhala dhopolisi odha ndjekwa po sho aanambelewa yopolisi ye li 62 ya yelwa miilonga kuInspekta Omukuluntu gOpolisi, Leitenanda Sebastian Ndeitunga. Oshowo eyumudhopo lyOkomitiye yOmakwatathano gOshigwana nOpolisi moshitopolwa, ndjoka ya kala ya sa omathimbo ga zi ko. Mokupopya poshigongi shOkomitiye ndjoka shoka sha gongalwa wo kuMeya gwaShakati, Katrina Shimbulu, aawiliki yopashigwana okuza momalukanda ngaashi Kandjengedi, Oshoopala, Evululuko, Ompumbu nOneshila oshowo aawiliki yopamuthigululwakalo okuza moshitopolwa shelelo lyUukwambi, Kashihakumwa ota ti opolisi oyi na oshinakugwanithwa okuyambula po omakwatathano omawanawa mokati kaapolisi yoyene oshowo aakwashigwana opo yi vule okulonga nondjungu iilonga yayo, onkee osha simana okuyumudha po okomitiye ndjoka. Kombinga onkwawo, aakwashigwana oya pumbwa okuulika eitulomo nokugandja omauyelele kopolisi, oshowo okuholola eiyuvo lyokuhola oshilongo pakuyambidhidha Omiya dhaShinana.

Mokutotha mo elalakano enene lyokomitiye, okwa yelitha kutya oyi lile po okundungikathana nokutopolelathana omayele niiyetwapo mokati kaakwashigwana yoyene nopolisi shi nasha noonkambadhala dhopamuhanga okulwitha iimbuluma.

Okomitiye otayi vulu ashike okuhuma komeho ngele iilyo yayo oye shi pondola okundungika aakwashigwana moshitopolwa kombinga yompumbwe okukandeka omiyonena oshowo omaupyakadhi haga etithwa kiimbuluma.

Kashihakumwa ta ti: “Oshinima shotango twa pumbwa okutseya nokuuva ko osho shika kutya ngele aantu oya kutha ombinga mokukaleka po oveta nelandulathano pamwe noshigwana otashi ka ulika ethano lyayela okutseya kutya omiyonena oshike. Aakwashigwana oya pumbwa okutseya kutya oshikulumuna oshike, oshiponga shashike hashi zi momiyonena. Opo ihe ngele otwa uvu ko enenedhiladhilo lyiilonga yuumbudhi kutya oshike, nena otatu vulu okushunitha pevi omiyonena moshigwana.” Ota ti ngele omukwashigwana kehe okwa yelelwa kombinga yomiyonena, nena iilyo yokomitiye otayi ka eta po nuupu omathaneko omawanawa notaga opalele okulwitha iimbuluma moshitopolwa. Pauyelele waKashihakumwa, aalongi yiimbuluma oya koneka kutya ope na oombethene/oomwaka oku shi talela momakwatathano pokati kaakwashigwana nopolisi, nohaya longitha oompito dhika okulonga iimbuluma yawo. Omwaka nguka ogu na okuthitikwa, nomolwaashoka Okomitiye ndjika ya yumudhwa po. Inspekta ta ti oshigwana oshi na euvoko lyopambambo kutya opolisi oyo awike yi na okulwitha iimbuluma, kakele ota ti euvoko ndika olya puka oshoka opolisi awike itayi vulu okukondjitha iimbuluma pwaa na eyambidhidho lyaakwashigwana. Aakwashigwana oyo haya gandja omauyelele, oshoka aafekelwa yomiyonena oye li momagumbo gawo.

Aakwashigwana yamwe poshigongi shoka oya eta edhiladhilo opolisi yi indjipaleke nokugwedhela omuyalu gwaagandji yomauyelele kopolisi.

Iilonga yomiyonena tayi longwa unene moshitopolwa oya kwatela mo omateyo gomagumbo/oositola, uulingilingi, okatoo, omuyeka kwahomatiwa, okuyaka moositola nomadhengo. Shi nasha nuufuthi wiihauto, Kashihakumwa ota ti owa mwena po manga, kakele omathimbo ga zi ko opwa lopotwa eyako lyoshihauto pomukunda Ehafo sho Endjala Namushela ohauto ye ya yakwa megumbo.

LEAVE A REPLY

Please enter your comment!
Please enter your name here